﻿Isaia.
32.
Gwa! Kíae a kpalable ń yã́zɛdeo, aà ìwaↄ kible a zɛ́wa. 
An baade aↄ dɛ ulɛkĩi ũ zàa'ĩanaɛ, aↄ dɛ mikpakĩi ũ lou zã́, aↄ dɛ swa ide ũ gbáau, aↄ dɛ gbɛsi zↄ̃ↄ uede ũ gugiiu. 
Wɛbiibiinaↄ wɛ́ a kɛ̃ sa, swãkpanaↄ yãma. 
Nↄnwãadeↄ ↄ̃nↄkũ aa yã́ dↄ̃, bebedeↄ yã'o sa káukau iwesasai. 
Wa mɛ sↄũɛ bɛɛɛde lↄo, wa mɛ kↄ̃nideɛ gbɛ̃maa lↄo. 
Asa sↄũ ì yãfaasai o, aà làasoo ìↄ ku yãvãiwa. Ìli zĩkɛ Lua yã́wao, ì Dii seela bɛ̃̀ɛ kɛnɛ́. Ì nↄandɛnaↄ to gii, ì imidɛnaↄ to isai. 
Kↄ̃nide yãkɛaↄ vãi, ì vãikpaaĩ ń taasideↄ à ń ↄ̃̀ↄkpa ń mↄafilio, i wɛ̃nadepiↄ yã́ málɛnɛ́. 
Bɛɛɛde ì yã́zɛde yá, yã́ bɛɛɛde ↄ̃ ì zɛò. 
Á nↄɛ namablenaↄ, à fɛlɛ swãdↄmazi, á nↄɛ pↄ́ á kú niɛniɛↄ, à ma yãma. 
Á nↄɛ pↄ́ á kú niɛniɛↄ á gↄ̃ ń bílio zii maa'i, asa vɛ̃ɛkↄzↄ̃zↄ̃a aↄ kuo, ésekɛkɛa a kɛo. 
Á nↄɛ pↄ́ álɛ namableↄ, à lualua ń sↄ̃̀deedeeo. Á nↄɛ pↄ́ á kú niɛniɛↄ, à kpakpanaga. À á pↄ́ↄ wolowá píi, í zwã̀nkasaↄ dↄ á pi. 
À ázĩa gbɛ̃gbɛ̃, í búbuapɛ á bua maaↄ ń á vɛ̃ɛ nɛ'inaↄ yã́i. 
À ↄ́ↄlↄ ma gbɛ̃́ↄ bùsu yã́i, asa lɛaa ń lɛsikaoo bↄ̀lɛu. À ↄ́ↄlↄ á ua pↄnadeↄ ń á wɛ̃́lɛ naɛ beeo yã́i. 
Kibɛ a gↄ̃ da pã, wɛ̃́lɛ súude a gↄ̃ bɛzia ũ. A sĩ̀sĩ gudↄ̃akĩi aↄ da wáiwai gↄↄpii zàa'ĩnaↄ pↄnakɛkĩi ũɛ, pↄ́ↄ dã́dãkɛkĩi ũ, 
e Lua àↄ gɛ́ a Nisĩna pisiiwá bↄa za musu, gbáa i gbasa gↄ̃ gutaaede ũ, gutaaede sↄ̃ dào ũ. 
Yã́zɛde a kible gbáapiu, maakɛa aↄ ku gutaaedepiu. 
Yã́zɛdepi a aafia inɛ́, maakɛa gbɛ aↄ dɛ kua dↄdↄa ń sↄ̃daadoũo ũ gↄↄpii. 
Ma gbɛ̃́ↄ aaↄ ku ua aafiadeu, an bɛ aↄ niɛ, aa kã́mabou nama guu. 
Baa tó lougbɛ likpɛ ↄ̃̀ↄkpà, mɛ́ wà wɛ̃́lɛ dɛɛlɛmpà wa dàaĩ, 
áↄ dɛ pↄnadeↄ ũ, áↄ pↄtↄ̃tↄ̃ swa píi saɛ, á zuↄ ń á zàa'ĩnaↄ dɛ̀ɛpookĩi e. 
