﻿Isaia.
13.
Yã́ pↄ́ Amↄzu nɛ́ Isaia è Babɛli musun kɛ: 
À gilili pɛ́lɛ sĩ̀sĩ wáiwai musu, à kúkua dↄmá à ↄkɛnɛ́ aa si Wɛ̃́ɛↄ bↄlɛↄu. 
Ma yãdìlɛ ma gbɛ̃́ↄnɛ, ma a gↄ̃sapiↄ sìsi aa mↄ gɛ pↄkũmabↄbↄmámɛɛ, ↄ̃ aalɛ pↄnakɛ ń ma tidↄańlao. 
Kↄ̃fĩ lòo gbɛ̀sĩsĩↄ musu lán bíla kↄ̃fĩwa, zↄa dↄ buipãleↄ guu lán bui dasiↄ kãaaawa. Dii Zĩgↄ̃de mɛ́ lɛ́ a zĩgↄ̃ↄ kãaa. 
Aa bↄ̀ bùsu zã̀zãↄu za dṹnia lɛ́wa, Dii ń gbɛ̃́ pↄ́ aaì pↄkũmabↄbↄmáɛpiↄ lɛ́ mↄ́ dṹnia kɛi kɛ́lɛkɛlɛ píi. 
À búbuapɛ, asa Dii gↄↄ kãikũ̀ɛ, Gbãapiide mɛ́ a ń kaalɛ. 
A yã́i baade ↄ a gↄ̃ dↄ̀lↄlↄ, sↄ̃ a kɛ̃ gbɛ̃́piigu. 
Gili a gɛ̃ńgu, wãwã ń gu'ↄ̃amáo a tↄ̃́má. Aaↄ pelembo lán nɛ'inawa, yã́ a dimá, an wɛ́ i tã, aaiↄ kↄ̃ gwa. 
Gwa! Dii yã́kpalɛkɛgↄↄ lɛ́ mↄ́, aↄ pãsĩ, pↄbↄnniu ń fɛ̃́nkpaao aↄ ku, a dṹnia kɛ kɛ́lɛkɛlɛ, i duunkɛnaↄ dɛdɛu. 
Saan tↄdeↄ ń a kĩniↄ ikɛ lↄo, ĩatɛ̃ a siakũ za a bilɛkĩi, mↄvua a gupu lↄo. 
Má ĩada dṹniawa a vãikɛa yã́i, má gotↄ̃ duunkɛnaↄwa ń tàaeↄ yã́iɛ, má waladeↄ yↄ̃̀ↄkɛa midɛ, má gbɛ̃́ pãsĩↄ ĩ́andãa kpálɛ. 
Má tó gbɛ̃nazĩnaↄ gↄ̃ kálaũkalaũ lán vua tɛ̃ɛtɛ̃ɛwa, gbɛ̃nazĩnaↄ gↄ̃ kásakasa lán Ofii vuawa. 
A yã́i tò ma Dii Zĩgↄ̃de má musu dee ma pↄkũma yã́i, tↄↄlɛ i lualua za a zĩ́nau ma pↄpaa zↄ̃ↄ gↄↄ. 
Baade a ta a gbɛ̃́ↄ guu lán tue pↄ́ wàlɛ wɛwa, gbɛ̃́pii a bàalɛ ta a bùsuu lán sã pↄ́ dãna vĩoↄwa. 
Wa gbɛ̃́ pↄ́ wà kpàaũńnↄↄ zↄ̃, wa gbɛ̃́ pↄ́ wà ń kṹↄ dɛdɛ ń fɛ̃ndao. 
Wa ń nɛ́ↄ wíwi ń wáa, wa ń kpɛ́ↄ yↄɛ, wi kɛ ń naↄnɛ ń gbãao. 
Gwa! Má Mɛdɛↄ sóikɛmá. An laai ku ã́nusuwao, an bàa aↄ kú ń vuaoo. 
Aa ɛ̀waasoↄ dɛdɛ ń kao, aa nɛ́tɛ̃naↄ wɛ̃na boo, aa nɛ́ↄ sósobi vĩo. 
Babɛliá kpalaↄ mideɛ, Kaladeↄ ĩ́andãbↄ gawideɛ. Ń beeo wa a suumpaɛ lán Sↄdↄũ ń Gↄmↄↄo suumpaawa. 
Aↄ da bɛzia ũ gↄↄpiiɛ, waↄ ku we bau lↄo. Laalubue a bòokpa weo, pↄdãnae a i weo. 
Gbáa nↄ̀bↄↄ mɛ́ aaↄ kálɛa we, a kpɛ́ↄ gↄ̃ gbɛ̃gbonaↄ tòo ũɛ. Koohũhũnaↄ zↄ̃zↄ̃ we, tã́aↄ i kìlimpau. 
Maiↄ wiilɛ a bĩ́iↄ sↄ̀ↄu, gbɛ̃gbonaↄ gbokɛ a namablekĩiↄu. A gↄↄ kãikũ̀, a gↄↄ ga lↄo. 
