﻿Zakali.
9.
Dii a yãda Adalaka bùsula, i to yã́ zↄ̃lɛ Damasiwa, asa Sili mɛɛwiapiá aà pↄ́ɛ, i kɛ Isaili buiↄ ńtɛ̃ɛ no. 
Yã́pi a zↄ̃lɛ Amatawa lↄɛ ń Tiio ń Sidↄ̃o, baa kɛ́ aa dɛ ↄ̃nↄnaↄ ũ maamaa. 
Tiideↄ bĩ́i gbãa bo lìa ń wɛ̃́lɛi, aa ã́nusu kã̀aańzi lán ũfãawa, aa vua nↄ̀nↄaańzi lán zɛ́ guu pɛ̀lɛawa. 
Gwa! Dii a ń pↄ́ↄ símá, i zɛ́ pↄ́ aa vĩ ísiaa midɛ. Tɛ́ mɛ́ a kṹ ń wɛ̃́lɛpiwa. 
Asekelonideↄ e, vĩa i ń kṹ. Gazadeↄ lualua maamaa ń Ɛkɛlonideↄ lↄ, asa tãmaa a ń nɛ́ɛ. Gazadeↄ kua ń kíawa, Asekeloni a gↄ̃ bɛzia ũ. 
Buipãleↄ zↄ̃lɛ Asedoda, Dii i Filitɛ̃ↄ wala midɛ. 
I nↄ̀ↄ kòlokpasai bↄ ń lɛ́zĩ, i tɛ̃ bↄ ń lɛ́u. An gbɛ̃́ pↄ́ gↄ̃̀ↄ gↄ̃ wá Lua pↄ́ ũɛ, aa gↄ̃ lán Yudaↄ buiewa, Ɛkɛlonideↄ gↄ̃ aà gbɛ̃́ↄ ũ lá Yebusiↄ kɛ̀wa. 
Dii i a bùsu ń a gbɛ̃́ↄ dↄ̃́a zĩgↄ̃ pↄ́ lɛ́ mↄ́ lɛ́lɛimáↄ yã́i. Gbãamↄnɛdeↄ gbãablemá lↄo, asa aↄ wɛ́tɛńzi saɛ. 
Á Siↄnadeↄ, à pↄnakɛ maamaa, á Yelusalɛũdeↄ, à kúkuakɛ. À gwa, á kía lɛ́ mↄ́wá, ì yãkɛ a zɛ́wa mɛ́ zĩ̀blenaɛ. Aà nↄ̀sɛ niɛ mɛ́ a di zàa'ĩna kpɛ, a di zàa'ĩn nɛ́ bↄlↄ kpɛ. 
A zĩkasↄ̃goↄ bↄlɛ Ɛflaiũ bùsuu, a to zĩkasↄ̃ↄ ku Yelusalɛũ lↄo, wi zĩkasaↄ ɛ́'ɛ. A aafia kpàwakɛ bui píiɛ, i kible za ísialɛ la ń a lɛ́leo, za Uflatai e dṹnia lɛ́wa. 
Á gbɛ̃́ pↄ́ á dɛ zĩ̀zↄↄ ũ sↄ̃, má á bↄlɛ ɛ̀ isaipiu ma bàakuaánↄ au yã́i. 
Á zĩ̀zↄ pↄ́ á dↄ̃ á bↄↄ, à su á wɛ̃́lɛ bĩ́ideu, baa gbã málɛ oɛ́, má ɛa asea kpáwá lɛɛ pla. 
Yudaↄ mɛ́ ma sá ũ, má sápi kã́, Ɛflaiũ buiↄ mɛ́ ma ka ũ, má dau, mí Siↄnadepiↄ gbaɛ Gɛlɛkiↄwa. Aa gↄ̃mɛɛ lán nɛgↄ̃na fɛ̃ndawa. 
Za musu Dii a bↄ a gbɛ̃́piↄwa, aà ka a gɛ̃ fìoo lán loupilɛawa. Dii Lua a kã̀aepɛ, i mↄ gɛↄmidↄkĩi oi zàa'ĩana guu. 
Dii Zĩgↄ̃de a ↄlia a gbɛ̃́ↄzi, aa ń ibɛɛↄ taitai, aai ↄ̃zↄ̃ ń gↄ̃kɛbↄↄwa. Aa ń bↄ́ↄ'i mi, aai pala lán vɛ̃ɛminawa. Aa kɛ zĩ́uzĩu lán ta pↄ́ wì au ɛ́lɛò sa'okĩiwawa. 
Dii an Lua a ń suaba gↄↄ bee a kpàsa sãↄ ũ, aaiↄ tɛkɛ aà bùsuu lán kíafua gbɛ̀ bɛɛɛdeↄwa. 
Aaↄ maa mɛ́ an kɛfɛna a kɛ zài. Ɛ̀waasoↄ lɛkpɛↄ yↄ́yↄ pↄ́wɛna yã́i, wɛ̃́ndiaↄ wɛ̃wɛ̃, kɛ́ vɛ̃ɛ di yã́i. 
