Womusu.
7.
Womu ɡe Dɑfidi u kuɑ sɑnɑm mɛ u nuki sɑnkire Kusi Bɛnyɑmɛɛɡiin sɔ̃. Ge wee. 
Gusunɔ nɛn Yinni, wunɑ nɑ nɑɑnɛ sɑ̃ɑ. A mɑn wɔro be bɑ mɑn nɑɑ ɡiren nɔmɑn di. 
Kpɑ bu ku rɑɑ mɑn mwɑ bu kɑsuku nɡe mɛ ɡbee sunɔ ɡɑ rɑ yɑɑ kɑsuku, ɡoo u kun ye wɔre. 
Gusunɔ, nɛn Yinni, wee bɑ mɑn tɑɑrɛ wɛ̃ɛmɔ bɑ mɔ̀, nɑ ɡoo torɑri, nɑ nɛn kĩnɑsi bɔrɔ kɔ̃ɔru kuɑ, nɑ nɛn yibɛrɛ wɔri, nɑ win yɑ̃nu wɔrɑ kɑ wɔbiɑ. Adɑmɑ nɑ̀ n yen ɡɑɑ kuɑn nɑ kɑ ɡem, 
ɑ de nɛn yibɛrɛ u mɑn sɛ̃re u ɡo. A de u nɛn ɡoru deri mi. 
Yinni Gusunɔ, ɑ nɛn yibɛrɛ wɔrio kɑ mɔru. Be bɑ kɔ̃ruɑ, ɑ bu sɛɛyɑsio kɑ mɔru. A de ɑ n wɑ̃ɑ nɛn bɔkuɔ. A de ɑ mɑn siriɑ. 
Yinni Gusunɔ, wee ɑ sɔ̃ wunɛn sinɑ ɡɔnɑɔ. A de bwesenu nu mɛnnɑmɑ mi. A de ɑ nu siri mi. 
Yinni Gusunɔ, wunɑ kɑɑ tɔmbu siri. A mɑn sirio nɡe mɛ nɛn dɛɛrɑrɑ nɛ. A mɑn nɛn ɡem wɛ̃ɛyɔ. 
A de tɔn kɔ̃sobun dɑɑ yu nɔru ko, kpɑ ɑ de ɡemɡibu bu kuurɑ. Yinni Gusunɔ, ɑ sɑ̃ɑwɑ ɡemɡii. Wunɑ ɑ rɑ tɔnun ɡɔ̃run ɡɑri wɛ̃ɛri. 
Wunɑ ɑ rɑ mɑn ɡɑnɛ nɡe tɛrɛru. Wunɑ ɑ rɑ bèn ɡɔ̃ru ɡɑ dɛɛre fɑɑbɑ ko. 
Wunɛ, ɑ rɑ siriwɑ dee dee. Yinni Gusunɔ, ɑ mɑɑ sɛ̃. 
Kɑ mɛ, tɔn kɔ̃so u ku rɑ win dɑɑ deri. U rɑ win tɑkobi nɔɔ dɛrewɑ. U rɑ win tɛndu bɛriwɑ. U win sɛ̃u sɔre u yĩisi. 
U tɑbu yɑ̃ɑ ɡɔɔɡinu kuɑ. Mɑ u sɛ̃ɛ dɔ̃ɔɡinu kuɑ. 
U win sɔmburu seewɑ. U kɔ̃sɑ bwisikumɔ. U weesu wĩimɔ. 
U suurɑ ɡbɑ ɡɑbun sɔ̃, ɑdɑmɑ win tiiwɑ u koo ye wɔri. 
Kɔ̃sɑ ye u rɑɑ kuɑ kpuro, win wirɔwɑ yɑ koo wɔri. Win dɑmɡii te u rɑɑ dɔrɑmɔ, win wirɑ tɑ koo kɔrɑ. 
Yinni Gusunɔ, kon nun siɑrɑ, domi ɑ sɑ̃ɑ nɑɑnɛɡii. Yinni Wɔrukoo, kon nun tɔmɑ kɑ womu.