﻿BONAA.
31.
Dikiri yã ò Musanɛ à pì: 
Ǹ ma! Ma Uri nɛ́ Bezalɛli, Uru daikore, Yuda buri sɛ̀. 
Ma tò ma Nini kúa, akũ à ↄ̃ndↄ̃ kũ gonio kũ dↄ̃naao lè ↄzĩ pínki gũn. 
À zãble pↄ́nↄa dↄ̃ kũ wuraao kũ andurufuuo kũ mↄ̀gotɛ̃o. 
À gbɛ̀ bɛ̀ɛrɛde ana dↄ̃ kũ a dana pↄ́ gũnwo kũ lí'anaao kũ ↄzĩ sĩnda pínkio. 
Abire gbɛra ma Aisamaki nɛ́ Ɔↄliabu, Dã buri dìtɛ a kpanyĩri ũ. Ma ↄzĩkɛrinↄ gbà ↄ̃ndↄ̃ ń pínki, de ò le ò pↄ́ kũ ma dìtɛnnɛnↄ kɛ pínki: 
Dakarɛki kuta kũ doka àkpatiio kũ a nɛ́kparɛo kũ kpɛ́ pì pↄ́ ketenↄ pínki, 
teburu kũ a pↄ́ ketenↄ, wura atɛ̃nɛ fitiladibↄ kũ a pↄ́ ketenↄ pínki, turaretitikpataki, 
sa'opↄ kũ òdi ká tɛ́n à tɛ́ kũ oki kũ a pↄ́ ketenↄ pínki, dàga kũ a dibↄↄo, 
pↄ́kasa kũ ò tã̀nↄ, sa'ori Haruna pↄ́kasa kũ ani naomainↄ kũ a nɛ́nↄ sa'opↄkasanↄ pínki, 
pↄ́ sakɛnísi kũ bizakuta turaretiti gbĩ nnannao. Ò pↄ́ pìnↄ kɛ lákũ ma dìtɛnnɛ nà pínki. 
Dikiri yã ò Musanɛ à pì: 
Ǹ o Isarailanↄnɛ ò kámmabogↄrↄ kũ ma dìtɛ yã da, zaakũ à de sèeda ũ makũ kũ ákↄ̃nↄ dagura ari á buria, de à le à dↄ̃ makũ Dikiri ma á sɛ́ ma gbɛ̃nↄ ũ. 
Àgↄ̃ kámmabogↄrↄ pì yã da, zaakũ gↄrↄ pì kúárɛ adonamɛ. Gbɛ̃ kũ à gↄrↄ pìi tɛ̃̀ɛ kɛ̀, ade gàmɛ. Gbɛ̃ kũ à zĩ kɛ̀ gↄrↄ pìia, ò ade bo a gbɛ̃nↄ tɛ́ ò a dɛ. 
Àgↄ̃ zĩ kɛ gↄrↄ suddo, a gↄrↄ suppladen áni kámma bo, zaakũ makũ Dikiri ma pↄ́mɛ. Gbɛ̃ kũ à zĩ kɛ̀ kámmabogↄrↄaa gàmɛ. 
Isarailanↄ gↄ̃ kámmabogↄrↄ pì yã kũna ò ditɛ gↄrↄ zↄ̃kↄ̃ ũ ari ń buria ma bàka kunna kũńwo yã ũ. 
Anigↄ̃ de sèeda ũ makũ kũ Isarailanↄ dagura gↄrↄ sĩnda pínki, zaakũ makũ Dikiri ma musu kũ anduniao kɛ̀ gↄrↄ suddomɛ, akũ ma làka ma kámma bò a gↄrↄ supplade zĩ. 
Kũ Dikiri yã ò Musanɛ Sinai kpi musu à làka, akũ à dokayã kɛ̃̀ gbɛ̀ anlonↄa mɛ̀n pla kũ a zĩda ↄnɛo à kpàa. 
