﻿Ozee.
14.
Samalideↄ tàae a wi ń musuɛ, asa aa bↄ̀ ń Lua kpɛɛ. Wa ń kwɛ́ ń fɛ̃ndaoɛ, wi ń nɛ́ↄ wíwi, wi ń nↄsindeeↄ puipui. 
Á Isailiↄ, à su Dii á Luawa, á yãvãiↄ mɛ́ tò a kpagua. 
À su Diiwa, í yãsiuɛ̀ à oɛ̀: Wá yãvãiↄ kɛ̃́wá, gbãakpawázi, wí n sáaukpa. 
Asiliↄ fↄ̃ wá bↄo, wá di ń sↄ̃́ↄ kpɛ lↄo. Tã́a pↄ́ wa ń píↄ wá ń sísi wá diiↄ ũ lↄo, asa ḿmɛ ni tonɛ pↄ́ gwana vĩoↄ wɛgwa. 
Ma Dii ma mɛ̀: Má ń gbã́gbã ń ń pↄ̀ↄbↄzãkɛgyão, ma yeańzi a kɛ zài, asa ma pↄ wèemá. 
Máↄ dɛ Isailiↄnɛ mↄ̀sɛ ũ, aaiↄ vukɛ, aai zĩ́napɛlɛ lán Libã bùsu líwa. 
Aa bↄlↄbↄ, aaiↄ gawi vĩ lán kuliwa, an gĩ iↄ na lán sɛdɛ líwa. 
Aa bɛkpa ma uei, aai bↄlɛ lán pↄ́wɛnawa. Aa vukɛ lán vɛ̃ɛliwa, aai tↄbↄ lán Libã bùsu vɛ̃ɛwa. 
Bↄ́ Ɛflaiũ buiↄ kɛ ń tã́aↄ lↄi? Mámɛ má ń wabikɛa sí, míↄ wɛ́tɛńzi. Má dɛ lán pɛ̃li pↄ́ a lá sisiawaɛ, an kã́fĩa a bↄ ma kĩ́iɛ. 
Démɛ ↄ̃nↄ vĩi? Aà làasookɛ yã́piwa. Démɛ làasoo vĩi? Aàↄ yã́pi gbadↄ̃. Asa Dii yãkɛaↄ maa, gbɛ̃maaↄ ìↄ tɛi. Aà yãmansaiↄ sↄ̃ aaì pãalɛɛ̀.
