﻿Mise.
6.
À swã́kpa yã́ pↄ́ Dii òi! À mɛ̀ mà fɛlɛ zɛ, mà bↄ ń yã́o gbɛ̀sĩsĩↄ wáa, mà to sĩ̀sĩↄ ma lↄↄ ma. 
Gbɛ̀sĩsĩↄ, à yã́ pↄ́ Dii lɛ́ bↄo ma! Dṹnia zĩ́na pↄ́ ìↄ ku gↄↄpiiↄ à swã́kpa! Asa Dii lɛ́ bↄbↄ ń a gbɛ̃́ↄɛ, a yãvĩ ń Isailiↄ. 
Ma gbɛ̃́ↄ, bↄ́ má kɛ̀ɛ́i? Bↄ́ má kɛ̀ a kpasamanↄi? À omɛɛ! 
Ma á bↄ́lɛ Egipi, ma á bↄ́ zↄbleu, Ma Mↄizi zĩ̀ à dↄ̀aaɛ́ ń Aalonao ń Miliaũo. 
Vãi pↄ́ Mↄabuↄ kí Balaki dìlɛ à kɛɛ́ ń yã́ pↄ́ Bɛↄↄ nɛ́ Balaaũ wèwào, à to à dↄágu ma gbɛ̃́ↄ. Ma dↄaaɛ́ sɛa za Sitiũ e a gɛ ka Giligali, kɛ́ à e ma maakɛaↄ dↄ̃. 
Bↄ́ má gɛ zɛò Dii aɛi? Bↄ́ má kúlɛò Lua Musudeɛi? Má gɛ zɛ aà aɛ ń gáae wɛ̃donao yã̀? Má sa pↄ́ wì a pↄ́ kátɛu à tɛ́kũ oowà yã̀? 
A sãsa mɛ̀n ↄ̀aa sↄo si yã̀, ge nísi ta mɛ̀n ↄ̀aasↄsↄo lɛɛ kwi? Má a nɛgↄ̃ɛ sɛ̃́ia kpá ma tàae fĩabobↄ ũ yã̀? Má nɛ́ pↄ́ bↄ̀ ma plɛu kpa ma duuna awakpabↄ ũ yã̀? 
Gbɛ̃nazĩna, wà yã́ pↄ́ maa ònɛ. Yã́ kpele Dii lɛ́ gbɛamai? Yãkɛ a zɛ́wa, níↄ ye gbɛ̃kɛkɛai. Ǹ nzĩa busa, ní tɛ́ Luazi. 
À Dii lↄↄ ma dↄ, àlɛ lɛzu mɛɛwiadeↄzi. Vĩakɛa Diiɛ mɛ́ ↄ̃nↄ ũ. À go pↄ́ a á gbɛ̃ gwa, í Lua pↄ́ dìlɛ yãma. 
Ɔvãi ku vãikɛnaↄ ua e tia ń zaa mↄafilide pↄ́ dɛ láaipↄ ũo. 
Gbɛ̃́ pↄ́ kiloo gbɛ̃blebↄ vĩ a gbiayↄ̃bↄ vãiↄ kũa, má aà bↄ maa nɛe? 
Mɛɛwiaɛ bee ↄdeↄ pãsĩ maamaaɛ, mɛ́ a gbɛ̃́ kĩniↄ ì ɛɛtoto, mↄafiliyã mɛ́ kú ń lɛ́u. 
Ayãmɛto ma na á dɛdɛawa, málɛ á ásookɛ á duuna yã́i. 
Á pↄble, kási á kã́o, á nↄ̀sɛ a gↄ̃ da giiɛ. Á pↄ́ dilɛ kũ̀sũa ũ, a gↄↄplakɛo, asa má á kũ̀sũapi kpa zĩ̀blenaↄwaɛ. 
Á pↄ́tↄ̃, kási á kɛkɛo. Á nísi kɛ, kási á a mↄaokɛo. Á vɛ̃ɛ dafu kɛ, kási á a imio. 
Á Ɔmɛli yã'onɛ kũa ń Ahabu bɛdeↄ yãkɛaↄ píi, a ń ↄlɛsɛ̀. A yã́i tò má á dúuzↄ̃, mí tó wà á mɛɛwiadeↄ láanikɛ, í gↄ̃ bui píiɛ gbɛ̃́ sↄ̃́sↄ̃bↄ ũ. 
