﻿2 SAMUƐLI.
6.
Dauda ɛ̀ra à Isaraila kũ à ń sɛ́tɛnↄ kàkara gbɛ̃nↄn dúbu baraakuri. 
Akũ à fùtɛ à dà kũńwo zɛ́n, ò gɛ̀ɛ Baala kũ à kú Yudanↄ bùsun, de ò Luda àkpati sɛ́ ò suo. Dikiri Zĩ̀karide dìgↄ̃ vutɛna kín àkpatii pì malaika dɛ̀mbɛrɛdenↄ dagura, abire yãin òdi pi a tↄ́ kúa. 
Ò àkpatii pìi dà zùgo dufu gũn Abinadabu bɛ sĩ̀sĩi musu, akũ ò dào zɛ́n. Abinadabu nɛ́nↄ Uza kũ Ahioo mɛ́ òtɛn do zùgo pìii, 
Luda àkpati kún. Ahio mɛ́ à tɛ́ arɛ, 
akũ Dauda kũ Isarailanↄ tɛn ũ wã ń pínki Dikiri arɛ ń gbãna zaka lɛ́n kũ lɛ̀sinaao. Òtɛn mↄrↄ lɛ́ kũ gidigboo kũ sɛ̃gɛ̃sɛ̃gɛ̃o kũ fakao kũ sɛ̃̀gɛ̃ɛo. 
Kũ ò kà Nakↄ̃ ésegbɛ̃kia, zùnↄ gɛ̃̀ɛ sì, akũ Uza ↄ bò à nà Luda àkpatiia. 
Akũ Dikiri pↄ fɛ̃̀i, à a lɛ̀ a dɛ̀ àkpatii sarɛ gwe dà kũ à kɛ̀ yãi. 
Dauda nɛ̀sɛɛ yàka, kũ Dikiri pↄ fɛ̃̀ Uzai yãi, akũ òdi gu pì sísi Pↄfɛ̃'uzai ari kũ a gbãrao. 
Zĩ birea vĩna Dauda kũ̀ Dikiri yã musu à pì: Deran mani kɛ nà mà Dikiri àkpati sɛ́ mà táoo? 
Akũ adi we à táo a wɛ̃tɛ gũn doro, à lìtɛ à tào Gata gbɛ̃ Ɔbɛdi Ɛdↄmu bɛa. 
Dikiri àkpati kú a bɛa ari mↄ aakↄ̃, akũ Dikiri arubarikaa dàn kũ a bedenↄ ń pínki. 
Ò pì kína Daudanɛ: Dikiri arubarikaa dà Ɔbɛdi Ɛdↄmu bedenↄgu kũ pↄ́ kũ à vĩnↄ pínki a àkpati yãi. Akũ Dauda gɛ̀ɛ gwe, à Luda àkpatii sɛ̀ àtɛn suo a wɛ̃tɛ gũn kũ pↄnnao. 
Kũ gbɛ̃ kũ ò Dikiri àkpati sɛnanↄ gbá sɛ̀ gɛ̃̀n suddo, akũ Dauda sa ò kũ zùsaao kũ zùnɛ bↄ̀rↄ mɛ̀kpanaao. 
Dauda sa'o'uta dana, àtɛn ũ wã Dikiri arɛ a gbãna zaka lɛ́n. 
Àpii kũ Isarailanↄ pínki òtɛn su kũ Dikiri àkpatiio, òtɛn pↄnna wiki lɛ́ òtɛn kuru pɛ́. 
Kũ Dikiri àkpati tɛn gɛ̃ Dauda wɛ̃tɛ gũn, akũ Solu nɛ́ Mikala tɛn zĩtɛ gwa wondoo gũn. Kũ à è kína Dauda tɛn vĩvĩ àtɛn ũ wã Dikiri arɛ, à a gya bò a swɛ̃̀ɛ gũn. 
Kũ ò sù kũ Dikiri àkpatiio, ò dìtɛ a gbɛ̀n bizakuta kũ Dauda dↄ̀nɛɛ gũn. Akũ à sa'opↄ kũ òdi ká tɛ́n à tɛ́ kũ ò Dikiri arɛ kũ kɛnnakũkↄ̃o sa'opↄo. 
Kũ à sa ò à làka, à sa mana ò gbɛ̃nↄnɛ kũ Dikiri Zĩ̀karide tↄ́o. 
Akũ à burodii kpàatɛtɛ Isaraila kũ ò kakarana gwenↄnɛ kↄ̃̀nↄ dodo gↄ̃gbɛ̃nↄ kũ nↄgbɛ̃nↄ ń pínki kũ domina kàraao mɛ̀n dodo kũ geepi kàraao mɛ̀n dodo. 
Kũ Dauda tɛn su bɛ de à sa mana o a bedenↄnɛ, akũ Solu nɛ́ Mikala bò à gɛ̀ɛ à dàalɛ à pì: Mↄkↄ̃n Isarailanↄ kína, gbɛ̃ bɛ̀ɛrɛde yãn n kɛ̀ gwe gbãra yá? N n zĩda mɛ̀ɛ mↄ̀ n ìba nↄgbɛ̃ zĩkɛrinↄnɛ, lán wé'isaride dì a zĩda mɛ̀ɛ mↄńnɛ nà. 
Akũ Dauda pì Mikalanɛ: Dikirin ma ũ wã̀nɛ. Dikiri mɛ́ à ma sɛ n de kũ a bedenↄ gɛ̃nɛ ũ, à ma kɛ a gbɛ̃ Isarailanↄ don'arɛde ũ. 
Mani futa kũ de abirela, mani ma zĩda kĩa n enaa gũn, ama nↄgbɛ̃ zĩkɛri kũ ń tɛ́ḿma pìnↄ mɛ́ oni ma bɛ̀ɛrɛ dↄ̃. 
Akũ Solu nɛ́ Mikala dí nɛ́ iro ari à gɛ̀ɛ à gào. 
