﻿Isaia.
51.
Ma Dii ma mɛ̀ à ma yãma yã́zɛdeyanaↄ, á gbɛ̃́ pↄ́ álɛ ma kĩ́i wɛɛlɛↄ! À wɛ́pɛ gbɛsi pↄ́ wà á bↄ́ a guuwa, à gu gbɛde pↄ́ wà á yↄ̃́u yãda. 
À làasookɛ á dezi Ablahaũ yã́wa ń aà na Sala pↄ́ á bui kɛ̀o, asa gↄↄ pↄ́ ma aà sìsi, a nɛ́ vĩo, ↄ̃ ma báaadàaàgu, má tò à kpàsa kàlɛ. 
Màa ma Dii, má Siↄna nↄ̀sɛ níniɛ̀, má wɛ̃nakɛɛ̀ a gbooa yã́ musu. Má aà gbáaↄ lilɛ lán Edɛniwa, aà gugbaigbaiↄ gↄ̃ lán ma swaluwa. Pↄna ń yaalↄo aↄ ku a guu, sáaukpaa ń lɛtɛ̃o aↄ dↄu. 
Ma gbɛ̃́ↄ, à laaidↄ ma yã́wa, ma kpàsa, à swã́kpa ma yã́i, asa yã́zɛde a bↄ ma kĩ́iɛ, ma ikoyã aↄ dɛ buiↄ gupua ũ. 
A gɛ̃gɛ̃o má tó yã́ bↄ ń gbɛ̃́ↄ na, ma gbɛ̃́ suabaa ye kái. Má yã́gↄ̃gↄ̃ buiↄnɛ a zɛ́wa, ísiabaadeↄ i sↄ̃́amazi, an wɛ́ dↄi mà ń suaba. 
À wɛ́sɛ luabɛ gwa, í zĩ́lɛ gwa lↄ, asa luabɛ a gɛ̃zɛa lán súɛlɛwa, dṹnia a kɛ yáiyai lán pↄkasawa. A gbɛ̃́ↄ gaga lán kↄ̀ↄtɛ̃ↄwa, ãma gbɛ̃́ pↄ́ ma ń suabàↄ aaↄ ku gↄↄpiiɛ, ma toa yã́ bↄańnↄ na gbooa vĩ bauo. 
À ma yãma yã́zɛdedↄ̃naↄ, á gbɛ̃́ pↄ́ á ma yãdanɛ kũa á sↄ̃uↄ! Ásu vĩakɛ sↄ̃́sↄ̃aɛo, ásu to gbɛ̃́ↄ á tↄbɛ̃ɛsia diwáo. 
Kↄ̀ↄↄ ń sóso lán pↄkasawa, blɛ́ↄ ń ble lán ulawa, ãma ma toa yã́ bↄańnↄ na láaa vĩo, gbɛ̃́ pↄ́ ma ń suabàpiↄ aaↄ ku gↄↄpiiɛ. 
Vu iu, vu iu Dii, fɛlɛ ń n gã̀sa gbãao. Vu iu lá ń kɛ̀ yãadeↄ gↄↄwa. Ḿmɛ n kwãsa zↄ̃̀ɛzↄ̃ɛo lò? N dalagↄ̃ↄpi zↄ̃̀. 
Ḿmɛ n gugii bↄ̀ ísiauo lò? Ísi zↄ̃ↄ í pi! N zɛbↄ̀ ísia lutuũnau gbɛ̃́ pↄ́ n ń bↄ́ↄnɛ aa bùau. 
Gbɛ̃́ pↄ́ Dii ń bóↄ ɛa su Siↄna ń kúkuakɛao. Pↄna láasai aↄ kú ń musu, pↄna ń yaalↄo a gɛ̃ńzi, pↄsia ń wɛ̃nao a gɛ̃zɛa. 
Ma Dii, mámɛ má á nↄ̀sɛninina ũ. Àkɛa álɛ vĩakɛ gbɛ̃nazĩmmikãdↄɛ pↄ́ a wɛ̃ni dɛ koaoɛi? 
Mapi á Kɛna ma musu kpàlɛ, ma dṹnia zĩ́napɛ̀lɛ, ↄ̃ ma yã́ sã̀água? Bↄ́yãi iↄ ku gili guu lá gu lɛ́ dↄ gbɛ̃wɛtãna pↄ́ zɛ̀ ń á midɛao pↄfɛ̃ yã́ii? Gbɛ̃wɛtãnapi pↄkũma tↄ́n lai? 
Gbɛ̃́ pↄ́ an kↄ̃́ↄ bↄ̀ↄ gↄ̃ ńzĩaɛ tia, aa ga ń gbãauo, pↄblea a kɛ̃́sãmá lↄo. 
Ma Dii á Lua mi ísia í fɛlɛ, a ikooaↄ kↄ̃fĩkɛ. Ma tↄ́n Dii Zĩgↄ̃de! 
Ma a yã́ↄ sòso má kàɛ́ á lɛ́u, ma ↄkùála ma á dↄ̃́a. Ma musu kpàlɛ, ma dṹnia zĩ́napɛ̀lɛ, ↄ̃ má ò Siↄnadeↄnɛ aa dɛ ma gbɛ̃́ↄ ũ. 
Vu iu, vu iu! Yelusalɛũ fɛlɛ zɛ! N pↄkũma toona pↄ́ na Dii ↄzĩ í mì, n aà kɛɛona pↄ́ ì ń kɛ tàlaatalaa í lɛ̀u ń a gbↄ̃o. 
Nɛ́ pↄ́ wà ń í n guuↄ kee i fↄ̃ zɛmikũ̀nɛo, nɛ́ pↄ́ wà ń gwá n guuↄ kee i e dↄ̀ n ↄwao. 
Músi mɛ̀n plaɛ beeↄ gɛ̃̀nzi: Wà n gboo n gↄ̃ bɛzia ũ, mɛ́ imina ń fɛ̃ndao n gbɛ̃́ↄ dɛ̀dɛ. Démɛ fↄ̃ ↄ́ↄlↄnɛi? Démɛ fↄ̃ n nↄ̀sɛ níninɛi? 
Yɛ̃̀ɛɛsai n gbɛ̃́ↄ nɛ̀, aa kálɛa n zɛ́kpaaↄu píi. Aa gↄ̃̀ yeelɛa lán kpòo gbↄwa. Dii pↄkũma tↄ̃̀má, n Lua ń wɛtã̀. 
A yã́i ma yãma sa wɛ̃́lɛ wɛ̃nade! Í zↄ̃̀lɛma, i kɛ vɛ̃ɛ no. 
Má Dii n Lua, mi zɛ ń ma gbɛ̃́ↄ. Ma mɛ̀ má a pↄkũma toona bↄ n ↄzĩ, ńyↄ̃ kɛɛona pↄ́ ì ń kɛ tàlaatalaa í mi bau lↄo. 
Má kpa n ĩadamadeↄwaɛ. Aa ònɛ yãa ǹ wúlɛ wà táa'oma, ↄ̃ n kɛ bùsu ũ, aa táa'ò n kpɛsɛa lán tↄↄlɛwa. 
