﻿BONAA.
34.
Dikiri pì Musanɛ: Ǹ gbɛ̀ anlo kɛ mɛ̀n pla lán a káakunↄ bà, mani yã kũ ò kú a káakupↄ kũ n wìnↄa kɛ̃ḿma. 
Ǹgↄ̃ kú soru gũn kↄnkↄ. Ǹ didi Sinai kpia ǹ zɛ ma arɛ a mìsↄ̃ntɛa. 
Gbɛ̃ke sún su kũnworo. Òsun gbɛ̃ke e gukea kpi pìia sero. Bee sã ke zù sún su pↄ́ ble a gɛ̃iro. 
Musa gbɛ̀ anlo à mɛ̀n pla lán a káakunↄ bà. À fùtɛ kↄnkↄ káakukaaku, akũ à dìdi Sinai kpia à gbɛ̀ anlo mɛ̀n pla pìnↄ kũna a ↄĩ lákũ Dikiri ònɛ nà. 
Dikiri kìpa túsukpɛ gũn à zɛ̀ a sarɛ, akũ à a zĩda tↄ́ sìsi. 
Kũ Dikiri tɛn gɛ̃ a arɛ, à a tↄ́ sìsi à pì: Dikiri, Dikiri Luda wɛ̃ndadↄ̃nnɛri sùruden ma ũ. Ma pↄ dì fɛ̃ likaro, má gbɛ̃kɛ kũ náanio vĩ zↄ̃kↄ̃. 
Madìgↄ̃ gbɛ̃kɛ vĩ kũ gbɛ̃nↄ ari ń buri lɛ́mmɛ, mani ń yã vãninↄ kɛ̃ḿma kũ ń taarinↄ kũ ń durunnanↄo. Ama madì tó taaride bo pãro. Madì denↄ yã vãni wí ń nɛ́nↄ musu kũ ń daikorenↄ kũ ń sãkpɛnↄ kũ ń nasionↄo. 
Musa wùtɛ a nɛ̀sɛlɛ kutɛna à donyĩ kɛ̀nɛ gↄ̃̀nↄ 
à pì: Dikiri, zaakũ ma n pↄnna lè, ǹ gɛ́ kũoo. Bee kũ gbɛ̃ pìnↄ sã gbãna, ǹ sùru kɛ kũoo ó yã vãninↄ kũ ó durunnanↄ musu ǹ ó sɛ́ n pↄ́nↄ ũ. 
Dikiri pì: Ma bàka nigↄ̃ kú kãáomɛ. Mani yãbonsarɛ kɛ á pínki wára, kũ gbɛ̃ke dí a taka kɛ buri ke gũn andunian zikiro. Buri kũ ò likaáinↄ ni ma yãkɛna e, zaakũ mani yã naaside kɛ kãáo. 
Àgↄ̃ yã kũ ma òárɛ gbãra kũna, mani pɛ́árɛ Amↄrinↄa kũ Kanaanↄ kũ Itinↄ kũ Pɛrizinↄ kũ Ivinↄ kũ Yebusinↄo. 
À laakari kɛ! Àsun lɛ́dokↄ̃nↄ kɛ kũ bùsu kũ átɛn gɛ́ gɛ̃n denↄoro, de àsun tankutɛ kpákpa á zĩdanɛro yãi. 
À ń sa'okinↄ gboro à ń tãna gbɛ̀nↄ wíwi à Asɛra línↄ zↄ̃zↄ̃. 
Àsun kútɛ tãnanɛro, zaakũ makũ Dikiri ma tↄ́n Gↄ̃ba, madì gↄ̃ba kpá. 
À laakari kɛ! Àsun lɛ́dokↄ̃nↄ kɛ kũ bùsupidenↄoro, zaakũ tó òtɛn pãpã kɛ ń tãnanↄ yã musu, òtɛn sa oḿma, oni á sísi à ń sa'ona nↄ̀bↄ só kũńwomɛ. 
Àsun nↄ sɛ́ á nɛ́nↄnɛ ń tɛ́ro, zaakũ tó ń nɛ́nↄgbɛ̃nↄ tɛn pãpã kɛ ń tãnanↄ yã musu, oni tó á nɛ́nↄ pãpã kɛ kũńwo se. 
Àsun mↄ̀ pi tãna ũro. 
Àgↄ̃ Burodi Futɛnasari dikpɛ kɛ. Àgↄ̃ burodi futɛnasari só gↄrↄ suppla mↄ kũ òdi pi Abibu gũn lákũ ma dìtɛárɛ nà, zaakũ mↄ pìi gũn a bↄtɛ Misila. 
Á daudunↄ bi ma pↄ́nↄmɛ ń pínki kũ á pↄ́kãde nɛ́ sà káakunↄ ń pínki, zù ke pↄ́ ketenↄ. 
Àgↄ̃ zaaki nɛ́ sà káaku bo kũ são. Tó ádi boro, à a waka fĩ à dɛ. Àgↄ̃ á daudunↄ bo. Gbɛ̃ke sún su ma kĩnaa ↄkoriro. 
Àgↄ̃ zĩ kɛ gↄrↄ suddo à kámma bo a gↄrↄ supplade zĩ, bee búwigↄrↄ ke pↄ́kɛ̃gↄrↄn yá. 
Àgↄ̃ Pↄ́kɛ̃na dikpɛ kɛ gↄrↄ kũ a na burapↄ káaku kɛkɛnaaa. Àgↄ̃ Pↄ́dufublena dikpɛ kɛ wɛ̃̀ lakanaaa. 
Wɛ̃̀ kũ wɛ̃̀ɛo gↄ̃gbɛ̃ sĩnda pínki gↄ̃ su makũ Dikiri Isarailanↄ Luda arɛ gɛ̃̀n aakↄ̃. 
Mani pɛ́árɛ burinↄa mani á bùsu lɛ́ karaárɛ. Gbɛ̃ke ni á bùsu ni dɛ gↄrↄ kũ átɛn su makũ Dikiri á Luda arɛ wɛ̃̀ kũ wɛ̃̀ɛo gɛ̃̀n aakↄ̃ro. 
Àsun pↄ́futɛna kpáma lɛɛlɛ kũ sa'opↄ aruoro. Àsun Vĩnla sa'ona nↄ̀bↄ ditɛ gu dↄ̀aro. 
Àgↄ̃ gɛ́ makũ Dikiri á Luda ↄnn kũ á burapↄ káakunↄ. Àsun blènɛ nↄ̀bↄ kuku kũ a da yↄ̃'ioro. 
Akũ Dikiri pì Musanɛ: Ǹ yã pìnↄ kɛ̃ takadan, zaakũ ma bàka kunna kũnwo kũ Isarailanↄ yãnↄn gwe. 
Musa kú kũ Dikirio gwe ari gↄrↄ bupla fãnantɛ̃ kũ gwãanio pↄ́blenaa sari pↄ́minaa sari. Akũ Dikiri a bàka kunna kũńwo yã mɛ̀n kurinↄ kɛ̃̀ gbɛ̀ anlo pìnↄa. 
Kũ Musa kìpa Sinai kpia, à gbɛ̀ anlo mɛ̀n pla kũ doka kɛ̃aa pìnↄ kũna a ↄĩ. À dↄ̃ kũ a ãn tɛn tɛ́ kɛ ń yã'ona kũ Dikirio yãiro. 
Kũ Haruna kũ Isarailanↄ a è ń pínki, a ãn tɛn tɛ́ kɛ, vĩna ń kũ ò nai. 
Akũ Musa ń sísi. Haruna kũ gbɛ̃ zↄ̃kↄ̃nↄ ɛ̀ra ò sù a kĩnaa, akũ à yã ò kũńwo. 
Abire gbɛra Isarailanↄ nài ń pínki, akũ à yã kũ Dikiri dìtɛarɛ Sinai kpi musu òńnɛ pínki. 
Kũ à yã òńnɛ à làka, à fáta kù a ãnnwa. 
Tó à gɛ̃̀ à yã o kũ Dikirio, àdi fáta go ari à ɛra à bo. Tó à bò, àdi yã kũ Dikiri dìtɛarɛ o Isarailanↄnɛ, 
akũ òdi e a ãn tɛn tɛ́ kɛ. Musa dì ɛra à fáta kú a ãnnwa ari à ɛra à gɛ̃ à yã o kũ Dikirio. 
