﻿NARONAA.
13.
Dikiri pì Musanɛ: 
Ǹ gbɛ̃nↄ zĩ ò gɛ́ Kanaanↄ bùsu kũ matɛn kpá Isarailanↄa yakɛ. Ǹ ń dizinↄ buri gbɛ̃ kũ ò de don'arɛde ũnↄ sɛ́ mɛ̀n dodo ǹ ń zĩ. 
Akũ à ń gbárɛ lɛ bona Parani gbárannan lákũ Dikiri ò nà. Gbɛ̃ pìnↄ bi Isaraila don'arɛdenↄmɛ ń pínki. 
Ń tↄ́nↄn dí: Rubɛni burinↄ gũn Zaku nɛ́ Samua, 
Simɛↄ burinↄ gũn Ori nɛ́ Safata, 
Yuda burinↄ gũn Yefunɛ nɛ́ Kalɛbu, 
Isaka burinↄ gũn Yusufu nɛ́ Igali, 
Ɛflaimu burinↄ gũn Nuni nɛ́ Osea, 
Biliaminu burinↄ gũn Rafu nɛ́ Paliti, 
Zɛbuluni burinↄ gũn Sodi nɛ́ Gadiɛli, 
Yusufu nɛ́ Manase burinↄ gũn Susi nɛ́ Gadi, 
Dã burinↄ gũn Gɛmali nɛ́ Amiɛli, 
Asa burinↄ gũn Mukaila nɛ́ Setu, 
Nafatali burinↄ gũn Vofosi nɛ́ Nabi, 
Gada burinↄ gũn Maki nɛ́ Guɛli. 
Gbɛ̃ kũ Musa ń zĩ bùsu yakɛnↄn gwe. Musa tↄ́ kpà Nuni nɛ́ Oseanɛ Yↄsua. 
Kũ Musa tɛni ń zĩ Kanaanↄ bùsu yakɛ, à pìńnɛ: À bↄtɛ kũ Nɛgɛvi gbárannao à dí bùsu gusĩsĩdea. 
À gwa lákũ bùsuu pì de nà, tó a gbɛ̃nↄn gbãna kesↄ̃ ò busɛ, tó ò dasi kesↄ̃ ò dasiro, 
tó ń bùsu mana kesↄ̃ à vãni, tó ń wɛ̃tɛnↄn bĩni vĩ kesↄ̃ à vĩro, 
tó a zĩtɛ gbãna kesↄ̃ à bùsa, tó à línↄ vĩ kesↄ̃ à vĩro. À kokari kɛ à bùsuu pì línɛnↄ sɛ́tɛ à suo. Zaakũ geepi nɛ́ káakunↄ mana gↄrↄn dí. 
Akũ ò gɛ̀ɛ ò bùsuu pìi yakɛ̀ zaa Zini gbárannan ari Reobo, Lebo Amata kpa. 
Kũ ò bↄ̀tɛ kũ Nɛgɛvi gbárannao, ò kà Ɛblↄnu, gu kũ Anaki burinↄ Aima kũ Sesaio kũ Talamaio kún. Ɛblↄnu katɛna Zoã kũ à kú Misila ã wɛ̃̀ supplamɛ. 
Kũ ò kà Ɛsɛkↄlu guvutɛn, ò geepi línɛyↄ̃ do zↄ̃̀ gwe ò lòko lía, akũ gbɛ̃nↄn planↄn sɛna. Ò bísi kũ kakapuraoo sɛ̀ dↄ. 
Ò tↄ́ kpà gu pìinɛ Ɛsɛkↄlu guvutɛ, geepi línɛyↄ̃ kũ Isarailanↄ zↄ̃̀ gwe yãi. 
Kũ ò bùsuu pìi yakɛ̀ gↄrↄ bupla, akũ ò ɛ̀ra ò sù. 
Kũ ò sù Kadɛsi, Parani gbárannan, ò gɛ̀ɛ Musa kũ Harunao kũ Isarailanↄ kĩnaa pínki. Ò sù kũ baaruuo Isarailanↄnɛ ń pínki, akũ ò bùsuu pì línɛnↄ mↄ̀ńnɛ. 
Ò yã pìi gbã̀ Musanɛ ò pì: O gɛ bùsu kũ n ó zĩn. Vĩ kũ zↄ́'io di gwe. A línɛnↄn dí. 
Ama bùsupidenↄ gbãna. Ń wɛ̃tɛnↄn bĩni vĩ akũsↄ̃ ń wɛ̃tɛ pìnↄn zↄ̃kↄ̃ manamana. O Anaki burinↄ è gwe se. 
Amalɛkinↄn kú Nɛgɛvi gbárannan. Itinↄ kũ Yebusinↄ kũ Amↄrinↄn kú bùsu gusĩsĩden, akũsↄ̃ Kanaanↄn kú ísira sarɛ kũ Yoda sarɛo. 
Kalɛbu gbɛ̃nↄ lɛ́ yĩ̀tɛ Musa arɛ, akũ à pì: Ò gɛ́ ò bùsu pì sí, zaakũ óni fↄ̃ ò zĩ̀ bleḿma. 
Akũ gbɛ̃ kũ ò gɛ̀ɛ kãaonↄ pì: Óni fↄ̃ ò lɛ́tɛ gbɛ̃ pìnↄaro, zaakũ ń gbãna deóla. 
Akũ ò bùsu kũ ò yakɛ̀ɛ pì gya bò Isarailanↄnɛ ò pì: Bùsu kũ o yakɛ̀ɛ pì bi bùsu kũ àdi a gbɛ̃nↄ mↄ́mↄmɛ. Gbɛ̃ kũ o ń é gwenↄ ń pínki bi gbɛ̃ gbã̀nanↄmɛ. 
O gbɛ̃ gbã̀nagbãnanↄ è gwe Anaki burinↄ ũ. O ó zĩda è lán babanɛnↄ bà, lɛn ó de lɛ ń wɛ́n se. 
