﻿Dad Fngewe.
17.
Fye fa ku kmaan ge balù tan i tukay gdè knaan, syan nun ktanak di gumneam, di kmaan ge di bong fista di gumnè i nun ksamuk. 
I salig fulung faldam, kenen kadang magot tingà i amun i landègukmamu, na nun kadang alelan di knun tagak i amun di dad ngaan di kfatin. 
I to tmilew i blawen na salafì di lifoh, bay Dwata tnandakan nawa i to. 
I to sasè, bayan flinge i dad sasè talù, na i to tmulen kéng, bayan flinge i talù gafalmo. 
I to madoy i dad to landè, salngad nadoyan Dwata i mimò dale, na i to lehew di sasè gaslok i demen to, nun kaflayaman. 
I dad tua mdag i dad fùla, na salngad i dad ngà du mdag ale i dad tuala. 
I kafye talù là blà di to là fulung faldam, lumban i ktulen kéng là fakay blà i ulu di dad to. 
Én fandam i dademe to, ku mlé filak di gugbuni salngad i satuimò, du balù simto gumléla dun, gwèla i knayèla. 
Ku mayè i to too kando i dad to, nlifetan i dad salàla di kenen, bay ku galan sansulit man i salà i demen to, én gaskah i dadsgalak. 
I to nun kaglabat, too mlal tdò balù fa alò fagu di sulê kngakkenen, di to i là fulung faldam, balù fa tamaskél mlatu dulê. 
I to sasè gal mlét i dad to di banwe, taman nun ganlal i landè kakdo salu di kenen na bnalas i sasènimoan. 
Fye fa ku gamsitong ge i labè lmanaf béar tnaku i dad ngaan, di gamsitong ge i to là fulung faldam, di kimoan sasè i landègukmamu. 
Ku sasè baling balasam i fye, too là tlag i sasè di gumneam. 
I katbù i ksugak, salngad kaloh yéél matbe di ksangam dun, taman fanlalam tanlag di là fa tambù, du fye là mbaling bong. 
I to gal mukum falwà i to gamsalà, du fye là maflayam, nafanlayaman i to landè salà, i nimoan ani slame knang Dwata. 
I to là fulung faldam, là mayè fulung, taman landè lubay fagbet kenen, du tatì falmo filak. 
I dad to sgalak, toola fite i kasakdola, na landè gukmamu i kasaflanek ku là ale stabeng di bang nunkaflayam. 
I to kulang kaglabat, makang kenen mayad dad uteng i demen to. 
I to mayè sugak, mayè gamsalà, na i to too fdag, mayè ku malmo. 
I to faldam sasè, landè fye fatanan, na i to talù sasè, sasè gukelan. 
I tingà là fulung faldam, alò mlé klidù nawa i maan, na landè klehew i maan di tingaan là fulung faldam. 
I klehew nawa, gafye i laweh, na i klidù nawa, gafsasè i laweh. 
I to sasè i gal mukum i usay dmawat filak di gugbuni, na msang i kaglut. 
I to nun kaglabat, kayean ku i kdee nimoan fagu di fye kfagu, bay i to là fulung faldam, sbalét i fandaman. 
I tingà là fulung faldam, mlé klidù nawa di maan, na mlé ksal di yéan i fsut kenen. 
Là sa fye ku fanlayam i to landè salà, na là sa fye ku fanlayam i to fye na mgafè. 
I to nun gnadè, toon funa fandam ku tan i manan, na i to nun kaglabat, là sukaf i nawan. 
Balù i to là fulung faldam ku tatì fanak na là talù, én fandam i dademe nun kfulungan na kaglabatan. 
