YAASINƆ.
10.
Nɛ́ ↄ̃ndↄ̃dee è tó a de pↄↄ kɛ nna, nɛ́ yↄ̃nkↄↄ è a da nↄ̀sɛ yakanɛ. 
Ɔↄ zaaa è àre kɛro, yãkɛna a zɛ́a è ń sí gaa ↄzĩ. 
Dii è tó nↄaa gbɛ̃ maaa dɛro, è zaakɛrinↄ tɛ̃ pↄ́ kɛ̀ aↄ̃ↄ yezi. 
Ɔ mɛadee è mↄ́ takaasio, zĩkɛna ↄplaplaa sↄ̃ è mↄ́ auzikio. 
Nɛ́ kɛ̀ pↄ́wɛɛ kàkↄ̃a kwɛɛ nɛ́ làakarideemɛ, nɛ́ kɛ̀ è ii o pↄ́kɛ̃gurↄ wí vĩro. 
Gbɛ̃ maaa mì ègↄ̃ aubarika vĩ, mↄde yã pãsĩ bé à zaakɛri lɛ́ pà. 
Gbɛ̃ maaa è ga kↄ̃n a tↄ́oro, zaakɛri tↄ́ è kaatɛmɛ. 
Ɔ̃ndↄ̃dee è zĩi kɛ yãdiɛnanↄa, yãbↄɛri è a zĩnda nɛ. 
Gbɛ̃ kɛ̀ è yã kɛ a zɛ́a kú a làakaria, zɛ́zaasɛri yã é bↄ gupuraaa. 
Gbɛ̃gwana kↄ̃n wɛ́ɛ pãsĩo è mↄ́ yão, gbɛ̃ kɛ̀ è yã utɛ a nↄ̀sɛ guuroo è íbɛtɛ mì dɛ. 
Gbɛ̃ maaa lɛ́ nɛ́ íbↄki wɛ̃̀ndideemɛ, yã pãsĩ è zaakɛri lɛ́ pa. 
Zangu è swèe da, yenzi è lá ká taari píngila. 
Ɔ̃ndↄ̃ yã ègↄ̃ kú làakaridee lɛ́n, flã̀n faasaidee pↄ́ ũ a kpɛɛa. 
Ɔ̃ndↄ̃rinↄ è dↄ̃na zi ká, làakarisaidee lɛ́ è à kaatɛ aagamɛ. 
Ɔↄdee auziki ègↄ̃ dɛnɛ lán wɛ́tɛ bĩidee bà, takaasidee takaasi sↄ̃ è à kaatɛ. 
Gbɛ̃ maaa asaia è mↄ́nɛ wɛ̃̀ndio, zaakɛri àre è wɛ́ɛtãmma inɛ. 
Gbɛ̃ kɛ̀ è lɛ́damma maa è wɛ̃̀ndi zɛ́ ↄdↄańnɛ, gbɛ̃ kɛ̀ è pã kpá totonazi è ń sãsã. 
Gbɛ̃ kɛ̀ è zangu utɛ nɛ́ ɛgɛdeemɛ, gudɛri nɛ́ yↄ̃nkↄↄmɛ. 
Yã pari bↄɛna ègↄ̃ durun sairo, gbɛ̃ kɛ̀ è a lɛ́ kũ nɛ́ làakarideemɛ. 
Gbɛ̃ maaa lɛ́ dɛ lán kondogi wásawasa bà, zaakɛri nↄ̀sɛ bɛ̀ɛ vĩro. 
Gbɛ̃ maaa yã'ona è paridee da zɛ́a, làakarisaidee è ga faasaikɛɛ guu. 
Dii aubarika è ń kɛ auzikidee ũ, zĩkɛna nawɛ̃ao è pↄ́ke kaararo. 
Zaakɛna dɛ yↄ̃nkↄↄnɛ kↄ̃kↄ̃ yã ũ, ↄ̃ndↄ̃ↄ è kɛ làakarideenɛ nna. 
Yã kɛ̀ zaakɛri e vĩa kɛɛnɛ bé eé à le, Luda é pↄ́ kɛ̀ gbɛ̃ maaa yezi kpáa. 
Tó zàga'ĩa kàka à gɛ̃̀, zaakɛrinↄ ègↄ̃ kuu dↄro, gbɛ̃ maaa kãsãa ègↄ̃ pɛɛna gurↄ sãnda píngi. 
Lán lɛvũu kpã̀kpã è kɛ swaanɛ nà, lán tɛ́sukpɛ è kɛ wɛ́ɛnɛ nà, lɛn mɛadee dɛ lɛ gbɛ̃ kɛ̀ aↄ̃ à zĩ̀nↄnɛ. 
Vĩakɛna Diinɛ è wɛ̃̀ndi gbã̀a kaara, zaakɛrinↄ sↄ̃, ń wɛ̃̀ndi égↄ̃ kusumɛ. 
Gbɛ̃ maaanↄ wɛ́ɛ ègↄ̃ dↄ pↄnnaazi, zaakɛrinↄ sↄ̃, tãmaa é ń nɛ. 
Dii zɛ́ dɛ utɛkii ũ gbɛ̃ maaanↄnɛ, zaakɛrinↄ sↄ̃, è ń kaatɛmɛ. 
Weé gbɛ̃ maaa fɛɛ à gbɛ̀n zikiro, gbɛ̃ zaaa sↄ̃ é vɛ̃ɛkii e bùsunlo. 
Ɔ̃ndↄ̃ yã è bↄ gbɛ̃ maaa lɛ́n, lɛ́zaadee sↄ̃, weé à nɛ́nɛ zↄ̃kↄ̃rɛmɛ. 
Gbɛ̃ maa yã kɛ̀ kↄ̃ sío wà ońnɛ dↄ̃, yãkpɛɛgãnda'ona ègↄ̃ da gbɛ̃ zaaa lɛ́n.