﻿Yoobu.
26.
Yoobu u Bilidɑ wisɑ u nɛɛ, 
Bilidɑ, wunɛn wisibu bu ǹ dɑm sɑriruɡii somimɔ. Wunɛn dɑm kɛ̃ru tɑ ǹ ɑrufɑɑni ɡɑɑ mɔ. 
Annɑ ɑ bwisi kɛ̃ru wɑ te ɑ wi u kun bwisi mɔ kɛ̃mɔ. Wunɛn bwisi yi, yi ǹ ɡoo somimɔ. 
Wɑrɑ ɑ ɡɑri yini sɔ̃ɔmɔ. Wɑrɑ u nun ɡɑri yini ɡerusiɑ. 
Be bɑ ɡu bɑ wɑ̃ɑ sere nim wɔ̃kun tem sɔɔwɔ, bɑ diirimɔ. 
Domi Gusunɔ u be kpuro wɑɑmɔ. Gɑ̃ɑnu kun nùn ɡɑnuɑ ɡɔribun wɑ̃ɑ yeru mi. 
Wiyɑ u sɔ̃ɔ yɛ̃sɑn nɔm ɡeu doke wom dirum sɔɔ. Mɑ u tem bwɛ̃ kɑm dirum sɔɔ. 
Mɑ u nim bɑnisi ɡuru winu sɔɔ. Kɑ mɛ, ɡuru wii ni, nu ku rɑ ɡɛ̃ɛre nim bunum sɔ̃. 
Wiyɑ u rɑ de ɡuru winu nu win sinɑ ɡɔnɑ wukiri. 
Mɑ u bubenu kuɑ nim wɔ̃kun wɔllɔ, mi yɑm bururɑm kɑ yɑm wɔ̃kurɑ kɑrɑnɛ. 
Gusunɔ ù n ɡbɑ̃rɑ, wɔllun ɡbere yɑ rɑ diiriwɑ, kpɑ yɑ n wɑ̃ɑ biti sɔɔ. 
Kɑ win dɑmɑ u rɑ nim wɔ̃kun nim kɔsuku. Kpɑ u kɑ win bwisi yɑɑ ɡɔbɑ ye bɑ mɔ̀ Rɑhɑbu kɑmiɑ. 
Ù n wom wurɑ, wɔllu kpuro tɑ rɑ dɛɛrewɑ nɡe bɑ kurɑ. Kɑ win nɔmɑ u rɑ wɑɑ ye yɑ dukɑ mɔ sɔkiri. 
Adɑmɑ yeni kpuro yɑ sɑ̃ɑwɑ win kookoo piiminu. Nin wɔkinun fiikowɑ sɑ rɑ n nɔɔmɔ. Ǹ n mɛn nɑ, wɑrɑ u koo kpĩ u win dɑm ɑsɑnsi tubu ù n ɡbɑ̃rɑ nɡe ɡurɑ. 
