SAAMUNƆ.
85.
Kora boriinↄ lɛ̀. N aubarika dà n bùsun, Dii, n ɛara ǹ su kↄ̃n Yakubu boriinↄ ń gwena ziin. 
N n gbɛ̃nↄ taarinↄ gògo, n ń durunnↄ kɛ̃̀ńnɛ píngi. 
N n pↄ kpã̀kpa tò píngi, n n pↄfɛ̃ pãsĩ tò. 
Ǹ sↄkpawao wa gwena ziin, Luda wa Mìsiri, ǹ pɛ̃tɛ̃ kɛ̀ ń kɛ̀wao lago. 
N pↄↄ égↄ̃ fɛ̃nawazi gurↄ píngin yↄ́? Nɛ́gↄ̃ n pↄfɛ̃gurↄↄ gagaa wɛ̃̀ kↄ̃n wɛ̃̀on yↄ́? 
Nɛ́ ɛara ǹ n gbɛ̃nↄ kuuna kɛkɛ ǹ kɛńnɛ dↄ, lɛ aↄ̃ pↄↄ e à kɛmma nnaroo? 
Dii, ǹ n gbɛ̃kɛɛ ↄdↄawe, ǹ wa mì sí kↄ̃n n gbãaao. 
Ma swã dↄ Dii Luda yã'onazi, zaakɛ è aafia lɛ́ gbɛ̃ a yãmarinↄnɛ, tó aↄ̃ↄe ɛara wà sↄ̀kpa ń yↄ̃̀nkↄyãnↄziro. 
À vĩakɛrinↄ mìsina gurↄↄ zã̀ro, lɛ à gakui e àgↄ̃ kú wa bùsun yãnzi. 
Gbɛ̃kɛ kↄ̃n náanɛo è dakↄ̃rɛ, yãzɛde kↄ̃n aafiao è ↄ kpákↄ̃a. 
Náanɛ è ↄ poro musu, yãzɛdee è ↄ nↄnↄ tↄↄtɛa. 
Dii é à maaa kɛwe, wa tↄↄtɛ é pↄ́blee kɛ. 
Yãzɛdee ègↄ̃ tɛ́ à aɛ, è zɛ́ kɛkɛnɛ.