﻿Yoobu.
31.
Nɑ kɑ nɛn nɔni ɑrukɑwɑni bɔkuɑ nɑ nɛɛ, nɑ ǹ kɑ yi wɔndiɑ mɛɛrimɔ pɑi. 
Ǹ n mɛn nɑ, ɑre yirɑ̀ Gusunɔ Dɑm kpuroɡii u mɑn yiiye wɔllɔ. 
Tɔn kɔ̃sowɑ u rɑ kɑm ko, kpɑ durumɡii u nɔni sɔ̃ɔrɑ. 
Gusunɔ u nɛn swɑɑ yɛ̃. U nɛn sɑnu sɑnusu mɛɛrimɔ. 
Gusunɔ u mɑn yĩruo kɑ kilo ye yɑ sɑ̃ɑ dee dee. Kpɑ u wɑ mɑ nɑ dɛɛre, nɑ ǹ wɑ̃ɑ weesu kɑ tɑki sɔɔ. 
Nɛn sɑnu sɑnusu sù kun sɑ̃ɑ dee dee, ǹ kun mɛ nɛn ɡɔ̃ru ɡɑ̀ n kɔ̃sɑ binɛ kuɑ ye nɛn nɔni yi wɑ, ǹ kun mɛ durum ɡɑɑ yɑ̀ n mɑn wɑ̃ɑsi, 
Gusunɔ u de ye nɑ duurɑ, ɡoo u ye tubi di u ɡɛ̃, kpɑ nɛn dɑ̃ɑ ɡbɑɑru tu kɑm ko. 
Nɑ̀ n mɑɑ kurɔ ɡoo binɛ kuɑ, ǹ kun mɛ nɑ̀ n nùn yinɑ bɛriɑ win dii kɔnnɔwɔ, 
Gusunɔ u de nɛn kurɔ u durɔ ɡoo doo kuɑ, kpɑ ɡɑbu bu kɑ nùn kpunɑ. 
Nɑ̀ n kɔ̃sɑ yen bweseru kuɑ yɑ koo mɑn kɑm koosiɑ kɑ nɛn ɑrumɑni sɑnnu nɡe dɔ̃ɔ. Domi n weenɛ siri kowo u yen bweseru sɛɛyɑsiɑ. 
Nɑ̀ n yinɑ n nɛn sɔm kowobu ben kɔsiɑru wɛ̃, 
mbɑ kon kpĩ n ɡere Gusunɔn wuswɑɑɔ. Nɡe mbɑ kon nùn sɔ̃ ù n mɑn sɛɛyɑsiɑmɔ. 
Gusunɔ wi u mɑn tɑkɑ kuɑ nɛn mɛron nukurɔ, wiyɑ u mɑɑ bu tɑkɑ kuɑ. Gusunɔ turo wiyɑ u bɛsɛ kpuro mɔmɑ bɛsɛn bɑɑwuren mɛron nukurɔ. 
Nɑ ǹ sɑ̃ɑrobu yinɑri ye bɑ mɑn bikiɑ. Nɑ ǹ mɑɑ ɡɔminibu derire nɔni swɑ̃ɑru sɔɔ. 
Nɑ ǹ ɡobeku dĩɑnu birɑre nɛn yɛnuɔ. 
Domi sɑɑ nɛn ɑluwɑɑsirun di, nɑ rɑ ɡobekubɑ nɔɔriwɑ nɡe nɛnɑ nɑ ben tundo, kpɑ nɑ n ɡɔminibu nɛni. 
Nɑ̀ n wɔnwɔndo ɡoo wɑ u yɑ̃nun bukɑtɑ mɔ, 
nɑ rɑ nùn yɑ̃nu kɛ̃wɑ ni nɑ kuɑ kɑ nɛn yɑɑ sɑbenun sɑnsu u kɑ wooru yɑri. 
Nɑ ǹ ɡobeku ɡoo tɑki diire yèn sɔ̃ nɑ siri kowo ɡoo tɑ̃sɑ. 
Nɑ̀ n yeni kpuron ɡɑɑ koore, Gusunɔ u de nɛn senu nu sɔsikiɑrɑ sɑɑ nin ɡbin ɡbinkɑn di, kpɑ nɛn ɡɑ̃senu nu wɔrumɑ nu bɔɔkirɑ. 
Domi Gusunɔn sɛɛyɑsiɑbu bu mɑn bɛrum mɔ̀. Nɑ ǹ mɑɑ kpɛ̃ n yɔ̃rɑ win wuswɑɑɔ win kpɑ̃ɑrun sɔ̃. 
Nɑ ǹ nɛn nɑɑnɛ dokere wurɑ sɔɔ, n ɡere n nɛɛ, wurɑ, ɑ sɑ̃ɑwɑ nɛn yĩiyɔbu. 
Nɑ ǹ mɑɑ tii suɑre nɛn dukiɑn kpɑ̃ɑrun sɔ̃. 
Nɑ ǹ suru ǹ kun mɛ sɔ̃ɔ sɑ̃ɑre, yen ɡɑɑ yɑ̀ n yɑrɑ. 
Nɛn ɡɔ̃ru ɡɑ ǹ wurɑre ben mi ɡiɑ ɑsiri sɔɔ. Nɑ ǹ mɑɑ nɔmu dokere nɔɔwɔ n kɑ bu bɛɛrɛ wɛ̃. 
Nɑ̀ n yen ɡɑɑ koore, n weenɛ siri kowobu bu mɑn sɛɛyɑsiɑ. Domi nɑ Gusunɔ Dɑm kpuroɡii yinɑwɑ mi. 
Nɑ ku rɑ nuku dobu ko nɛn yibɛrɛ ù n nɔni sɔ̃ɔre. Nɑ ku rɑ yɛ̃ɛri wɑhɑlɑ yɑ̀ n nùn deemɑ. 
Nɑ ǹ mɑm torɑre n win ɡɔɔ kɑnɑ kɑ bɔ̃ri. 
Nɛn yɛnuɡibu bɑ yɛ̃ mɑ nɑ rɑ sɔbu dɑm koosie, kpɑ bu di bu debu nɛn yɛnuɔ. 
Nɑ ku rɑ wure sɔɔ u kpunɑ tɔɔwɔ ù n tunumɑ. Nɑ rɑ nùn nɛn ɡɑmbobɑ kɛniɛwɑ u du. 
Nɑ ku rɑ nɛn torɑnu bere nɡe tɔn be bɑ tie. Nɑ ku rɑ mɑɑ nɛn durum tii mɑrisi. 
Nɑ ku rɑ n tɔmbun ɡeren bɛrum mɔ. Nɑ ku rɑ tii ɡɔwe n nɛɛ, bɑ mɑn ɡɛmɑ. 
Nɛn ɡɑri dɑ̃ɑki wee. Mɑnɑ kon ɡoo wɑ u mɑn swɑɑ dɑki. Dɑm kpuroɡii u mɑn wisio. Nɛn yibɛrɛ ù n dɑɑ nɛn torɑnu yoruɑ tireru sɔɔ, 
kon tu sɔndiwɑ nɛn senɔ, kpɑ nɑ n tu doke nɡe sinɑ furɔ. 
Kon Gusunɔ susiwɑ nɡe sinɑ boko, kpɑ n nùn sɔ̃ ye nɑ kuɑ kpuro. 
Nɛn ɡberu tɑ̀ n mɑn wuri koosi, mɑ ten kpĩi yi nɔni yĩresu yɑrimɔ, 
ǹ kun mɛ, nɑ̀ n ten dĩɑnu di nɑ ǹ ɡɑ̃ɑnu kɔsie, mɑ nɑ be bɑ rɑɑ tu mɔ nuki sɑnkɑ, 
tu sɑ̃ki kɑ yɑkɑ kɔ̃susu kpiiyo dĩɑnun ɑyerɔ. Yoobun ɡɑrin kpurowɑ mi. 
