﻿1 KINANƆ.
9.
Kũ Sulemanu Dikiri ↄnn kàtɛ à làka kũ a ↄnnwo kũ zĩ kũ a pↄ kúanↄ pínki, 
akũ Dikiri ɛ̀ra à bò à sùa a gɛ̃̀n pladeo lákũ à bò à sùa Gibiↄ̃ nà 
à pìnɛ: Ma adua kũ n kɛ̀ kũ kútɛ kũ n kɛ̀mɛnɛoo mà. Ma kpɛ́ kũ n bòo pìi dìtɛ ma pↄ́ ũ, ma tↄ́ nigↄ̃ kúa lakanaa sari. Ma wɛ́ nigↄ̃ kúa, ma pↄ nigↄ̃ kúa. 
Mↄkↄ̃n sↄ̃, tó ń tɛ́ ma zɛ́n súsu kũ nɛ̀sɛ purao lákũ n de Dauda bà, tó ń yã kũ ma dìtɛnnɛnↄ kũna kũ ma yã'onnɛnanↄ, tó ntɛni ma ↄdↄki gwa, 
mani n kpata zĩni pɛ́tɛ Isarailanↄ tɛ́, anigↄ̃ lakana vĩro, lákũ ma a lɛ́ sɛ̀ n de Daudanɛ nà, ma pì a burinↄ nigↄ̃ kú Isaraila kpatan gↄrↄ sĩnda pínki. 
Tó mↄkↄ̃n ke n nɛ́nↄ kpɛ lìmɛnɛ sↄ̃, tó á ma dokayãnↄ kũ yã kũ ma dìtɛárɛnↄ kũnaro, tó a gɛ do tãnanↄi ari átɛni ń gbagba, 
mani Isarailanↄ bↄtɛ bùsu kũ ma kpàḿman, mani gí kpɛ́ kũ ma dìtɛ ma pↄ́ ũ pìii, oni gↄ̃ lalandi pↄ́ ũ, pina pↄ́ ũ buri sĩnda pínkinɛ. 
Bee kũ kpɛ́ pì naasikɛo, a yã ni bo gbɛ̃ kũ òtɛn gɛ̃tɛ a sarɛnↄ sarɛ. Oni suru gá ò pi: À kɛ̀ dera Dikiri kɛ̀ bùsu dí kũ kpɛ́ díoonɛ lɛɛ? 
Oni pińnɛ: Kũ ò pã kpà Dikiri ń Luda kũ à ń dizinↄ bↄ̀tɛ Misilai yãimɛ. Ò zɛ̀ kũ tãnanↄ, òtɛni ń gbagba òtɛn kútɛńnɛ. Abire yãin Dikiri kisira dí zĩ̀ḿma pínki. 
Sulemanu ↄn mɛ̀n pla pìnↄ kàɛ wɛ̃̀ baromɛ, Dikiri ↄn kũ a zĩda bɛo. Abire gbɛran 
à Galili bùsu wɛ̃tɛ kpà Taya kína Hiramua mɛ̀n baro, zaakũ Hiramu sida lí kũ pini lío kũ wuraao kpàa lákũ à yei nà. 
Kũ Hiramu bò Taya à gɛ̀ɛ à wɛ̃tɛ kũ Sulemanu kpàawanↄ gwà, adi kɛnɛro, 
akũ à pì: Ma gbɛ̃, wɛ̃tɛ kpate takanↄn n kpàma gwee? Akũ ò tↄ́ kpà gu pìinɛ Kabulu ari kũ a gbãrao. 
Hiramu gĩnakɛ à wuraa kpã̀zã Sulemanunɛ yã tↄn siikↄ̃. 
Gbɛ̃ kũ Sulemanu ń dá zↄ̀zĩnnↄ yãn dí. Gbɛ̃ pìnↄ mɛ́ ò Dikiri ↄn kũ Sulemanu ↄnnwo zĩ kɛ̀. Ò Milo wɛ̀ɛɛ tàta kũ bùsuuo, ò Yurusalɛmu bĩni bò, ò ɛ̀ra ò Azo kũ Mɛgidoo kũ Gɛzao kɛ̀kɛ ò kàtɛ. 
Misila kína Firi'auna lɛ̀tɛ Gɛza pìia yã, akũ à sì à tɛ́ sↄ̃̀a à Kanaa kũ ò kú a gũnnↄ dɛ̀dɛ, akũ à kpà a nɛ́nↄgbɛ̃a zãkɛna gba ũ gↄrↄ kũ à a kpã̀zã Sulemanua. 
Akũ Sulemanu ɛ̀ra à Gɛza pìi kɛ̀kɛ à kàtɛ kũ Bɛtoroni gɛ̃i pↄ́o 
kũ Baalao kũ Tadamↄ kũ à kú a bùsu gbárannanwo 
kũ wɛ̃tɛ kũ à kusuna kàtɛnnↄ kũ wɛ̃tɛ kũ a sↄ̃gonↄ kũ a sↄ̃nↄn kunnↄ kũ kpɛ́ kũ à ye à dↄ Yurusalɛmunↄ kũ Lɛbanao kũ bùsu kũ àtɛn kí bleanↄ pínki. 
Buri kũ ò de Isaraila ũronↄ: Amↄrinↄ, Itinↄ, Pɛrizinↄ, Ivinↄ kũ Yebusi kũ ò gↄ̃̀nↄ ń pínki, 
gbɛ̃ kũ Isarailanↄ dí fↄ̃ ò ń dɛdɛronↄ, ń buri kũ ò gↄ̃̀ ń bùsuu pìnnↄn Sulemanu ń dá zↄ̀zĩn, akũ òdigↄ̃ zĩ pì kɛ lɛ ari kũ a gbãrao. 
Adi Isarailanↄ da zↄ̀zĩnlo. Mↄ́kↄ̃nↄn à ń dítɛ a zĩ̀karinↄ ũ, a ìbanↄ, a kína dakenↄ, a gbɛ̃nↄ don'arɛdenↄ, a sↄ̃godenↄ, a sↄ̃denↄ. 
Mↄ́kↄ̃nↄmɛ zĩ kũ òtɛn kɛ pì gbɛ̃ zↄ̃kↄ̃nↄ ũ dↄ, ò gbɛ̃nↄn wàa pla kũ basuppla akurio. 
Kũ Firi'auna nɛ́nↄgbɛ̃ bò Dauda wɛ̃tɛn à tà a kpɛ́ kũ Sulemanu bòarɛn, a gbɛran Sulemanu Milo wɛ̀ɛɛ tàta. 
Wɛ̃̀ kũ wɛ̃̀ɛo Sulemanu dìgↄ̃ sa o gɛ̃̀n aakↄ̃kↄ̃. Àdi sa'opↄ kũ òdi ká tɛ́n à tɛ́ kũ kũ kɛnnakũkↄ̃o sa'opↄo o sa'oki kũ à bò Dikirinɛɛa, àdi turaretiti kpata Dikiri arɛ gwe dↄ. Lɛn à Dikiri ↄn zĩnↄ kɛ̀ lɛ mámmam. 
Kína Sulemanu gó'itɛnↄ kɛ̀ Ɛziↄ̃ Gɛba Elata sarɛ Ɛdↄmu bùsun Isira Tɛ̃ra lɛ́a. 
Hiramu a góde kũ ò ísira dↄ̃nↄ zĩ̀, akũ ò dì ísira musu lɛɛlɛ kũ Sulemanu gbɛ̃nↄ. 
Ò gɛ̀ɛ Ofi, ò wuraa sɛ̀tɛ gwe tↄn gɛ̃ro ò sùo kína Sulemanunɛ. 
