﻿NAANAA.
14.
Zĩkea Babilↄnia bùsu kína Amarafɛli kũ Ɛlasa bùsu kína Ariↄkio kũ Elamu bùsu kína Kɛdↄlaomɛɛo kũ Goimu bùsu kína Tidalao 
tɛn zĩ̀ ká kũ Sↄdↄmu kína Bɛrao kũ Gↄmↄra kína Bisao kũ Adama kína Sinabuo kũ Zeboimu kína Sɛmɛbao kũ Bɛla kũ òdi pi tera Zoa kínao. 
Kína gbɛ̃nↄn sↄↄro pìnↄ kↄ̃ kàkara ń pínki Sidimu guvutɛn. Àkũmɛ Sɛ̀bɛ Wiside ũ tera. 
Wɛ̃̀ kuri awɛɛpla dagura òdigↄ̃ táfe bo Kɛdↄlaomanɛ. A wɛ̃̀ kuri awɛɛ'aakↄ̃de gũnn ò gì bonɛi. 
A wɛ̃̀ gɛ̃ro donsaride gũnn Kɛdↄlaoma kũ kína kũ ò kú kãaonↄ sù ò zĩ̀i blè Rɛfaimunↄa zaa Asɛtɛro Kanaimu, ò zĩ̀i blè Zuzinↄa zaa Hamu, ò zĩ̀i blè Ɛminↄa zaa Save Kiriataimu, 
ò zĩ̀i blè Orinↄa ń kpi kũ òdi pi Seia ari à gɛ̀ɛ pɛ́ Ɛli Parana gbárannaa. 
Akũ ò ɛ̀ra ò sù Ɛmisipa. Àkũ òdi pi tera Kadɛsi. Ò zĩ̀i blè Amalɛki bùsuua pínki kũ Amↄri buri kũ ò kú Azazↄ̃ Tamanↄa dↄ. 
Akũ Sↄdↄmu kína kũ Gↄmↄra kínao kũ Adama kínao kũ Zeboimu kínao kũ Bɛla kũ òdi pi tera Zoa kínao fùtɛ ò gɛ̀ɛ ò zĩ̀ ká kũńwo Sidimu guvutɛn. 
Òtɛn zĩ̀ ká kũ Elamu bùsu kínao kũ Goimu bùsu kínao kũ Babilↄnia bùsu kínao kũ Ɛlasa bùsu kínao. Kína gbɛ̃nↄn siikↄ̃ pìnↄ tɛn zĩ̀ ká kũ kína gbɛ̃nↄn sↄↄronↄ. 
Sidimu guvutɛ ↄ̀da wɛ̀ɛ vĩ dasi. Kũ Sↄdↄmu kína kũ Gↄmↄra kínao tɛn bàa lɛ́, akũ ò sì a gũn, akũ ń gbɛ̃ kparanↄ bàa lɛ̀ ò gɛ̀ɛ gusĩsĩden. 
Zĩ̀blerinↄ Sↄdↄmu kũ Gↄmↄrao aruzɛkɛnↄ kũ ń pↄ́blenↄ sɛ̀tɛ pínki ò tào. 
Gↄrↄ kũ̀a Abramu vĩ̀ni nɛ́ Lutu kú Sↄdↄmu, akũ ò a kũ̀ ò tà kãao kũ a aruzɛkɛnↄ. 
Akũ gbɛ̃ kũ à bò ń ↄĩ gɛ̀ɛ à ò Eberu buri Abramunɛ zaa Mamare gbiri línↄ sarɛ. Mamare kũ a dakũnanↄ Ɛsɛkↄlu kũ Anɛo bi Amↄri burinↄmɛ, ò de kↄ̃ gbɛ̃ ũ kũ Abramuo. 
Kũ Abramu mà ò a danɛ kũ̀ ò tà kãao, akũ à a bɛ zĩ̀karinↄ sɛ̀tɛ gbɛ̃nↄn wàa do kpɛ́ basuddo plansari à pɛ̀tɛ kína pìnↄi, akũ à ń lé Dã. 
Akũ à a gbɛ̃nↄ kpàatɛtɛ, akũ ò sìńgu gwãani. Ò zĩ̀i blèḿma ò pɛ̀ḿma ari Oba, Damasuku gugbãnduru kpa. 
À ɛ̀ra à sù kũ aruzɛkɛ pìnↄ pínki kũ a vĩ̀ni nɛ́ Lutuo kũ a aruzɛkɛnↄ. À sù kũ nↄgbɛ̃nↄo kũ gbɛ̃ pãndenↄ dↄ. 
Kũ Abramu zĩ̀i blè Kɛdↄlaomaa kũ kína kũ ò kú kãaonↄ àtɛn su, akũ Sↄdↄmu kína bò à dàalɛ Save Guvutɛ kũ òdi pi tera Kína Guvutɛn. 
Akũ Salɛmu kína Mɛlɛkizɛdɛki sù kũ burodiio kũ sèwɛ̃o. Àpi bi Luda Musude gbàgbariimɛ. 
Akũ à sa mana ò Abramunɛ à pì: Luda Musude musu kũ zĩtɛo Kɛ̀ri arubarika da Abramun. 
Arubarikaden Luda Musude kũ à n ibɛrɛnↄ nànnɛ n ↄĩ ũ. Akũ Abramu aruzɛkɛ kũ àtɛn sunↄ pínki kuride kpàa. 
Sↄdↄmu kína pì Abramunɛ: Ǹ ma gbɛ̃nↄ kpáma ǹgↄ̃ aruzɛkɛ kũna n pↄ́ ũ. 
Akũ Abramu pìnɛ: Ma sì kũ Dikiri Luda Musude musu kũ zĩtɛo Kɛ̀riio, 
mani n pↄ́ke sɛ́ro, bee kyateyĩba, de ǹsun pi n ma kɛ aruzɛkɛde ũro yãi. 
Mani pↄ́ke sɛ́ro, sé pↄ́ble kũ ma gbɛ̃nↄ blèe baasiro. Ama Anɛ kũ Ɛsɛkↄluo kũ Mamare kũ ò gɛ̀ɛ kũmaonↄ, ǹ tó ò ń baka sɛ́. 
