﻿Salmo.
124.
Ani satu lingag dad to salu di Bong Gumnè Amuito Dwata, mdà di ku Dabid. Ku talà msen gito i Amuito Dwata, tan dé i gukelito? Tmimel gamu, bel Israél! 
Hae, ku talà msen gito i Amuito Dwata, di kasfati i dad to dmuen gito, 
tafnatila ito mdà di kadfo i bong kalbutla, hae, gambet i lmanaf fanla gito fanlo di mto ito fa. 
Nkel ito dad to samfati gito gambet glumfak ito i bong dunuk, na nlimun ito i yéél. 
Na tamlimas ito di kgal i aloh yéél, ku là nsen ito i Amuito Dwata. 
Taman, mlé ito kafye di Amuito Dwata, du laan ito faloh di kalmoito di kmal i dad to dmuen gito. 
Tagalwà ito di agotla, gambet satu anuk di bnas galwà di fawel i to mawel; hae, galwà ito du tfò dal i fawella. 
I tmabeng gito dunan i Amuito Dwata, i mimò i langit na tanà. 
