﻿Soũↄ.
102.
Wɛ̃nade yɛ̃̀ɛɛsaide pↄ́ lɛ́ a yã'ↄ̃maↄ bↄlɛ Diiɛ wabikɛa. 
Dii, ma wabikɛa ma, to ma wiilɛama ká. 
Ńsu bↄ ma kpɛ ma taasikɛgↄↄo, swã́kpamazi. Tó ma lɛzùnzi, wea kpakpa, 
asa ma gↄↄ lɛ́ gɛ̃ lán súɛlɛwaɛ, ma mɛ lɛ́ pusu bↄ lán tɛyↄ̃wa. 
Ma sↄ̃ lɛ́ wo, málɛ ibaba lán sɛ̃wa, blɛblea yã́ lí dↄmagu mà bleo. 
Ma aaukɛa mɛ́ tò ma gↄ̃ wákambaau ũ. 
Ma gↄ̃ lán gbáa gbaonawa, lán bɛzia koowa. 
I lí gɛ̃ ma wɛ́uo lán bã mɛ̀ndona pↄ́ pɛ́ kpɛ́ musuwa. 
Ma ibɛɛↄ ìↄ ma sↄ̃sↄ̃ gↄↄpiiɛ, ma láanikɛnaↄ ì gbɛ̃́ ká ń ma tↄ́o. 
Túfu mi ble blɛ ũ, ma wɛ́'i ì ka ma imia guu 
n pↄkũma ń n kpɛ̃nɛo yã́i, asa n ma sɛ n ma pãlɛɛ. 
Ma wɛ̃ni lɛ́ gɛ̃zɛa lán uenawa, ↄ̃ málɛ giigaga lán sɛ̃wa. 
Mpi Dii, ń zↄ̃lɛa báawa gↄↄpii, ńyↄ̃ↄ dɛ tↄde ũɛ e wá buiwa. 
Ńyↄ̃ fɛlɛ wɛ̃nadↄ̃ Siↄnaɛ, asa n sùuukɛaaànↄ gↄↄ kà sa. 
Aà gbɛↄ kɛ̀ n zↄ̀blenaↄnɛ maa, aà daaĩa ìↄ kɛwɛ̃ɛ wɛ̃naɛ. 
Bui píi a vĩakɛnɛ, Dii, dṹnia kíaↄ gawi dↄ̃nɛ ḿpii. 
Asa Dii a ɛa Siↄna kálɛ lↄ, i bↄ mↄ́má we ń gawio. 
A gbɛ̃́ pↄ́ gↄ̃̀ yↄ́ↄyↄↄↄ wabikɛa sí, a ń wiilɛawa kpa swã́ao. 
Wa yã́pi kɛ̃ ziadeↄ yã́iɛ, gbɛ̃́ pↄ́ kuopiↄ i Dii táasilɛ. 
Dii wɛkpàlɛ zĩ́lɛ za a kúkĩi, kua za musu à wɛzù tↄↄlɛ, 
kɛ́ à e gbɛ̃́ↄ zↄblewii ma, i ń bↄ ga lɛ́zĩ yã́i, 
wi Dii tↄbↄ Siↄna, wi aà táasilɛ Yelusalɛũ. 
Gↄↄ bee bùsu píi gbɛ̃́ↄ kãaa we, bùsu píi gbɛ̃́ↄ mↄ misiilɛiɛ̀. 
Kua ma sápaagↄↄ à ma busa, à ma wɛ̃ni kulun kṹ. 
Ɔ̃ ma mɛ̀: Ma Lua, ńsu ma sɛ kpóoo, n gbɛ̃́ bee, n wɛ̃ni láaa vĩo. 
N tↄↄlɛ kàlɛ za asĩnizĩ, musuá n ↄzĩkɛaɛ. 
Ampii a gɛ̃, ãma ńyↄ̃ↄ kuɛ. Aa zikũ lán pↄkasawa píiɛ, ńyↄ̃ ń lilɛ lán ulawa aa gɛ̃lɛ. 
Mpi sↄ̃ ńyↄ̃ↄ doũ gↄↄpiiɛ, n gↄↄ láaa vĩo. 
N zↄ̀blenaↄ nɛ́ↄ zɛdↄ, an buiↄ aaↄ ku n aɛ. 
