﻿Womusu.
44.
Womu ɡe Koren bibu bɑ wom kowobun wiruɡii kuɑ. Ge wee. 
Gusunɔ, sɑ nuɑ kɑ bɛsɛn tiin swɑɑ wunɛn sɔmɑ ye ɑ kuɑ bɛsɛn bɑɑbɑbɑn wɑɑti. Berɑ bɑ sun ye sɔ̃ɔwɑ. 
Kɑ wunɛn tiin nɔmɑ ɑ bwese tukunu ɡirɑ. A bwese ni so nu yɑrinɑ, mɑ ɑ bɛsɛn bɑɑbɑbɑ swĩi nin wɑ̃ɑ yenɔ. 
Bɛsɛn bɑɑbɑ be, bɑ bwese nin tem mwɑ. N ǹ mɔ yèn sɔ̃ bɑ tɑkobi mɔ, n ǹ mɑɑ mɔ yèn sɔ̃ bɑ dɑm mɔ, ɑdɑmɑ yèn sɔ̃ ɑ bu kĩwɑ mɑ ɑ wɑ̃ɑ kɑ be, mɑ ɑ bu yɑrɑ kɑ wunɛn nɔmu. 
Gusunɔ, wunɑ ɑ sɑ̃ɑ nɛn sinɑ boko. A wunɛn tɔmbu nɑsɑrɑ wɛ̃ɛyɔ. 
Kɑ wunɛn dɑmɑ sɑ ko bɛsɛn yibɛrɛbɑ suriri. Kɑ wunɛn yĩsirɑ sɑ ko bu suni. 
Domi nɑ yɛ̃ mɑ n ǹ nɛn tɛndu, ǹ kun mɛ nɛn tɑkobi yɑ koo mɑn fɑɑbɑ ko. 
Wunɑ kɑɑ sun wɔrɑ bɛsɛn yibɛrɛbɑn nɔmɑn di. Kpɑ ɑ be bɑ sun tusɑ burisinɑ. 
Sɑ ko n woo kɑnɑmɔ tɔ̃ru bɑɑtere wunɛn sɔ̃, sɑ n nun siɑrɑmɔ sere kɑ bɑɑdommɑɔ. 
Kɑ mɛ, wee ɑ sun yinɑ, ɑ sun sekuru doke, ɑ ku rɑ n mɑɑ kɑ bɛsɛn tɑbu kowobu wɑ̃ɑ bɑ̀ n tɑbu yɑriɔ. 
A derɑ sɑ biruku yirɑ wurɔ bɛsɛn yibɛrɛbɑn wuswɑɑɔ, be, be bɑ sun tusɑ bɑ bɛsɛn yɑ̃nu ɡurɑmɔ. 
A sun bɛri ben nɔmɑɔ nɡe mɛ bɑ rɑ ɑrɑri yɑ̃ɑru nɔmu bɛrie. Mɑ ɑ derɑ sɑ yɑrinɑ, sɑ yɑbi bwese tukunu sɔɔ. 
A bɛsɛ, wunɛn tɔmbu dɔrɑmɔ ɡobi sɑri, ɑ ǹ mɑɑ sun ɡɑrisi ɡɑ̃ɑ ɡeenu. 
Wee ɑ sun sekuru doke bɛsɛn berusebun wuswɑɑɔ, 
be, be bɑ sun sikerenɛ, bɑ sun yɛ̃ɛmɔ, bɑ sun yɑɑkoru mɔ̀. A derɑ bwese tukunu nu sun womu dokemɔ, mɑ nu sun wii ɡimɑnu koosimɔ kɑ yɑɑkoru. 
Wee sere kɑ tɛ̃, seku te, tɑ rɑ n mɑn mɔ̀wɑ, kpɑ nɑ n nɛn wuswɑɑ wukiri 
yèn sɔ̃ nɛn yibɛrɛ u mɑn wɔri, u wɔmmɔ u mɑn nɔɔ kuurimɔ. 
Yenibɑ kpurowɑ yɑ rɑ sun deemɛ. Kɑ mɛ, sɑ ǹ nun duɑri, sɑ ǹ mɑɑ wunɛn ɑrukɑwɑni kusie. 
Bɛsɛn ɡɔ̃ru ɡɑ ǹ sĩire wunɛn min di, sɑ ǹ mɑɑ ɡɛre wunɛn swɑɑn di. 
Adɑmɑ kɑ mɛ, ɑ sun kɔsukɑ ɡbɑburɔ dɛmɑkunun wɑ̃ɑ yerɔ. Mɑ ɑ sun yɑm wɔ̃kuru wukiri. 
Gusunɔ, sɑ̀ n dɑɑ wunɛn yĩsiru duɑri, mɑ sɑ dɑ sɑ bũnu ɡɑnu sɑ̃ɑmɔ, 
ɑ ǹ kɑɑ tubu, wunɛ wi ɑ tɔnun ɡɔ̃run ɡɑri yɛ̃? 
Adɑmɑ wunɛn sɔ̃nɑ bɑ sun ɡoomɔ bururu kɑ yokɑ, bɑ sun mɛɛrɑ nɡe yɑ̃ɑ ni bɑ kɑ dɔɔ bu ɡo. 
A dom yɑndo Yinni! Mbɑn sɔ̃nɑ ɑ do. A dom yɑndo. A ku sun yinɑ sere kɑ bɑɑdommɑɔ. 
Mbɑn sɔ̃nɑ ɑ wunɛn wuswɑɑ berumɔ. Mbɑn sɔ̃nɑ ɑ ǹ bɛsɛn wɔnwɔndu mɔ̀. A ǹ wɑ nɡe mɛ bɑ sun tɑɑre? 
Domi sɑ nuki sɑnkire. Sɑ kpĩ tuɑ sɔɔ. 
A seewo ɑ sun somi. A sun wɔro wunɛn durom bɑkɑm sɔ̃. 
