﻿Dad Fngewe.
21.
Dwata malak fandam i harì, nalakan fagu di knayean, salngad kalakan i kaloh yéél. 
Kdee nimò i satu to di fandaman too fye, bay Dwata mukum ku tan i knayè nawa i to na i duenan mimò dun. 
Mabtas fa di Dwata i kimò fye na matlu di nun dsuam di kenen. 
I dad to sasè, én mebe dale i kafdatahla na i kafdagla, na ani i gafsalà dale. 
I to funan too fanse faldam ku tan i fanan nimò nun bonguntungan di nimoan, bay ku tatì kalyakan mimò, landè gwean. 
I knun gwè fagu di klimbung tatì mlal lana na gamgebe i to di fati. 
I dad to labè, malmo fagu di dale ksasè, du là ale sa mayè mimò i matlu nimò. 
Là matlu i dalan gumlalò i dad to nun salà, bay i dalan gumlalò i dad to fye ldam, too matlu. 
Fye fa ku i lagi nun yaan mnè di too tukay lawig di satnù di gumnè i yaanan mayè mugak. 
I to sasè, toon knayè mimò sasè, na landè kakdon i demen to. 
Fagu di kaflayam i to madoy, én tamdò i to kulang i kfulunganfaldam, na di katdò i to fulung faldam, too matnù i gnadean. 
Dwata kenen too matlu, gadean i nimò i dad to sasè di lam igumnèla, na kenen sa i falmo dale. 
Ku nun to là flinge i kafakdo i dad to landè, kadang di satu duh, ku kenen i fakdo landè flinge kenen. 
Ku flabè i ganlal, magwè i kaflabean ku nun blé di kenen di gugbuni. 
Too lehew i dad to matlu di fye kukum, bay di dad to sasè, too sasè i fandamla dun, du gafalmo dale. 
I to talà mlalò i dalan kaglabat, én gukelan kadang di gumnè i dad mati. 
I to too mayè mimò i knayean i alò gaflehew kenen, mbalingkenen to landè, na i to too mayè minum i dad gamlangal na kmaan i dad toomabtas knaan, laan mbaling to nun bong knun. 
I dad to sasè, maflayam ale fagu di knayèla mimò sasè di dadto matlu, du magbalas sa di sasè i nimòla. 
Fye fa i lagi nun yaan mnè di banwe landè to, di satnù i yaanan sukaf nawan na too mayè mugak. 
Di gumnè i to fulung faldam nun mabtas kandeen na fye nemknaan, bay i to là fulung faldam, too mlal i kafalmon i kdeeknunan. 
Ku kamdo ge i demem to na mimò ge i matlu nimò, mlawil ge, matlu ge, na nafè ge i dad to. 
I to fulung faldam, gmagan mlad i satu syudad nsen i dad tonun kgal, na gmagan lambà i mgal labat batu i snaligla glibut isyudad. 
I to là mayè gakuf di samuk, toon fangeye i manan. 
I to fdatah na fdag i kton, nadoyan i demen to, na taalì i kafdagan. 
I to là mayè mimò, too dee knibalan na i knibalan ani, én igamfati kenen, du là mayè mimò. 
Na i to là mayè mimò, tayud i duh aloan fandam i knibalan, bay i to matlu, fandaman i dademen to, du too kenen mayè mlé. 
I dsù blé i to sasè, knang Dwata, lumban ku blén fagu di sasè knayè i nawan. 
I to tmulen kéng di gususay, malmo kenen, bay i to fulung flinge na tmulen i kaglut, ssfanlinge i dad to i manan. 
I to matlu, nun ksaligan i kton kenen matlu, bay i to sasè, alò tatì flingu kenen matlu. 
Balù nun kfulung i to na nun kaglabatan na nun fye kafngewen, bay ku knang kenen Dwata, i kdee ani là gamtabeng kenen. 
I to fakayan fnatlagad i dad kudà nebe di kasfati, bay Dwata sa alò mlé i katu. 
