﻿Yoobu.
13.
Wee nɛn nɔni yi ye kpuro wɑ, nɛn swɑsu su mɑɑ ye kpuro nuɑ, mɑ nɑ ye lɑɑkɑri kuɑ. 
Ye i yɛ̃, yerɑ nɛn tii nɑ mɑɑ yɛ̃. I ǹ mɑn bwisi kere. 
Adɑmɑ Yinni Gusunɔ Dɑm kpuroɡiiwɑ nɑ kĩ n ɡɑri sɔ̃. Wiyɑ kon weeweenu koosi. 
Domi bɛɛ, weesɑ i rɑ n sekumɔ. I sɑ̃ɑwɑ tim nɛmɔ weesuɡibu. 
N dɑɑ burɑm bo i n mɑɑri, kpɑ bu bɛɛ ɡɑrisi nɡe bwisiɡibu. 
Tɛ̃, i nɛn weeweenu swɑɑ dɑkio, kpɑ i nɔ ye nɑ ɡerumɔ. 
I tɑmɑɑ i ko i Gusunɔn biru yɔ̃rɑ kɑ weesu? I ko i nùn mɔru bɑrɑ kɑ ɡɑri weesuɡii? 
Bɛɛyɑ i ko i kɑ nùn yinɑ? Bɛɛyɑ i ko i nùn weeweenu kuɑ? 
Ù n bɛɛ wɛ̃ɛrɑ i ko i nùn wɛ̃re? I ko i nùn nɔni wɔ̃ke nɡe tɔnu? 
Bɑɑ ì n win biru yɔ̃rɑ ɑsiri sɔɔ, kɑ mɛ, u koo bɛɛ tɑɑrɛ wɛ̃. 
Win kpɑ̃ɑru tɑ ǹ bɛɛ bɛrum mɔ̀? I ǹ nɑndɑmɔ win sɔ̃? 
Bɛɛn ɡɑri sɑɑrinu nu sɑ̃ɑwɑ nɡe torom. Ye i ɡerumɔ yɑ ǹ dɑm mɔ nɡe weke te bɑ kɑ sɔndu mɔmɑ. 
I mɑrio, kpɑ i de n ɡɑri ɡere, kpɑ n mɑn deemɑ ye n ko n mɑn deemɑ. 
Wee nɑ sɔɔru kpɑ, bɑɑ nɑ̀ n kon nɛn wɑ̃ɑru biɑn nɑ. 
Gusunɔ ù n kĩ, u mɑn ɡoowo. Kɑ mɛ, wiyɑ nɑ nɑɑnɛ sɑ̃ɑ. Kon kɑ tii yinɑ win wuswɑɑɔ. 
Yɑ koo kpĩ yu kɑ mɑn fɑɑbɑ nɑɑwɑ. Domi tɔn kɔ̃so kun kpɛ̃ u terɑ win wuswɑɑɔ. 
I swɑɑ dɑkio i nɛn ɡɑri nɔ. I swɑɑ tem kpĩiyɔ i nɔ ye kon ɡere. 
Wee nɑ sɔɔru kpɑ n kɑ nɛn ɡɑri ɡere. Nɑ mɑɑ yɛ̃ mɑ nɑ ɡem mɔ. 
Wɑrɑ u koo kɑ mɑn sikirinɑ nɛn ɡem sɔɔ. Nɑ sɔɔru kpɑ nɑ̀ n tɑɑrɛ mɔ n kɑ nɔɔ mɑri kpɑ n kpunɑ n ɡbi. 
Gusunɔ, ɑ mɑn ɡɑ̃ɑnu yiru yeni kuo, kpɑ n ku mɑɑ nun kukuɑ. 
A mɑn wunɛn nɔmu swɛnyɑrio, kpɑ nɑ kun mɑɑ nɑnde. 
A mɑn sokuo, kpɑ n nun wurɑri. Nɑ̀ n nun kɑnɑ, ɑ mɑn wisio. 
Torɑnu nyewɑ nɑ nun torɑri. A de n nu ɡiɑ. 
Mbɑn sɔ̃nɑ ɑ mɑn biru kisi, mɑ ɑ mɑn kuɑ nɡe wunɛn yibɛrɛ. 
Wɑrɑ ɑ nɑɑ ɡire. Wuru ɡe ɡɑ kɑ woo doonɔ? Wɑrɑ ɑ nɑɑ swĩi. Yɑkɑ ɡbebusu? 
Mbɑn sɔ̃nɑ ɑ mɑn wɑhɑlɑ bɑkɑ yeni kpɛ̃ɛ, mɑ ɑ mɑn sɛɛyɑsiɑmɔ nɛn ɑluwɑɑsirun torɑnun sɔ̃. 
Mbɑn sɔ̃nɑ ɑ mɑn yɔ̃rɑsiɑ nɡe wìn nɑɑsu bɑ bɔkuɑ kɑ sii yɔni, mɑ ɑ nɛn kookoosu kpuro mɛɛrɑ, mɑ ɑ nɛn nɑɑ dɑbusɑnun ɡeeru yi. 
Wee nɛn wɑsi yi dɑm dwiiyɑ yi sɑnkirɑ nɡe yɑbe te kɔkɔnu di. 
