YAASINƆ.
16.
Gbɛ̃ntee è yã diɛ a swɛ̃̀n, mↄde à mìdɛna è bↄ Dii lɛ́mmɛ. 
Baade è a yãkɛna e maamɛ, mↄde Dii ń nↄ̀sɛguuyãnↄ yↄ̃ à gwa. 
Ǹ yã kɛ̀ nɛ́ɛ kɛɛ na Dii ↄzĩ, n pↄyeziyã é bↄ maa. 
Dii pↄ́ píngi kɛ̀ a pↄyezi yãnzimɛ, zaakɛrinↄ pↄ́n wɛ́ɛtãmmagurↄↄ ũ. 
Dii tɛ̃̀n ĩadãrinↄ ũ, yãpuramɛ aↄ̃é bↄ pãro. 
Gbɛ̃kɛɛ kↄ̃n náanɛo è lá ká taarila, vĩakɛna Diinɛ è tó wà pã à zaaanɛ. 
Tó gbɛ̃ yãkɛnanↄ kɛ̀ Diinɛ nna, è tó se à ibɛɛnↄ kɛo nna. 
Pↄ́ féte ena maakɛna guu maa dɛ àre zaa bíta enala. 
Gbɛ̃ntee è zɛ́ kɛ̀ èe sɛɛ laasuu lɛ́, mↄde Dii è a kɛ̀sɛ da zɛ́a. 
Lán kína è yã diɛ Luda gɛ̃ɛ ũ nà, à maa à yã bↄ yãzɛdee kpɛɛro. 
Zaka maaa kↄ̃n kiloo súusuo nɛ́ Dii pↄ́mɛ, pↄ́tiisigwabↄ píngi nɛ́ à pↄ́kɛnanↄmɛ. 
Èe kↄ̃ sío kína à zaaa kɛro, wè kpata kãsãa pɛ́ɛ yãzɛdee musumɛ. 
Yãzɛde'ori è kɛ kínanɛ nna, ègↄ̃ ye yãpura'orizi. 
Kína pↄfɛ̃ dɛ lán ga zĩ̀ri bàmɛ, mↄde ↄ̃ndↄ̃dee è à tɛ́ dɛ. 
Kína uu werena ègↄ̃ aafia vĩ, à maakɛnnɛna dɛ lán pↄ́tↄ̃gurↄ lou bàmɛ. 
Ɔ̃ndↄ̃kũna maa dɛ vurala zã̀, gↄ̃na làakaridee ũu bɛ̀ɛ vĩ dɛ kondogi maaala. 
Gbɛ̃ maa zɛ́ kɛ̀ è sɛ́ pã̀ zɛ́ zaaanɛ, gbɛ̃ kɛ̀ à a zĩndakũna dↄ̃ↄ è a wɛ̃̀ndi dãkpa. 
Ĩadãna è mↄ́ lɛɛnao, zĩndasɛna lezĩ è mↄ́ kaatɛnao. 
Zĩndabusana talakanↄ tɛ́ maa dɛ baka kuuna kↄ̃n ĩadãrinↄla. 
Gbɛ̃ kɛ̀ è yã'onnɛ maa è à maaa e, Dii náanɛkɛri ègↄ̃ pↄnnaa vĩ. 
Gbɛ̃ kɛ̀ à nↄ̀sɛ papanan wè sísi làakaridee, gbɛ̃ kɛ̀ à lɛ́ nnaan wè à yãdↄ̃na zɛ́ e. 
Làakarin wɛ̃̀ndi mì ũ gbɛ̃ kɛ̀ aↄ̃ↄ vĩinↄnɛ, faasaideenↄ yãfaasai è wɛ́ɛ tãḿma. 
Ɔ̃ndↄ̃dee laasuu è à lɛ́ da zɛ́a, à lɛ́ è tó wà à yãdↄ̃na zɛ́ e. 
Yãnna'ona nɛ́ zↄ́mɛ, à nna nↄ̀sɛn bensↄ̃ è mɛ̀ gba aafia. 
Zɛ́ kee kuu è kɛ gbɛ̃nↄnɛ maa, mↄde à mìdɛkii nɛ́ gaamɛ. 
Búbari nↄ̀sɛ è à da zĩin, zaakɛ nↄaa è tɛ́ kámmɛ. 
Gbɛ̃ pãa è à zaaa gↄ̃gↄ̃, à lɛ́gbɛ dɛ lán tɛ́ kɛ èe kũu bàmɛ. 
Gbɛ̃ dↄ̀rↄsaidee è swèe da, kↄmↄtↄdee è gbɛ̃nnanↄ kɛ̃kↄ̃a. 
Gbɛ̃ pãsĩ è mↄnafiki kɛ a gbɛ̃daaanɛ, gbasa à à da zɛ́ zaaan. 
Gbɛ̃ kɛ̀ èe wɛ́ɛ'igↄ̃ kɛɛ laasuu ègↄ̃ kpɛɛgãndamɛ, gbɛ̃ kɛ̀ èe lɛ́zuki kɛɛ zɛ̀ kↄ̃n à zaaaomɛ. 
Mìkã puraa nɛ́ fùra gakuideemɛ, maakɛna è ń káa. 
Nↄ̀sɛyĩidee maa dɛ zĩ̀karila, gbɛ̃ kɛ̀ à a zĩndakũna dↄ̃ↄ maa dɛ wɛ́tɛsirila. 
Wè yã gbeka kↄ̃n ↄↄ puraao, mↄde à bↄkↄ̃tɛna è bↄ Dii kiiamɛ.