﻿YƆSUA.
3.
Yↄsua fùtɛ kↄnkↄkↄnkↄ kũ Isarailanↄ ń pínki. Bona Sitimu ò gɛ̀ɛ Yodai, akũ ò bùraa kàtɛ gwe ari ògↄ̃ gɛ́ bikũ. 
Gↄrↄ aakↄ̃ gbɛra Isaraila gbɛ̃ zↄ̃kↄ̃nↄ kurèkure bùraai 
ò yã dìtɛ gbɛ̃nↄnɛ ò pì: Tó a è Levi buri sa'orinↄ Dikiri á Luda bàka kunna kũoo àkpati sɛna, à da zɛ́n àgↄ̃ tɛ́ ń kpɛ, 
de à le à dↄ̃ zɛ́ kũ áni sɛ́, zaakũ ádi zɛ́ pì sɛ́ zikiro. Àgↄ̃ tɛ́ zã̀zã lán kiloo do taka bà yↄↄ! Àsun na àkpatii pìiiro. 
Akũ Yↄsua pì gbɛ̃nↄnɛ: À gbã̀ bo á zĩdanɛ, zaakũ Dikiri ni yãbonsarɛ kɛ á tɛ́ zia. 
Akũ à ɛ̀ra à pì sa'orinↄnɛ: À Dikiri bàka kunna kũoo àkpati sɛ́ à do gbɛ̃nↄnɛ arɛ à bikũo. Akũ ò àkpatii pìi sɛ̀ ò dòo gbɛ̃nↄnɛ arɛ. 
Dikiri pì Yↄsuanɛ: Mani na n sɛna leia Isarailanↄnɛ gbãra, onigↄ̃ dↄ̃ kũ má kú kũnwo lákũ má kú kũ Musao nà. 
Ǹ o sa'ori kũ ò ma bàka kunna kãáo àkpati sɛnanↄnɛ, tó ò kà Yodai, ò gɛ̃ ò zɛ a ín. 
Akũ Yↄsua pì Isarailanↄnɛ: À mↄ́ la à Dikiri á Luda yã ma. 
Akũ à ɛ̀ra à pì: Lɛn ánigↄ̃ dↄ̃ kũ Luda Wɛ̃̀ndide kú kãáo lɛ, akũsↄ̃ ani pɛ́árɛ Kanaanↄa kũ Itinↄ kũ Ivinↄ kũ Pɛrizinↄ kũ Gigasinↄ kũ Amↄrinↄ kũ Yebusinↄo. 
À gwa! Andunia sĩnda pínki Dikiri bàka kunna kũoo àkpati ni doárɛ arɛ ari Yoda ín. 
À gbɛ̃nↄn kuri awɛɛplanↄ sɛ́ á tɛ́, buri kũ burio gbɛ̃ mɛ̀n dodo. 
Tó sa'ori kũ ò andunia sĩnda pínki Dikiri àkpati sɛnanↄ gbá pɛ̀tɛ Yoda ín, í pì ni zↄ̃kↄ̃rɛ, í kũ àtɛn bo swa musu ni kɛ bĩni ũ à gↄ̃ zɛna a gbɛ̀n. 
Kũ gbɛ̃nↄ bùra fùtɛ ò dà zɛ́n, òtɛn gɛ́ bikũ Yodaa, sa'ori kũ ò Dikiri bàka kunna kũńwo àkpati sɛnanↄ tɛ́ ń arɛ lɛ. 
Burapↄnↄ kɛkɛgↄrↄ sĩnda pínki swa pìi dì pa ari à dà sĩ̀sĩla, ama gↄrↄ kũ àkpatisɛrii pìnↄ kà swa pìii, kũ ò gbá pɛ̀tɛ ín, 
akũ í kũ àtɛn bo swa pìi musu zↄ̃̀kↄ̃rɛ à bĩni kɛ̀ à gↄ̃̀ zɛna a gbɛ̀n zaa zã̀zã wɛ̃tɛ kũ òdi pi Adamu sarɛ Zarɛtã bùsun. Í kũ àtɛn ta sɛ̀bɛ wisiden zↄ̃̀kↄ̃rɛ míↄmiↄ, akũ gbɛ̃nↄ bikũ̀ arɛdↄkↄ̃ana kũ Yɛrikoo. 
Sa'ori kũ ò Dikiri bàka kunna kũńwo àkpati sɛnanↄ gↄ̃̀ zɛna Yoda wɛ̀ɛn zĩtɛ koria gíngin, akũ Isaraila buri sĩnda pínki tɛ́ gukori pìn ari ò gɛ̀ɛ ò bikũ̀ ń pínki ò làka. 
