﻿Womusu.
40.
Dɑfidin womu ɡe u wom kowobun wiruɡii kuɑ. U nɛɛ, 
nɑ nɛn yĩiyɔbu doke Yinni Gusunɔn mi. Mɑ u mɑn sĩiremɑ u nɛn nɔɔ swɑɑ dɑki. 
U mɑn ɡɑwɑ u yɑrɑ sɑɑ kɑm kobun wɔrun di, mi pɔtɔkɔ wɑ̃ɑ. U nɛn nɑɑsu sɔndi kpee sɑɑrɑ wɔllɔ, kpɑ n kɑ yɔ̃rɑ dim dim. 
Gusunɔ u derɑ nɑ womu kpɔɔ mɔ̀ ɡe nɑ kɑ nùn siɑrɑmɔ. Tɔn dɑbiru tɑ nuɑ mɑ tɑ bɛrum kuɑ, mɑ tɑ ten nɑɑnɛ doke Yinni Gusunɔ sɔɔ. 
Doo nɔɔruɡiiwɑ wi u Yinni Gusunɔ nɑɑnɛ sɑ̃ɑ, wi u ku rɑ ɡɛre u tii suobu kɑ wee kowobu swĩi. 
Gusunɔ nɛn Yinni, wunɛn sɔm ɡeenu kɑ wunɛn himbɑ ye ɑ sun kuɑ yɑ dɑbi. Gusunɔ, ɑ kpɑ̃, ɑ ǹ sɑɑrɑ mɔ. Nɑ kĩ n ye kpuro kpɑrɑ n tɔmbu nɔɔsiɑ. Adɑmɑ yen ɡeerɑ kpɑ̃ sere nɑ ǹ kpɛ̃ n ye sɑɑri. 
A ǹ yɑ̃kuru kĩ, ǹ kun mɛ kɛ̃ru. A ǹ yɑ̃ku dɔ̃ɔ mwɑɑrɑruɡiru bikie, ǹ kun mɛ torɑruɡiru. Adɑmɑ ɑ nɛn swɑsu kɔriɑ. 
Mɑ nɑ nɛɛ, nɛ wee, nɡe mɛ bɑ nɛn ɡɑri yoruɑ woodɑn tireru sɔɔ. 
Gusunɔ nɛn Yinni, nɑ kĩ n wunɛn kĩru ko. Wunɛn woodɑ yɑ wɑ̃ɑ nɛn ɡɔ̃ruɔ. 
Tɔn wɔrun suunu sɔɔ, nɑ rɑ wunɛn fɑɑbɑn lɑbɑɑri ɡeɑ kpɑre. Yinni Gusunɔ, ɑ yɛ̃ mɑ nɑ ku rɑ nɛn nɔɔ mɑri. 
Nɑ ǹ wunɛn fɑɑbɑn ɡɑri beruɑ nɛn ɡɔ̃ruɔ. Nɑ wunɛn nɑɑnɛ kɑ wunɛn somiru tɔmbu nɔɔsiɑ. Nɑ tɔn wɔru ɡunɑ wunɛn tɔn ɡeeru kɑ wunɛn bɔrɔkiniru sɔ̃ɔsi. 
Yinni Gusunɔ, ɑ ku de n wunɛn wɔnwɔndu biɑ. A de wunɛn tɔn ɡeeru kɑ wunɛn bɔrɔkiniru tu mɑn kɔ̃su sɑɑ kpuro sɔɔ. 
Domi kɔ̃sɑ ye yɑ mɑn sikerenɛ yɑ ǹ ɡɑrirɔ. Nɛn kom kɔ̃sum kpuro mɑn ɡirɑri, mu ǹ wɑɑbu wɑ̃. Mu nɛn wirun seri dɑbiru kere. Nɑ mwiɑ kpɑnɑ. 
Yinni Gusunɔ, ɑ mɑn wɔro, ɑ nɑ fuuku ɑ mɑn fɑɑbɑ ko. 
A de be bɑ kɑsu bu mɑn hunde wunɑ bu seku bɑkɑru wɑ. A de be bɑ nuku dobu mɔ nɛn wɑhɑlɑn sɔ̃ bu biru wurɑ kpɑ bu sekuru di. 
A de be bɑ mɑn yɑɑkoru mɔ̀ bɑ n wɑ̃ɑ dɛsirun biti sɔɔ. 
Adɑmɑ ɑ de be bɑ nun kɑsu bɑ n nuku dobu mɔ. Kpɑ be bɑ wunɛn fɑɑbɑ wurɑ bɑ n yɛ̃ɛrimɔ wunɛn sɔ̃. Kpɑ bɑ n ɡerumɔ mɑ Yinni Gusunɔwɑ kpɑ̃ɑru bo. 
Adɑmɑ nɛ sɑ̃ɑrowɑ, nɑ ǹ ɡɑ̃ɑnu mɔ. Kɑ mɛ, Yinni u mɑn yɑɑye. Nɛn Yinni, wunɛ wi ɑ rɑ mɑn somi kpɑ ɑ mɑn wɔrɑ, ɑ ku tɛ. 
