﻿NARONAA.
14.
Isarailanↄ tɛn wiki gbãna lɛ́ ń pínki, òtɛn ↄ́ↄ dↄ gwãani pìa. 
Ò zuka dↄ̀ Musaa kũ Harunao ń pínki ò pìńnɛ: Tó o gaga Misila kesↄ̃ gbárannan la, de à kɛ̀ mana. 
Bↄ́yãin Dikiri tɛn tá kũoo bùsuu pìnn? Oni ó dɛdɛ kũ fɛ̃nɛdaomɛ, oni ó nↄgbɛ̃nↄ kũ ó nɛ́nↄ kũkũ. Ó ɛrana Misila sã̀naroo? 
Akũ ò pìkↄ̃nɛ: Ò don'arɛde bo ò ɛra ò tá Misila. 
Musa kũ Harunao wùtɛ ń nɛ̀sɛlɛ kutɛna pari arɛ. 
Akũ bùsuyakɛrinↄ gbɛ̃nↄn pla Nuni nɛ́ Yↄsua kũ Yefunɛ nɛ́ Kalɛbuo ń utanↄ gàga ò kɛ̃̀kɛ̃ 
ò pì gbɛ̃nↄnɛ: Bùsu kũ o bↄtɛn o yakɛ̀ɛ pì mana manamana. 
Tó ó yã kà Dikirigu, ani gɛ́ kũoo bùsuu pìn, bùsu kũ vĩ kũ zↄ́'io din pìia, à ó gba. 
Àsun bo Dikiri kpɛro. Àsun vĩna kɛ bùsupidenↄnɛro, zaakũ ó pↄ́blenↄmɛ, ò utɛki vĩ doro. Dikiri kú kũoo, àsun vĩna kɛro. 
Gbɛ̃ sĩnda pínki tɛni pi ò ń pápa kũ gbɛ̀ɛo, akũ Dikiri gakuri bò à sù Isarailanↄa dakarɛki kuta kia. 
Dikiri pì Musanɛ: Gbɛ̃ pìnↄ nigↄ̃ ma gya bo gↄrↄ sĩnda pínkin yá? Bee kũ daboyã dasi kũ ma kɛ̀ ń tɛ́nↄ, onigↄ̃ gí ma náani kɛi gↄrↄ sĩnda pínkin yá? 
Mani gagagyã káńyĩ mà ń kakatɛ, mani n burinↄ kɛ dasi, ń gbãna nigↄ̃ de gbɛ̃ pìnↄla. 
Akũ Musa pì Dikirinɛ: Mↄkↄ̃n mɛ́ n gbɛ̃ pìnↄ bↄ̀tɛ Misila kũ n gbãnao. Tó Misilanↄ mà, 
oni gí o bùsu dí denↄnɛiro. Zaakũ ò dↄ̃ kũ ń kú kũoo, ndì bo ǹ suwá tɛ̃tɛ̃ntɛ̃. Ò dↄ̃ kũ n tɛ́luku dìgↄ̃ kú ó musu, ndì dowɛrɛ arɛ a gũn fãnantɛ̃, gwãani sↄ̃ tɛ́ gũn. 
Tó n gbɛ̃ pìnↄ dɛ̀ kãnto gↄ̃̀nↄ, buri kũ ò yã pìi mànↄ ni pi: 
Dikiri fùa à gɛ́ kũ gbɛ̃ pìnↄ bùsu kũ à la dàńnɛn, abire yãin à ń dɛdɛ gbárannan. 
Dikiri, ǹ n gbãna zↄ̃kↄ̃ mↄńnɛ sà, lákũ n ò nà n pì 
ndì pↄ fɛ̃ likalikaro, ń gbɛ̃kɛ vĩ zↄ̃kↄ̃, ndì gbɛ̃nↄ yã vãninↄ kũ ń taarinↄ kɛ̃ḿma, ama ndì tó taaride bò pãro. Ndì denↄ yã vãninↄ wí ń burinↄ musu ari à gɛ́ à pɛ́ ń sãkpɛnↄa kũ ń nasionↄ. 
Lákũ n sùruu kɛ̀ kũ gbɛ̃ pìnↄo nà zaa Misila ari ò gɛ̀ɛ ò kào la, ǹ ń durunna kɛ̃ḿma n gbɛ̃kɛ zↄ̃kↄ̃ↄ gũn. 
Akũ Dikiri pì: Lákũ n wɛ́ kɛ̀ma nà, mani sùru kɛ kũńwo. 
Ama lákũ madìgↄ̃ kun nà akũsↄ̃ ma gakuri dà anduniala pínki, 
gbɛ̃ kũ ò ma gakuri è kũ daboyã kũ ma kɛ̀ Misila kũ gbáranna gũnwo kũ ò ma lɛ ò ma gwa gɛ̃̀n kuri ò gì ma yã mainↄ, 
ń gbɛ̃ke ni wɛ́ sí bùsu kũ ma la dà ń dizinↄnɛɛ pìlɛro. Gbɛ̃ kũ ò ma gya bònↄ ke ni wɛ́ sialɛro. 
Lákũ ma zↄ̀bleri Kalɛbu nɛ̀sɛɛ bò ado nà, à tɛ́mai kũ nɛ̀sɛ doo, mani tó à gɛ̃ bùsu kũ à gɛ̀ɛn pìi gũn, a burinↄ ni le túbi ũ. 
Zaakũ Amalɛkinↄ kũ Kanaanↄn kú guvutɛn gwe, à ɛra à da gbáranna zɛ́n zia Isira Tɛ̃ra kpa. 
Dikiri pì Musanɛ kũ Harunao: 
Gbɛ̃ vãni dínↄ ni zuka kámai gↄrↄ sĩnda pínkin yá? Ma zuka kũ òtɛn kámai mà. 
Ǹ pińnɛ makũ Dikiri ma pì má kun. Lákũ ò wɛ́ kɛ̀ma nà, lɛn mani kɛńnɛ lɛ. 
Ń gɛ̀nↄ ni gↄ̃ kátɛ gbárannan la, ń gbɛ̃ kũ ò kà wɛ̃̀ baro ke à dealanↄ pínki. Ń gbɛ̃ kũ ò ń náro akũsↄ̃ ò zuka kàmainↄ 
ni gɛ̃ bùsu kũ ma a la dàńnɛnlo, séde Yefunɛ nɛ́ Kalɛbu kũ Nuni nɛ́ Yↄsuao baasiro. 
Ń nɛ́ kũ ò pì oni ń kũkũnↄn mani gɛ̃ kũńwo, de ò bùsu kũ ń denↄ gìi pì nna ma. 
Mↄ́kↄ̃nↄ sↄ̃, ń gɛ̀nↄ ni gↄ̃ katɛna gbárannan lamɛ. 
Ń nɛ́nↄ ni pↄ́nↄ dãdã gbárannan la ari wɛ̃̀ bupla, ò ń denↄ náani sari gbɛ̀ le. Ń denↄ gɛ̀nↄ ni gↄ̃ gbárannan la ń pínki. 
Lákũ ò bùsuu pìi yakɛ̀ gↄrↄ bupla nà, lɛn onigↄ̃ ń yã vãni gbɛ̀ le lɛ ari wɛ̃̀ bupla, wɛ̃̀ dodo gↄrↄ dodo, onigↄ̃ dↄ̃ lán ibɛrɛsɛna kũmao de nà. 
Makũ Dikiri makũ mɛ́ ma yã pìi ò, lɛmɛ sↄ̃ mani kɛ gbɛ̃ vãni kũ ò kàkaramai pìnↄnɛ lɛ. Oni gaga gbárannan la ń pínki. 
Gbɛ̃ kũ Musa ń zĩ ò bùsuu yakɛ̀ kũ ò sù ò bùsuu pì gya bò ò tò ò zuka dↄ̀anↄ, 
Dikiri gagagyã kà gbɛ̃ pìnↄgu, akũ ò gàga. 
Gbɛ̃ kũ ò gɛ̀ɛ ò bùsuu yakɛ̀ɛ pìnↄ tɛ́, Nuni nɛ́ Yↄsua kũ Yefunɛ nɛ́ Kalɛbuo mɛ́ ò gↄ̃̀ kũ wɛ̃̀ndiio. 
Musa yã pìnↄ gbã̀ Isarailanↄnɛ pínki, akũ ò ↄ́ↄ dↄ̀ manamana. 
Ò fùtɛ kↄnkↄ káakukaaku, ò mìi pɛ̀ kpinↄa ò pì: À gwa, ótɛn gɛ́ gu kũ Dikiri òn. O ó durunna dↄ̃̀ sà. 
Musa pì: Bↄ́yãi átɛn pã Dikiri yãnɛɛ? Abire ni sí kɛro. 
Àsun gɛ́ro, zaakũ Dikiri kú kãáoro. Á ibɛrɛnↄ ni á ble kũ zĩ̀io. 
Amalɛkinↄ kũ Kanaanↄn kú á arɛ gwe. Oni á dɛdɛ kũ fɛ̃nɛdao. Dikiri nigↄ̃ kú kãáoro, kũ a gi tɛ́ii yãi. 
Akũ ò sãgbãna kɛ̀ ò mìi pɛ̀ kpinↄa, bee kũ Dikiri bàka kunna kũńwo àkpatii gↄ̃̀ bùran kũ Musao. 
Akũ Amalɛkinↄ kũ Kanaa kũ ò kú gusĩsĩde pìnnↄ lɛ̀tɛḿma ò ń blé kũ zĩ̀io ò pɛ̀ḿma ari Ɔↄma. 
