SAAMUNƆ.
25.
Dauda lɛ̀. Dii, ḿbe ma a swɛ̃̀ kpàmma, 
Ma Luda, má n náanɛkɛna, ǹton tó wí ma kũro, ǹton tó ma ibɛɛnↄ ma nɛro. 
Wí é gbɛ̃ kɛ̀ aↄ̃ wɛ́ɛ dↄnziinↄ kũ zikiro, sé gbɛ̃ kɛ̀ aↄ̃ bↄ̀ n kpɛɛ yãkↄdↄana sainↄ. 
Dii, ǹ n zɛ́ ↄdↄamɛ, ǹ n yã dadamɛ. 
Ǹ ma da n yãpura zɛ́a, ǹ à yã dadamɛ, zaakɛ Luda ma mìsirin n ũ, ma wɛ́ɛ ègↄ̃ dↄnzimɛ gurↄ píngi. 
N wɛ̃nda kↄ̃n n yenzio gↄ̃ dↄngu, zaakɛ beenↄↄ kúnyo zaa zi, Dii. 
Ǹton taari kɛ̀ má kɛ̀nↄ yã daro ke durun kɛ̀ má kɛ̀ ma gↄ̃kparɛkɛgurↄↄnↄ. Ǹ tó ma yã gↄ̃ dↄngu yenzi guu, kɛ̀ ń maa yãnzi, Dii. 
Dii maa, è yã kɛ a zɛ́a, beee yãnzin è a yã dada durunkɛrinↄnɛzi. 
È zĩndabusarinↄ da a zɛ́a, è yã maaa dadańnɛ. 
Dii ègↄ̃ yenzi kↄ̃n náanɛo vĩ kↄ̃n gbɛ̃ kɛ̀ aↄ̃ a bà kuunańyo yã kũnanↄ. 
Baa kɛ̀ ma durun bíta Dii, ǹ kɛ̃mɛ n tↄ́bↄna yãnzi. 
Dé bé à Dii vĩa vĩi? Dii è adee da zɛ́ kɛ̀ dɛ à sɛ́a. 
Adee égↄ̃ kú nnamana guu, à boriinↄ bé wégↄ̃ ń bùsu vĩ. 
Dii ègↄ̃ nna kↄ̃n a vĩakɛrinↄ, è tó aↄ̃gↄ̃ a bà kuunańyo yã dↄ̃. 
Ma wɛ́ɛ ègↄ̃ pɛ́ Diia, zaakɛ àmbe è ma gbá bↄ bàn. 
Ǹ aɛ dↄma, nɛ́ ma wɛ̃nda gwa, zaakɛ má kú mado wɛ́ɛtãmma guu. 
Ma yã'ↄ̃ammanↄ kàara ma nↄ̀sɛ guu, ǹ ma bↄ ma nawɛ̃a pìn. 
Ǹ ma wɛ́ɛtãmma kↄ̃n ma pↄsiaao gwa, nɛ́ ma durunnↄ kɛ̃ma píngi. 
Ǹ gwa lán ma ibɛɛnↄ dàgula nà, aↄ̃ zàmagu pãsĩpãsĩ. 
Ǹ ma wɛ̃̀ndi dãkpa, nɛ́ ma mì sí, ǹton tó wí ma kũro, zaakɛ ma nanzi. 
Ǹ tó yãpura kↄ̃n kuuna maaao gↄ̃ ma dãkpaa, zaakɛ ma wɛ́ɛ ègↄ̃ dↄnzi. 
Luda, ǹ Isarailinↄ bↄ ń nawɛ̃anↄn píngi.