﻿Isaia.
50.
Ma Dii ma mɛ̀, kɛ́ a mɛ̀ ma á da yà, aà gínzila kú má ni? Ma fĩade kpele ma á yíawài? Aawo! Á duuna yã́i ma á yiai, á tàaeↄ yã́i ma á da yài. 
Kɛ́ ma mↄ, bↄ́yãi mi gbɛ̃e eo ni? Kɛ́ ma lɛzùázi, àkɛa á gbɛ̃e i weao ni? Ma ↄ kɛ̀ geseũ a fↄ̃ á bↄo yã̀? Má gbãa vĩ mà á bo noa? Ma ísia lèle, ↄ̃ gugii bↄ̀, má tò swa gↄ̃̀ lán gbáawa. A kpↄↄ gàga isai yã́i, ↄ̃ aa yaikɛ̀ kɛ́ í kuo yã́i. 
Mi to gu si gbɛ̃́ↄnɛ, mi zwã̀a sia da musuɛ. 
Dii Lua ma gba lɛ́ mà yãdaonɛ́ mà yã́ pↄ́ ì gbɛ̃́ pↄ́ bùsaↄ gba sↄ̃ o. Ìↄ ma vu lá gu lɛ́ dↄ, ì ma swã́ nakṹ, kɛ́ mà yãma lán yãdadana pↄ́wa. 
Dii Lua ma swã́ wɛ̃̀, mi zazakũo, mi pↄ̀ↄbↄzãkɛo. 
Ma a kpɛ tò lia gbɛ̃́ pↄ́ aalɛ ma gbɛ̃́ↄnɛ, ma a gɛɛ tò dↄa gbɛ̃́ pↄ́ aalɛ a kã́ woloↄnɛ. Kɛ́ aalɛ ma sↄ̃sↄ̃, aalɛ lɛ́'ikákaa, mi a wɛ́ ga ma sↄ̃òo. 
Ma gɛɛ a gↄ̃ kpa ma wɛ́io, kɛ́ Dii Lua lɛ́ dↄmalɛ yã́i. A yã́i ma aɛ dↄ súsu lán gbɛsiwa, má dↄ̃ kɛ́ wí a ma kũo. 
Lua ma yãnakpamade kumanↄ kãi. Démɛ a bↄbↄmanↄi? Wà aɛdↄkↄ̃wa! Démɛ ma káalakɛna ũi? Aà sↄ̃ kãi! 
Dii Lua mɛ́ ì dↄmalɛ, démɛ a fↄ̃ yãdamalai? Ampii aa kɛ yáiyai lán pↄkasawa, kↄ̀ↄↄ mɛ́ a ń sóso. 
Á démɛ Dii vĩa vĩ ì aà zↄ̀blena yãmai? Tó a bɛ gusiau filia í sai, aà Dii náaikɛ, i sↄ̃kpalɛ a Luazi. 
À ma, á gbɛ̃́ pↄ́ i tɛ́ka ázĩaɛ i sɛ̃̀ tɛ́ dↄↄ, à gɛ àↄ bɛ á tɛ́pi vuai ge sɛ̃ pↄ́ a tɛsↄ̃̀wà gupuai. Yã́ pↄ́ a bↄ ma ↄzĩ à á len kɛ: Áↄ wúlɛa gu wãwãdeu! 
