﻿BONAA.
7.
Akũ Dikirii pì Musanɛ: Ǹ gwa! Ma n kɛ lán ma bà Firi'aunanɛ, akũsↄ̃ n vĩ̀ni Haruna de n lɛ́gbɛkpari ũ. 
Ǹ yã kũ ma ònnɛ pínki o n vĩ̀ni Harunanɛ, ani o Firi'aunanɛ à Isarailanↄ gbarɛ ò bↄtɛ a bùsun. 
Bee kũ abireo mani a kù kɛ gbãna. Mani sèedanↄ kũ daboyãnↄ kɛ Misila dasi, 
ama Firi'auna ni á yã maro. Mani ↄ tↄ̃ Misilaa mà yãkpatɛ kɛ kũńwo pãsĩpãsĩ, mani bo kũ ma zĩ̀kari Isarailanↄ gã̀ kũ gã̀ao. 
Tó ma bo kũ ma gbãnao Misilaa, mani Isarailanↄ bↄtɛn, Misilanↄ ni dↄ̃ sà kũ makũmɛ Dikiri ũ. 
Akũ Musa kũ Harunao kɛ̀ lákũ Dikiri òńnɛ nà. 
Gↄrↄ kũ ò yã ò Firi'aunanɛ, Musa kun wɛ̃̀ basiikↄ̃, Haruna sↄ̃ wɛ̃̀ basiikↄ̃ awɛɛ'aakↄ̃. 
Akũ Dikiri pì Musanɛ kũ Harunao: 
Tó Firi'auna daboyã gbɛ̀kamma, ǹ o Harunanɛ à a gò sɛ́ à pãtɛ a arɛ, ani li mlɛ̃̀ ũ. 
Kũ Musa kũ Harunao gɛ̀ɛ Firi'auna kĩnaa, ò kɛ̀ lákũ Dikiri òńnɛ nà. Haruna a gòo sɛ̀ à pã̀tɛ Firi'auna kũ a ìbanↄ arɛ, akũ à lì mlɛ̃̀ ũ. 
Akũ Firi'auna Misila wɛ́zɛ̃rinↄ kũ ɛzɛdenↄ sìsi, akũ ò daboyã dokↄ̃nↄ pìnↄ kɛ̀ se ń ɛzɛdekɛ gũn. 
Kũ ń baadi a gòo pã̀tɛ, akũ ń gòo pìnↄ lì mlɛ̃̀nↄ ũ, akũ Haruna gò ń pↄ́nↄ mↄ̀mↄ. 
Firi'auna sã gbãnamɛ, adi ń yã maro lákũ Dikiri ò nà. 
Dikiri pì Musanɛ: Firi'auna kù gbãna à gì gbɛ̃nↄ gbarɛi. 
Ǹ gɛ́ ǹ a le zia kↄnkↄ gↄrↄ kũ àtɛn gɛ́ swai. Ǹgↄ̃ a dã Nili sarɛ gwe. Ǹgↄ̃ n gò kũ à lì mlɛ̃̀ ũ pì kũna. 
Ǹ pinɛ makũ Dikiri Eberunↄ Luda ma n zĩa, n ònɛ à ma gbɛ̃nↄ gbarɛ ò gɛ́ donyĩ kɛmɛnɛ gbárannan, ama ari tera à gìmai. 
Makũ Dikiri ma pì, yã kũ ani tó àgↄ̃ dↄ̃ kũ makũmɛ Dikiri ũn dí. Tó n Nili í lɛ̀ kũ gò kũ ń kũnaao, ani li aru ũ. 
Kpↄ̀ kũ ò kú í pìi gũnnↄ ni gaga, Nili í ni gbĩ sↄ̃, Misilanↄ ni fu í pì minaa. 
Akũ Dikiri ɛ̀ra à pì Musanɛ: Ǹ o Harunanɛ à a gò sɛ́ à dↄ Misila ínↄ la, ń swanↄ kũ ń swa'ↄnɛnↄ kũ ń ísɛ̃bokinↄ kũ ń íkakinↄ pínki ni gↄ̃ aru ũ. Aru nigↄ̃ dagula Misila, bee kũ kpɛ̃nɛnↄ kũ orozã gũnnↄ. 
Akũ Musa kũ Harunao kɛ̀ lákũ Dikiri òńnɛ nà. Haruna a gòo pìi sɛ̀, à Nili í lɛ̀o Firi'auna kũ a ìbanↄ wára, akũ í pìi gↄ̃̀ aru ũ pínki. 
Kpↄ̀ kũ ò kú a gũnnↄ gàga, akũ Nili í pì gbĩ sↄ̃̀, Misilanↄ fùa ò mi. Aru dàgula Misila. 
Misila ɛzɛdenↄ kɛ̀ lɛ se ń ɛzɛdekɛ gũn, akũ Firi'auna kùgbãna kũ̀, adi ń yã maro lákũ Dikiri ò nà. 
Firi'auna ɛ̀ra à tà a bɛa, adi yã pì da sero. 
Misilanↄ bia yↄ̃̀yↄ̃ Nili bara de ò í mi, zaakũ odi fↄ̃ ò swada'i mìro. 
À kun lɛ ari gↄrↄ supplamɛ Dikiri Nili lɛnaa gbɛra. 
