﻿1 SAMUƐLI.
12.
Samuɛli pì Isarailanↄnɛ ń pínki: Ma yã kũ a òmɛnɛ mà pínki, ma kína kàárɛ kpatan. 
Àkũ mɛ́ ani doárɛ arɛ sà. Makũ sↄ̃ ma zĩ kũ̀, ma mìkã pura kũ̀ akũ ma nɛ́nↄn kú kãáo. Ma doárɛ arɛ zaa ma kɛfɛnnakɛgↄrↄa ari kũ a gbãrao. 
Makũn dí! À kɛ ma sèedadenↄ ũ Dikiri kũ kína kũ à kào arɛ. Ma zù ke zaaki sì á gbɛ̃kea yá? Ma á gbɛ̃ke blè yá? Ma wɛ́ tã̀ á gbɛ̃kea yá? Gusarɛgba ma wɛ́ blè ari ma bo á gbɛ̃ke kpɛ yá? Tó ma kɛ̀ lɛ, mani a fĩna bonɛ. 
Akũ ò wèa ò pì: Ńdi ó blero, ńdi wɛ́ tãwáro, ńdi pↄ́ke sí ó gbɛ̃kearo. 
Samuɛli pìńnɛ dↄ: Dikiri kũ kína kũ à kàaoomɛ á sèedadenↄ ũ gbãra, kũ ádi taari emaro. Ò pì: Dikiri mɛ́ à ó sèedade ũ. 
Akũ Samuɛli pìńnɛ: Dikiri mɛ́ à Musa kũ Harunaoo dìtɛ, akũ ò bò kũ á dizinↄ Misila. 
À zɛ kyáu Dikiri arɛ, mani yã mana kũ à kɛ̀árɛ kũ á dizinↄ babaárɛ. 
Yakubunↄ gɛna Misila gbɛra á dizinↄ wiki lɛ̀ Dikiria, akũ à Musa kũ Harunaoo dìtɛ, ò ń bↄ́tɛ Misila, akũ ò ń kátɛ bùsu dín. 
Kũ Dikiri ń Luda yã sã̀ńgu yãi, akũ à ń kpá Azo zĩ̀karinↄ gbɛ̃ zↄ̃kↄ̃ Siseraa kũ Filisitininↄ kũ Mↄabunↄ kínao, òtɛn zĩ̀ ká kũńwo. 
Akũ ò wiki lɛ̀ Dikiria ò pì: O durunna kɛ̀ o pã kpànyĩ o dò Baalinↄi kũ Asatorɛnↄ. Ǹ ó bo ó ibɛrɛnↄ ↄĩ sà, ónigↄ̃ donyĩ. 
Akũ Dikiri Gidiↄn dìtɛ kũ Barakio kũ Yɛfɛtao kũ Samusio ò á bó á ibɛrɛ pìnↄ ↄĩ gu sĩnda pínkia, akũ a gↄ̃ katɛna aafia. 
Kũ a è Amↄni kína Naasa tɛn su lɛ́tɛáwa, bee kũ Dikiri á Ludamɛ á kína ũ, a pìmɛnɛ: Oi! Kínan á yei! 
Tera sà kína kũ a gbɛ̀ka a sɛ̀n dí, àkũmɛ Dikiri dìtɛárɛ. 
Tó á Dikiri vĩna vĩ akũ átɛn doi, tó átɛni a yã ma akũ ádi bo a yã kpɛro, tó ákↄ̃nↄ kũ gbɛ̃ kũ àtɛn kí bleáwao tɛ́ Dikiri á Ludai, ánigↄ̃ aafia. 
Tó ádi Dikiri yã ma sↄ̃ro, akũ a bo a yã kpɛ, ani ↄ tↄ̃áwa lákũ à kɛ̀ á dizinↄnɛ nà. 
À zɛ à yã zↄ̃kↄ̃ kũ Dikiri ni kɛárɛ e. 
Ésekɛ̃gↄrↄn ó kun loo? Mani Dikiri sísi, ani tó legũ pata à ma, ánigↄ̃ dↄ̃ kũ á kína gbɛkanaa kɛ̀ Dikirinɛ ĩni manamana. 
Akũ Samuɛli Dikiri sìsi, akũ Dikiri tò legũ pàta à mà zĩ birea. Akũ gbɛ̃ sĩnda pínki vĩna kɛ̀ Dikirinɛ kũ Samuɛlio manamana. 
Akũ ò pìnɛ: Ǹ wɛ́ kɛwɛrɛ Dikiri n Ludaa de ókↄ̃nↄ n zↄ̀blerinↄ sún gagaro. O yã vãni kàra ó durunnanↄla, kũ o kína gbɛ̀ka. 
Samuɛli pìńnɛ: Àsun tó vĩna á kũro. A yã vãni pìi kɛ̀ pínki, ama àsun kɛ̃ Dikiriaro. Àgↄ̃ doi kũ nɛ̀sɛ mɛ̀n doo. 
Àsun kɛ̃a à tɛ́ pↄ́ ginanↄiro. Ò àre vĩro, oni fↄ̃ ò gbɛ̃ boro, zaakũ pↄ́ pãnↄmɛ. 
Dikiri ni a gbɛ̃nↄ zukũnaro a tↄ́ zↄ̃kↄ̃ yãi, zaakũ à kàagu à á kɛ́ a gbɛ̃nↄ ũ. 
Makũ sↄ̃, Dikiri sún tó mà durunna kɛarɛ mà aduakɛnaárɛ tóro. Mani zɛ́ mana kũ à de à sɛ́ mↄárɛ. 
À vĩna kɛ Dikirinɛ, àgↄ̃ doi kũ náanio kũ nɛ̀sɛ mɛ̀n doo. À laasun lɛ́ yã zↄ̃kↄ̃ kũ à kɛ̀árɛnↄa. 
Tó a gi a tɛ yã vãnii, ákↄ̃nↄ kũ á kínao, oni á kakatɛ á pínki. 
