﻿Gesami Hea:su.
38.
Hina Gode! Dia ougiba:le, nama se bidi mae ima! 
Di da na Dia dadi amoga fa:ginisi, amola na fane sanasi. 
Dia da nama ougiba:le, na se baligili nabala. Na wadela:i hou hamobeba:le, na da:i huluane da olo bagade madelasa. 
Na da nina: wadela:i hamonana fedege agoane hano heda:i amoga gela daha. Na wadela:i hou da fedege agoane, liligi bagadedafa aguni masunu hamedei agoai ba:sa. 
Bai na da gagaoule hamobeba:le, na aiya da dasale gahasa. 
Na da se nabawane beguduli, gala:la sa:i. Na da hahabe asili daeya, mae fisili, dinana. 
Na da asugiba:le, da:i goaeasa. Amola na da bogomu gadenei ba:sa. 
Na da gasa hamedene, dafawane gala:la sa:i. Na da da:i dioi, amola se nababeba:le gayasa. 
Hina Gode! Na hanai amo Dia dawa:! Na gayabe huluane Dia naba! 
Na habe da ha:ha:sa, amola na gasa da asi dagoi. Na si da mobi sa:i dagoi. 
Na da aiya bagohame madelaiba:le, na sama amola na na:iyado fi dunu ilia da nama hame gadenena maha. Na sosogodafa amolalia na hagasa. 
Dunu da na medole legemusa: dawa:be, ilia da na sa:ima:ne sanenisa. Amola dunu da nama se ima:ne dawa:be, ilia da na wadela:lesimusa: magagisa. Ilia da na wadela:lesimusa: sia: fane ilegesu hou hame yolesisa. 
Na da ge ga:i dunu defele, hame naba. Amola na da sia: hamedei dunu agoane, hame sia:da. 
Na da ge ga:iba:le, dabe adole imunu hamedei dunu agoai gala. 
Hina Gode, na da dima dafawaneyale dawa:sa, amola Di da na Hina Godeba:le, nama dabe adole imunu. 
Na da se nabasu baligilidafa nababeba:le, nama ha lai dunu da na mae habosesema:ma. Ilia da na dafai hou ba:beba:le, Dia mae habosesele sia:ma:ma! 
Na da maedafa fisili, se naba. Amola na da dafamu gadenei ba:sa. 
Na da na wadela:i hou sisane fofada:sa. Be na da amo dawa:beba:le, bagadewane beda:sa. 
Na ha lai dunu da dagumui noga:i amola gasa fi gala. Nama ha lai dunu bagohame da nama bai hamedene, higale ba:sa. 
Dunu amo da noga:le hamobe dunuma wadela:i dabe iaha, ilia da na higale ba:sa. Bai na da moloi hou amoga hamomusa:, logo hogobeba:le. 
Hina Gode! Dia na mae fisiagama! Na Gode! Nama gasigale mae aligima! 
Hina Gode! Na Gaga:sudafa! Wahadafa, na fidima! 
