Efesu.
5.
Tɛ̃, yèn sɔ̃ i sɑ̃ɑ bii be Gusunɔ u kĩ, i hɑniɑ koowo i n kɑ mɔ̀ nɡe wi. 
I de bɛɛn wɑ̃ɑrun kookoosu su n kĩru mɔ nɡe mɛ Kirisi u sun kĩɑ mɑ u win wɑ̃ɑru wɛ̃ bɛsɛn sɔ̃ nɡe yɑ̃ku nubu duroruɡiru te tɑ Gusunɔ dore. 
Yèn sɔ̃ i sɑ̃ɑ nɑɑnɛ dokeobu i ku de kɔ̃ɔ mɛnnɑbu tɑntɑnɑru sɔɔ ǹ kun mɛ dɑɑ disinuɡiɑ ǹ kun mɛ binɛ, yen ɡɑɑ yu nɔɔrɑ bɛɛn suunu sɔɔ. 
I ku mɑɑ de sekurun ɡɑri ǹ kun mɛ wiirɑ ɡɑri ǹ kun mɛ ɡɑri kɑnkɑm yu yɑri bɛɛn nɔɔ sɔɔn di domi n ǹ kɑ bɛɛ weenɛ, ɑdɑmɑ i de i n Gusunɔ tɑkɑru mɔ̀. 
I de i n yɛ̃ kɑm kɑm mɑ be bɑ kɔ̃ɔ mɛnnɑmɔ tɑntɑnɑru sɔɔ, ǹ kun mɛ dɑɑ disinuɡiɑɡibu, ben ɡoo kun bɔnu wɑsi Gusunɔ kɑ Kirisin bɑndu sɔɔ. Mɛyɑ mɑɑ binɛɡii, domi binɛɡii sɑ̃ɑwɑ nɡe bũu sɑ̃ɔ. 
I ku rɑ de ɡoo u kɑ bɛɛ ɡɑri diri swɑɑ nim wiɑ, domi yenin sɔ̃nɑ Gusunɔn mɔru wee ben wirɔ be bɑ ǹ nùn mɛm nɔɔwɑmmɛ. 
Yen sɔ̃, i ku de i n ɡɑ̃ɑnu mɔɔsinɛ bɛɛ kɑ tɔn ben bweseru. 
Yellu bɛɛn tii i rɑɑ wɑ̃ɑwɑ yɑm wɔ̃kuru sɔɔ. Adɑmɑ tɛ̃, bɛɛ kɑ Yinnin ɡbinnɑɑn sɔ̃, i wɑ̃ɑ yɑm bururɑm sɔɔ. Ǹ n mɛn nɑ, i de i n sĩimɔ nɡe yɑm bururɑmɡibu. 
Domi wi u sĩimɔ yɑm bururɑm sɔɔ wiyɑ rɑ n tɔn ɡeerun kom bwese bwesekɑ mɔ̀ kɑ ɡeɑn kobu kɑ mɑɑ ɡem ɡerubu. 
I kookɑri koowo i kɑ ɡiɑ ye yɑ koo Yinni wɛ̃re. 
I ku tii kpɛ̃ɛ kookoo kɑmɡisu sɔɔ si tɔmbɑ mɔ̀ yɑm wɔ̃kuru sɔɔ. Adɑmɑ i su terɑsio yɑm bururɑm sɔɔ. 
Seku bɑkɑrɑ ì n nuɑ ye tɔn be, bɑ mɔ̀ ɑsiri sɔɔ. 
Adɑmɑ kookoo si, sù n terɑ yɑm bururɑm sɔɔ, su koo sɔ̃ɔsirɑ kpɑsɑsɑ. 
Geemɑ ɡɑ̃ɑnu bɑɑnire ni nu sɔ̃ɔsirɑ kpɑsɑsɑ, nu rɑ kowɑ yɑm bururɑm. Yen sɔ̃nɑ Gusunɔn ɡɑri nɛɛ, “A yɑndo wunɛ wi ɑ do. A seewo ɡɔrin di. Kpɑ Kirisi u nun yɑm bururɑsiɑ.” 
Ǹ n mɛn nɑ, i bɛɛn sɑnu sɑnusu lɑɑkɑri koowo. I ku de i n sĩimɔ nɡe be bɑ ku rɑ bwisiku, ɑdɑmɑ i n sĩimɔ kɑ lɑɑkɑri. 
Sɑɑ ye i mɔ kpuro, i ye dendio kɑ lɑɑkɑri domi sɑɑ yeni, sɑɑ kɔ̃sɑ. 
Yen sɔ̃ tɛ̃, i ku de i n sɑ̃ɑ be bɑ ku rɑ bwisiku, ɑdɑmɑ i hɑniɑ koowo i kɑ ɡiɑ ye Yinni u kĩ i ko. 
I ku de tɑm mu bɛɛ ɡo, domi mi sɔɔrɑ dɑɑ bɛrɛtɛkɛ wɑ̃ɑ, ɑdɑmɑ i de Hunde Dɛɛro u n bɛɛ yibɑ. 
I de womu si i kɑ Gusunɔ siɑrɑmɔ su n wɑ̃ɑ bɛɛn fɑɑɡi sɔɔ, i n Yinni tɔmɑmɔ kɑ siɑrɑbun womusu bɛɛn ɡɔ̃ruɔ. 
I n Gusunɔ Bɑɑbɑ tɑkɑru mɔ̀ sɑɑ bɑɑyere ɡɑ̃ɑnu kpuron sɔ̃ kɑ bɛsɛn Yinni Yesu Kirisin yĩsiru. 
I wiru kpĩiyɑnɔ yèn sɔ̃ i Kirisi bɛɛrɛ wɛ̃ɛmɔ. 
Bɛɛ kurɔbu, i bɛɛn durɔbu wiru kpĩiyɔ nɡe mɛ i ko Yinni kuɑ. 
Domi durɔwɑ sɑ̃ɑ win kurɔn wiruɡii nɡe mɛ Kirisi u sɑ̃ɑ win yiɡbɛrun wiruɡii. Yiɡbɛ te, tɑ sɑ̃ɑ win wɑsi, wiyɑ mɑɑ sɑ̃ɑ ten Fɑɑbɑ kowo. 
Nɡe mɛ yiɡbɛ te, tɑ Kirisi wiru kpĩiyɛ, nɡe mɛyɑ n weenɛ kurɔbu bɑ n ben durɔbu wiru kpĩiyɛ ɡɑ̃ɑnu bɑɑnire sɔɔ. 
Bɛɛ mɑɑ durɔbu i bɛɛn kurɔbu kĩɔ, nɡe mɛ Kirisi u win yiɡbɛru kĩɑ mɑ u win wɑ̃ɑru wɛ̃ ten sɔ̃. 
U kuɑ mɛ, u kɑ tu dɛɛrɑsiɑ kɑ win ɡɑri yi yi sɑ̃ɑ nɡe nim, kpɑ u kɑ tu tii yiiyɑ. 
Domi u kĩ tu nɑ win wuswɑɑɔ kɑ ten bɛɛrɛ kpuro, tɑ kun disinu ɡɑnu mɔ, ǹ kun mɛ suriki surikinu, ǹ kun mɛ serere ɡɑɑ. U kĩwɑ tɑ n dɛɛre kpɑ tɑ kun tɑɑrɛ ɡɑɑ mɔ. 
Mɛyɑ n weenɛ durɔbu bu ben kurɔbu kĩɑ nɡe mɛ bɑ ben tiin wɑsi kĩ. Wi u win kurɔ kĩ, u win tii kĩwɑ. 
Goo sɑri wi u win tiin wɑsi tusɑ, u rɑ yi diisiewɑ kpɑ u yi nɔɔri nɡe mɛ Kirisi u mɔ̀ win yiɡbɛrun sɔ̃. 
Domi sɑ sɑ̃ɑwɑ win wɑsin doo dookɑ. 
Nɡe mɛ Gusunɔn ɡɑri yi ɡerumɔ yi nɛɛ, “Yen sɔ̃nɑ durɔ u koo win tundo kɑ win mɛro deri, kpɑ wi kɑ win kurɔ bɑ n mɑninɛ kpɑ be yiru kpuro bu ko wɑsi tee.” 
Gɑri yi, yi sɑ̃ɑwɑ ɡɑri ɡiri yi yi rɑɑ beruɑ, ɑdɑmɑ Kirisi kɑ win yiɡbɛrun wɑ̃ɑsinɑɑwɑ nɑ kɑ yɑ̃. 
Kɑ mɛ, i de durɔ bɑɑwure u n win kurɔ kĩ nɡe win tii, kpɑ kurɔ bɑɑwure u n win durɔn bɛɛrɛ yɛ̃.