﻿Lada sɛ̃́ia.
1.
Adamu, Sɛti, Ɛnↄsi, 
Kena, Maalalee, Yɛlɛdi, 
Ɛnↄki, Mɛtusela, Lemɛki, 
Nↄee ń a nɛgↄ̃ɛↄ Sɛũ ń Haũo ń Yafɛtio. 
Yafɛti nɛgↄ̃ɛↄ tↄ́n kɛ: Gomɛɛ, Magↄgu, Mɛdɛ, Gɛlɛsi, Tubali, Mɛsɛki ń Tilasio. 
Gomɛɛ nɛgↄ̃ɛↄ tↄ́n kɛ: Asɛnazi, Lifa ń Tↄgaamao. 
Gɛlɛsi nɛgↄ̃ɛↄ tↄ́n kɛ: Ɛlisa, Taasisi, Sipi ń Lodanio. 
Haũ nɛgↄ̃ɛↄ tↄ́n kɛ: Etiopi, Egipi, Libii ń Kanaao. 
Etiopi nɛgↄ̃ɛↄ tↄ́n kɛ: Saba, Avila, Sabata, Laama ń Sabatɛkao. Laama nɛgↄ̃ɛↄn Seba ń Dedão ũ. 
Niũlodiá Etiopi buiɛ lↄ. Ɔ̃mɛ dṹnia nɛgↄ̃n tↄde sɛ̃́ia ũ. 
Egipi buiↄ tↄ́n kɛ: Ludiↄ, Anaũↄ, Lɛabaↄ, Nafɛtuↄ, 
Patusiↄ, Kasuluↄ ń Kɛlɛti pↄ́ Filitɛ̃ↄ bↄ̀ ń guuↄ. 
Kanaa nɛgↄ̃ɛ sɛ̃́ian Sidↄ̃ ũ. Aà bui kĩniↄn kɛ: Iti buiↄ, 
Yebusi buiↄ, Amↄle buiↄ, Giigasi buiↄ, 
Ivi buiↄ, Aaka buiↄ, Sini buiↄ, 
Aavadi buiↄ, Zɛmali buiↄ ń Amata buiↄ. 
Sɛũ nɛgↄ̃ɛↄ tↄ́n kɛ: Elaũ, Asili, Aapasa, Ludi ń Alaũo. Alaũ nɛgↄ̃ɛↄ tↄ́n kɛ: Uzu, Hulu, Getɛɛ ń Mɛsɛkio. 
Aapasa mɛ́ Sela ì, ↄ̃ Sela Ɛbɛlu ì. 
Ɛbɛlupi nɛgↄ̃ɛ ì plaɛ. Ado tↄ́n Pɛlɛgi, asa aà gↄↄ ↄ̃ wà kɛ̃̀kↄ̃wa dṹniau. Aà dãuna tↄ́n Yotã. 
Yotãpi buiↄ tↄ́n kɛ: Alɛmↄda, Sɛlɛfi, Azemavɛ, Yela, 
Adolaũ, Uzali, Dikala, 
Obali, Abimaɛ, Seba, 
Ofii, Avila ń Yobabao. Yotã buiↄn we píi. 
Sɛũ, Aapasa, Sela, 
Ɛbɛlu, Pɛlɛgi, Leu, 
Selugi, Nakↄↄ, Tela 
ń Ablaũ pↄ́ wì mɛ lↄ Ablahaũo. 
Ablahaũ nɛgↄ̃ɛↄ tↄ́n kɛ: Izaaki ń Isimaɛlao. 
An buiↄ tↄ́n kɛ: Isimaɛla nɛgↄ̃ɛ sɛ̃́ian Nɛbai ũ. A gbɛa Kedaa, Adibɛɛli, Mibisã, 
Misima, Duma, Masa, Adada, Tema, 
Yetuu, Nafisi ń Kedemao. Isimaɛla nɛgↄ̃ɛↄn we. 
Ablahaũ nↄ Kɛtula pↄ́ i mɛ́sɛdilɛɛ̀o nɛgↄ̃ɛↄ tↄ́n kɛ: Zimana, Yosã, Mɛdã, Madiã, Isebaki ń Suao. Yosã nɛgↄ̃ɛↄn Seba ń Dedão ũ. 
Madiã nɛgↄ̃ɛↄ tↄ́n kɛ: Efa, Efɛɛ, Anↄki, Abida ń Ɛlɛdaao. Kɛtulapi buiↄn we ḿpii. 
Ablahaũ nɛ́ Izaaki nɛgↄ̃ɛↄn Esau ń Yakↄbuo ũ. 
Esau nɛgↄ̃ɛↄ tↄ́n kɛ: Ɛlifaza, Leuɛli, Yeusi, Yalaũ ń Kolao. 
Ɛlifaza nɛgↄ̃ɛↄ tↄ́n kɛ: Temani, Omaa, Zefo, Gataũ, Kenazi ń Amalɛki pↄ́ a ì ń Timinao. 
Leuɛli nɛgↄ̃ɛↄ tↄ́n kɛ: Naata, Zela, Sãma ń Mizao. 
Sei nɛgↄ̃ɛↄ tↄ́n kɛ: Lotani, Sobala, Zibɛↄ̃, Ana, Disↄ̃, Ezɛɛ ń Disão. 
Lotani nɛgↄ̃ɛↄn Oli ń Omaũo ũ. Lotani dãen Timina ũ. 
Sobala nɛgↄ̃ɛↄ tↄ́n kɛ: Alavã, Manaata, Ebali, Sefo ń Onaũo. Zibɛↄ̃ nɛgↄ̃ɛↄn Aya ń Anao ũ. 
Ana nɛ́n Disↄ̃ ũ. Disↄ̃ nɛgↄ̃ɛↄ tↄ́n kɛ: Ɛmadã, Ɛsebã, Ilana ń Kelanao. 
Ezɛɛ nɛgↄ̃ɛↄ tↄ́n kɛ: Bilana, Zaavã ń Akanao. Disã nɛgↄ̃ɛↄn Uzu ń Alanao ũ. 
Kía pↄ́ aa kpalablè Ɛdↄũ bùsuu Isaili kíaↄ ãaↄ tↄ́n kɛ: Bɛↄↄ nɛ́ Bɛla, Dinaba gbɛ̃́ɛ. 
Kɛ́ Bɛla gà, ↄ̃ Bↄzɛla gbɛ̃́ Zela nɛ́ Yobaba zↄ̃̀lɛ aà gbɛu, 
Kɛ́ Yobaba gà, ↄ̃ Temani bùsu gbɛ̃́ Usaũ zↄ̃̀lɛ aà gbɛu. 
Kɛ́ Usaũ gà, ↄ̃ Aviti gbɛ̃́ Bedada nɛ́ Adada zↄ̃̀lɛ aà gbɛu. Ɔ̃mɛ zĩblè Madiãↄwa Mↄabu bùsuu. 
Kɛ́ Adada gà, ↄ̃ Maseleka gbɛ̃́ Samala zↄ̃̀lɛ aà gbɛu. 
Kɛ́ Samala gà, ↄ̃ Leobo pↄ́ kú Uflata saɛ gbɛ̃́ Saulu zↄ̃̀lɛ aà gbɛu. 
Kɛ́ Saulu gà, ↄ̃ Akaboo nɛ́ Baalanana zↄ̃̀lɛ aà gbɛu. 
Kɛ́ Baalanana gà, ↄ̃ Pau gbɛ̃́ Adada zↄ̃̀lɛ aà gbɛu. Aà na tↄ́n Mɛtabɛli, Malɛdi nɛ́ɛ, Mɛzaaba tↄũnaɛ. 
Adadapi gà sↄ̃. Ɛdↄũ bui dezi káauↄn kɛ: Timina, Alava, Yɛtɛti, 
Ɔhↄlibama, Ela, Pinↄ, 
Kenazi, Temani, Mibizaa, 
Magadiɛ ń Ilaũo. Ɛdↄũ bui dezi káauↄn we. 
