﻿1 Jɔnɛ.
3.
Nyényîn ndín e edəŋge echě Titɛ́ɛ ádə́ə́ syánē. Échê edəŋge échábé ámīn kə́ə́ŋ béchəge syánē bán bǎn bé Dyǒb, běn-naá dékóó abɛ́. Nzɔm echě ekəə́ boŋ bad bé nkǒŋsé béēbíi syánē edíi áyə̄le béēsēbpɛɛ́ Titɛ́ɛ abíi. 
A-baányaŋ bé edəŋge, syánē dedíi bǎn bé Dyǒb bɔɔb. Éēbyɛ̄ɛ̄nɛ̄ɛ̄ bwâm pɛn chǒm-ɛ́ɛ syánē dɛ́bɛ̄ɛ̄. Boŋ debíí bán póndé echě Krǐstəə ápɛɛ́, syánē dɛ́ɛ̄bɛ̄ nɛ̂ŋgáne mɔ́, áyə̄le nɛ́n dɛɛ́nyīn mɔ́ ngáne ádíí. 
Kénzɛ́ɛ́ awě asumé nlém wɛ́ɛ Krǐstəə atə́ŋgɛ́né nɛ́ɛ asáŋté eche yə̌l ngáne Krǐstəə mwěn ámpē ásáá. 
Kénzɛ́ɛ́ awě abɛlé mbéb, akwedé nkáá áyə̄le abóó mbéndé e Dyǒb. Mbéb ńdíi abóo á mbéndé e Dyǒb. 
Nyêbíí bán epɛ éche Krǐstəə âmpɛɛ́ á nkǒŋsé ébédɛ́ɛ âmad mbéb. Krǐstəə mwěn-nɛ eewóoʼɛ́ mbéb ké nhɔ́g á yə̌l. 
Kénzɛ́ɛ́ awě adé ne Krǐstəə éēbɛ̄lɛ̄ɛ̄ mbéb. Kénzɛ́ɛ́ awě abɛle mbéb, eenyínɛ́ɛ́ Krǐstəə eebíi-ʼáa mɔ́. 
A-bǎnbǎn, nyéēmwāg se mod ádog nyé. Kénzɛ́ɛ́ awě abɛle mekan ḿme métə́ŋgɛ́né adíi mod awě abɛle mekan ḿme métə́ŋgɛ́né áʼsō éʼ Dyǒb, ngáne Krǐstəə ábɛlɛɛ́ mekan ḿme métə́ŋgɛ́né. 
Kénzɛ́ɛ́ awě abɛle mbéb, adíi mwǎn awě Devəlɛ áyə̄le Devəlɛ ambootéd mbéb abɛl sé á mbooted. Nzɔm echě enkə̌ŋ boŋ Mwǎn a Dyǒb ápɛ̄ á nkǒŋsé, ebédɛ́ɛ âbébed nsɔ́n ḿme Devəlɛ ábɛ́lé. 
Kénzɛ́ɛ́ awě adé mwǎn a Dyǒb, éēbɛ̄lɛ̄ɛ̄ mbéb, áyə̄le abɛ́ á Dyǒb ádé mɔ́ áte, éēhɛ̄lɛ̄ɛ̄-ʼɛ-sɛ ábɛlé mbéb áyə̄le Dyǒb dɔ́ɔ ádé mɔ́ Sáá. 
Chǒm éche ékooʼ syánē alúmed bad ábe bédé bǎn bé Dyǒb ne ábe bédé bǎn bé Satan édíi nɛ́n bán, bad ábe béebɛléʼ mam ḿme métə́ŋgɛ́né ne bad ábe béedəə baányaŋ bé Krǐsto, béesaá bǎn bé Dyǒb. 
Nkalaŋ ḿ bwâm ḿme nyénwōgkē se á mbooted ḿbédɛ́ɛ nɛ́n bán, dédəŋ nhɔ́g ne aníníí. 
Deebág nɛ́ɛ Keenɛ. Keenɛ abédɛ́ɛ mod awě Satanɛ, anwúú-ʼɛ mwǎnyaŋ. Cheé ênkə̌ŋ boŋ Keenɛ awúú mwǎnyaŋ? Anwúú mɔ́ áyə̄le mekan ḿme mwěn ábɛ́léʼáá mébédé mam mé mbéb boŋ ḿme mwǎnyaŋ méntə̄ŋgɛ̄n áʼsō éʼ Dyǒb. 
Né-ɔɔ́, a-baányaŋ, nyéebág menyáké ngáne bad bé nkǒŋsé békɔ́ɔ́ nyé. 
Dedəə́ bǎnned bé Krǐsto bémpēe, nɛ̂ dɔ́ɔ ábɛ́lé boŋ debíí bán dehǐdté ásē e ngíne e kwééd dekudé aloŋgé áde déemaáʼ. Kénzɛ́ɛ́ awě eédəə bǎnned bé Krǐsto bémpēe, alyəgé adé ásē e ngíne e kwééd. 
Kénzɛ́ɛ́ awě akɔɔ́ mwǎnyaŋ a Krǐsto, adíi mod a ewúɛn, nyêbíí-ʼɛ nɛ́n bán aloŋgé áde déemaáʼ déesaá mod a ewúɛn ké nhɔ́g áte. 
Krǐstəə ambɛ̌ ádē aloŋgé á nló ḿmɛ̄d. Nɛ́n dɔ́ɔ ábɛ́lé boŋ debíí chǒm éche edəŋge édíí. Né-ɔɔ́, syánē ámpē detə́ŋgɛ́né nɛ́ɛ débágé ádɛ̄d aloŋgé á nló ḿme bǎnned bé Krǐsto bémpēe. 
Nzé mod adé awě adé nhɔn, boŋ anyíné mwǎnyaŋ awě atógeʼ boŋ eewóo nlém ḿ bwâm âwóŋgɛn mɔ́, chán áhɛlesɛ ahɔ́b aá mɔ́dəə́ Dyǒb? 
A-bǎnbǎn, edəŋge éche déwánlɛ́né nhɔ́g ne aníníí, éetə̂ŋgɛnɛɛ́ abɛ́ dásɔ̄ á nsəl-tê ne á pɔ́le boŋ étə́ŋgɛ́né abɛ́ á mbɛltéd ne á mbále-tê. 
Nzé delúmté nhɔ́g ne aníníí edəŋge, né debíí bán dedé bad bé mbále ne debíí-ʼɛ bán nlém mɛ́wūū syánē á abum áʼsō eʼ Dyǒb. 
Póndé ké ehéé echě ḿmɛ̄d mewêmtɛn méláŋgé syánē bán debɛlé mbéb, debíí bán Dyǒb ábíí mam mésyə̄ə̄l tómaa ngáne syánē débíí. 
A-baányaŋ bé edəŋge, nzé ḿmesyánē mewêmtɛn méēlâŋge syánē bán dedíi bebɛl bé mbéb, deewógɛ́ɛ́ mbwɔ́g ké nhɔ́g nzé dekânneʼ áʼsō éʼ Dyǒb. 
Dekude kéchéé éche désɛ́dté mɔ́ áyə̄le dehídeʼ éche mbéndé débɛlé-ʼɛ mam ḿme méwógte mɔ́ menyiŋge. 
Mbéndé echě ábágé, edíi nɛ́n, dédúbe á dǐn áde awe Mwǎn Yesu Krǐstəə, dédəŋ-ʼɛ nhɔ́g ne aníníí. Melemlem mé mbéndé mɔ́ɔ Krǐstəə mɔ́mpē âmbɛɛ́ syánē. 
Kénzɛ́ɛ́-ʼɛ awě ahídeʼ mbéndé é Dyǒb, abâg mod nhɔ́g ne Dyǒb, Dyǒb-pɛ ábē mod nhɔ́g ne mɔ́. Nɛ́n dɔ́-ʼaá débɛlɛɛ́ boŋ debíí bán Dyǒb ádé ne syánē. Debíí áned áyə̄le Edəə́dəŋ éche ábágé syánē. 
