﻿Abaku.
3.
Ãnabi Abaku wabikɛa. 
Dii, ma n bao mà, Dii, n yãkɛaↄ tò má n vĩa vĩ. Ɛa yã́ bee taaↄ kɛ wá gↄↄ, ní tó wà dↄ̃ wá gↄↄ. Tó wá wɛgwaa dↄngu n pↄkũmagↄↄ. 
Lua a bↄ Temani, Kuaadoade a bↄ Palana gbɛ̀sĩsĩ musu. Aà gawi a kúlɛ luabɛa, aà táasilɛa a dṹnia pa. 
Aà tɛkɛa aↄ dɛ lán ĩatɛ̃ bilɛawa, gupua a pípi aà gbã̀tɛ̃ɛ ń gbã̀tɛ̃ɛo, we aà gbãa ulɛau. 
Gagyã bɛ aà aɛ, tɛ́lɛpiↄ bɛ aà iau. 
Tó à zɛ̀, dṹnia ì zãampapa, tó à wɛtɛ̀i, buiↄ ì kɛ gã̀sĩ. Gbɛ̀sĩsĩ ziↄ kwɛ̀, sĩ̀sĩ pↄ́ kú za káauↄ gbòo. Ì yãkɛ lá a kɛ̀ káaukaauwa. 
Ma Kusã zwã̀akpɛↄ è, wàlɛ taasikɛu, ma Madiã bùsu zwã̀akpɛↄ è, gili gɛ̃̀ńgu we. 
Dii, n pↄ pà swaↄzi yã̀? N za fɛ̃̀ swa'ↄnaↄzi nɛe? Kɛ́ ń di n sↄ̃́ↄ kpɛ ń n zĩblesↄ̃goↄ, n mɛ fɛ̃̀ ísiazi yã̀? 
N n sá bↄ̀ a bↄ̀ↄu, n mɛ̀ wà mↄ́ ń kaↄ, ↄ̃ n dṹnia pàapaa ń swaↄ. 
Gbɛ̀sĩsĩↄ n e, aalɛ kↄ̃dɛ, í dàgua, àlɛ gɛ̃, ísi kↄ̃fĩ dↄ, a ikooaↄ lɛ́ fɛlɛ musu. 
Ĩatɛ̃ ń mↄvuao zɛ̀ gudoũ musumusu n ka pↄ́ lɛ́ gɛ̃ fìoo tɛkɛa yã́i ń n sↄ̃na pípia yã́o. 
Ńlɛ tavaavaa'o dṹniau ń pↄkũmao, ńlɛ buiↄ gbɛ̃ ń kyã̀wãao. 
N bↄ n mↄ n gbɛ̃́ↄ boi, n mↄ kía pↄ́ ń kpà suabai. N gbɛ̃vãi mi wì, n pↄ́ pìliwà à gↄ̃̀ láilai. 
Kɛ́ aà zĩgↄ̃ↄ sìwázi wá fãaai, aalɛ pↄnakɛ yɛ̃̀ɛɛsaide pↄ́ ulɛaↄ blea yã́ musu, ↄ̃ n ń dↄaana mi fↄ̃̀ ń azĩa sↄ̃nao. 
N ↄ̃zↄ̃̀ ísiawa ń n sↄ̃́ↄ, n í zↄ̃ↄpi yà. 
Kɛ́ ma a baomà, sↄ̃ kɛ̃̀magu, a kↄ̃fĩ ma lɛ́baa dèe, ma wá gà, málɛ lualua ma zɛgbɛu. Má mɛna màↄ gↄↄ pↄ́ wa yã́yia gbɛ̃́ pↄ́ lɛ̀lɛwáↄwa dã́. 
Baa tó kaadↄɛna i nɛsoe kɛo, mɛ́ vɛ̃ɛliↄ i nɛ'io, baa tó ku i bↄo, mɛ́ buapↄ́ↄ i kɛo, baa tó sãↄ ku kaau lↄo, mɛ́ zuↄ làa kpàsau, 
ń beeo ma pↄ aↄ na Diiwaɛ, má pↄnakɛ ń Lua ma Suabanao. 
Dii Lua mɛ́ ma gbãa ũ, ì ma wá nakṹ lán tuewa, ì to màↄ bɛ gulɛsĩↄwa.
