AYUBA.
38.
Ben Dii yã sì Ayubala zàga'ĩa guu à bè: 
Dé bé èe faasaiyã kaa ma ↄ̃ndↄ̃ↄlaa? 
Ǹ fɛɛ ǹ zɛ lán nɛ́gↄ̃gbɛ̃ bà, mɛ́ n la yãzi, nɛ́ wemala. 
Kɛ̀ ma anduna kàɛ, ń kú mámɛ? Tó ń dↄ̃na vĩ, ǹ omɛ. 
Dé bé à à tↄↄtɛ lɛ́zɛkiinↄ lɛ̀? Dé bé à bà yↄ̃̀a à gwà? À dɛ ń dↄ̃ↄ? 
Bↄ́ bé à tↄↄtɛ kũna? Dé bé à à ɛ̃ɛ dàɛ 
gurↄↄ kɛ̀ gudↄna sↄsↄnɛnↄↄ e guda kɛɛ, Luda malaikanↄ pↄnna wiii dↄ ń píngii? 
Kɛ̀ ísiaa guu fↄ̃̀ à bↄ̀, dé bé à zɛ́ tàtaàlɛɛ? 
Ma ludambɛ luguu dànɛ pↄ́kãsãa ũ, ma gusiaa yìnɛ bisa ũ. 
Ma à lɛ́zɛkii dànɛ, ma zɛ́nↄ tàtaàlɛ ma gbãnganↄ dàdan. 
Ma bènɛ: Nɛ́gae ká kɛ̀ ǹton vĩàlaro, n ísↄ̃kana gbãaanↄ é zɛ kɛ̀. 
Zaa lán wà n i nà n yã dìɛ kↄngↄnɛↄ́? N bↄkii ↄ̀dↄa gudↄnanɛ zikiↄ́? 
Gudↄna è anduna kũ a lɛ́a lɛ à gbãkɛ lán bisa bà à zaakɛrinↄ kwɛ́ɛ. 
È anduna liɛ kodekode lán kwã kpɛɛ bà, kpiiinↄ è bↄ gupuraaa lán uta yiyikↄ̃ana bà. 
È gí zaakɛrinↄnɛ aↄ̃ ń gusia yã kɛ, è ń ↄ sɛna musu ɛ́'ɛ. 
N gaa ai zaa ísia íbↄkiinↄaↄ́? N táa ò í lↄ̀ pì gãnulɛa zikiↄ́? 
Wà gaa kpɛɛlɛ gbànↄ ↄ̀dↄannɛↄ́? N gɛ̀wãa gãnulɛnↄ èↄ́? 
N anduna yàasa lɛ́ tàasi kɛ̀ↄ́? Tó ń yã beeenↄ dↄ̃ píngi, ǹ omɛ. 
Gupuraa bɛ zɛ́n máa? Ń gusiakukii dↄ̃ↄ́? 
Nɛ́ fↄ̃ ǹ gáńyo ń bùsun-ↄ́? Ń ń bɛ zɛ́ dↄ̃roo? 
Ń dↄ̃ sɛra, à dɛ wà n i gurↄↄ beeea! À dɛ n wɛ̃̀ lɛ́ vĩroo? 
N gɛ̃ làasi kɛ̀ ma gu yĩi kàɛn-ↄ́? N ma lougbɛ dↄ̃̀ èↄ́? 
Mɛɛ̀ utɛ ai nawɛ̃akɛgurↄↄa, mɛɛ̀ gbarɛ zĩ̀kagurↄↄ zĩ. 
Gupuraa è bↄ mámɛ à dagulaa? Ɔfãntɛ̃bↄɛ kpa ĩa è bↄ à da tↄↄtɛla diamɛ? 
Dé bé è zɛ́ bↄ lou bítanɛ? Dé bé è guu para lapatananɛ? 
È mↄdↄ pisi tↄↄtɛ kɛ̀ gbɛ̃kee kúnlooa, baa gbáa kɛ̀ gbɛ̃ntee kúnloo. 
È bɛzia kↄ̃n taagaao yĩi kũ, è tó sɛ̃̀ bↄɛ gwe. 
Lou de vĩↄ́? Dé bé à kpíi ì? 
Dé nɛ́'isↄn lougbɛ è bↄn? Dé bé è sukaa i gbasa à kpáa? 
Dé bé è tó í li à kɛ gbɛ̀ ũ è tó ísia musu kɛ kpàkpaakpa? 
Nɛ́ fↄ̃ ǹ sↄsↄnɛ mɛ̀n swɛɛplaaanↄ yi ǹ kakↄ̃aↄ́? Nɛ́ fↄ̃ ǹ sↄsↄnɛ flɛ̃ngonↄ fãakↄ̃aↄ́? 
Nɛ́ fↄ̃ ǹ mↄgaakiblee bↄ a gurↄↄaↄ́? Nɛ́ fↄ̃ ǹ guu ↄdↄa sↄsↄnɛ ko nɛ́dande kↄ̃n a nɛ́nↄnɛↄ́? 
Ń musu pↄ́nↄ doka dↄ̃ↄ́? Nɛ́ fↄ̃ ǹ ń kpá kpatan tↄↄtɛlaↄ́? 
Nɛ́ fↄ̃ ǹ lɛ́ zu louzi lɛ à sisi à í bↄ à n yakuↄ́? 
Nɛ́ fↄ̃ ǹ loupinanↄ gbarɛ aↄ̃ da zɛ́n yↄ́? Aↄ̃è mↄ́ wà bennɛ wáɛ kɛ̀ↄ́? 
Dé bé à ↄ̃ndↄ̃ↄ dà ludambɛ luguunↄnɛ à lou maa? Dé bé à dↄ̃na kpà sukaaa à kpáa? 
Dé ↄ̃ndↄ̃ↄ bé à kà à ludambɛ luguunↄ naroo? Dé bé eé fↄ̃ à musu orozãnↄ kpákaziaa? 
Tó à í bↄ̀ɛ, bùsu kori è gↄ̃ bↄtↄnga ũ, làkpakↄ̃ↄnↄ è nanakↄ̃a. 
Ḿbe nɛɛ̀ tofe ká músudaanɛ, tó èe nↄ̀bↄ dãdãa dàko guuↄ́? Ḿbe nɛɛ̀ pↄ́blee kpá à nɛ́nↄa aↄ̃ kã gurↄↄ kɛ̀ aↄ̃ↄ kú ń tòn-ↄ́? 
Tó gbáa kãnkãna nɛ́nↄↄ e ligaligaa guuzi, aↄ̃ↄe lɛ́ zuu Ludazi kɛ̀ pↄ́blee kɛ̃̀sãḿma yãnzi, dé bé è pↄ́blee kpáḿmaa?