﻿1 KINANƆ.
16.
Dikiri yã sù Anani nɛ́ Yehua, akũ à yã ò Baasanɛ à pì: 
Ma n bo bùsutitin, ma n kɛ ma gbɛ̃ Isarailanↄ don'arɛde ũ, akũ n zɛ kũ Yeroboamu yãkɛnaao n ma gbɛ̃ Isarailanↄ dà durunnakɛnan, akũ ń durunna pìnↄ ma pↄ fɛ̃̀. 
Mↄkↄ̃n kũ n burinↄ, mani á dúgu zↄ̃mɛ sà. Mani kɛ n ↄnnnɛ lákũ ma kɛ̀ Nɛbati nɛ́ Yeroboamu ↄnnnɛ nà. 
Gbɛ̃danↄ ni n gbɛ̃ kũ oni gaga wɛ̃tɛ gũnnↄ só, bãnↄ ni n gbɛ̃ kũ oni gaga sɛ̃̀nnↄ ble. 
Baasa yã kparanↄ, yã kũ à kɛ̀nↄ kũ a nɛ́gↄ̃gbɛ̃kɛyãnↄn kú Isarailanↄ kínanↄ gĩayãkɛnanↄ takadan. 
Kũ Baasa gà, ò a vĩ̀ Tiza, akũ a nɛ́ Ela vùtɛ a gɛ̃nɛ ũ. 
Dikiri yã pìi ò Baasanɛ kũ a burinↄ annabi Yehu, Anani nɛ́ gãi, yã vãni kũ à kɛ̀ à Dikiri pↄ fɛ̃̀onɛ lákũ Yeroboamu burinↄ kɛ̀ nà yãi kũ Yeroboamu buri kũ à ń kakatɛnↄ yão dↄ. 
Yudanↄ kína Asa kíblena wɛ̃̀ baraasↄↄro awɛɛdode gũnn Baasa nɛ́ Ela kɛ̀ Isarailanↄ kína ũ à vùtɛ Tiza wɛ̃̀ pla. 
A ìbanↄ do Zimirimɛ a sↄ̃gonↄ kpado gbɛ̃ zↄ̃kↄ̃ ũ, akũ à lɛ́ kpàkũsũi kũńwo. Gↄrↄ kũ í Ela kũ̀ a bɛgwari Aza kpɛ́n zaa Tiza, 
akũ Zimiri gɛ̃̀ à a dɛ̀ Asa kíblena wɛ̃̀ baraasↄↄro awɛɛplade gũn, akũ à vùtɛ a gɛ̃nɛ ũ. 
Kũ à kí blè gↄ̃̀nↄ, akũ à Baasa burinↄ dɛ̀dɛ ń pínki, adi gↄ̃gbɛ̃ ke tó a danɛnↄ ke a gbɛ̃nnanↄ tɛ́ro. 
À Baasa buri pìnↄ kàkatɛ ń pínki, lákũ Dikiri ò annabi Yehu gãi nà. 
Baasa kũ a nɛ́ Elao Dikiri Isarailanↄ Luda pↄ fɛ̃̀nɛ durunna kũ ò kɛ̀ tãna pãpãnↄ yã musu, akũ dↄ ò Isarailanↄ dà a kɛnan yãi. 
Ela yã kparanↄ kũ yã kũ à kɛ̀nↄ pínki kú Isarailanↄ kínanↄ gĩayãkɛna takadan. 
Yudanↄ kína Asa kíblena wɛ̃̀ baraasↄↄro awɛɛplade gũnn Zimiri kí blè Tiza gↄrↄ suppla. Gↄrↄ birea Isaraila zĩ̀karinↄ bùra kú Filisitini wɛ̃tɛ Gibetↄ̃ sarɛ. 
Kũ zĩ̀karii pìnↄ mà Zimiri lɛ́ kpàkũsũ kũ gbɛ̃nↄ kínai à a dɛ̀, akũ ò ń don'arɛde Ɔmiri kà Isarailanↄ kína ũ ń bùran gwe gↄ̃̀nↄ. 
Akũ Ɔmiri kũ Isaraila zĩ̀karinↄ fùtɛ Gibetↄ̃ ò gɛ̀ɛ ò lìka Tizai. 
Kũ Zimiri è ò a wɛ̃tɛ sìawa, akũ à dìdi à gɛ̃̀ a bɛ kpɛ́didikↄ̃ana musu gũn à tɛ́ nàa, akũ à tɛ́ kũ̀ à gà 
durunna kũ à kɛ̀ yãi. À yã kũ Dikiri yeiro kɛ̀ à zɛ̀ kũ Yeroboamu yãkɛnaao. À durunna kɛ̀, akũ dↄ à Isarailanↄ dà a kɛnan. 
Zimiri yã kparanↄ kũ lɛ́ kũ à kpàkũsũ kũńwo Elaiio kú Isarailanↄ kínanↄ gĩayãkɛna takadan. 
Isarailanↄ kpàatɛ lɛu pla. Ń kpadonↄ ye ò Ginati nɛ́ Tibini ká kína ũ, ń kpadonↄ sↄ̃, Ɔmiri. 
Kũ gbɛ̃ kũ ò zɛ̀ kũ Ɔmirionↄ gbãna de gbɛ̃ kũ ò zɛ̀ kũ Ginati nɛ́ Tibinionↄla, akũ ò Tibini dɛ̀, Ɔmiri kí blè. 
Yudanↄ kína Asa kíblena wɛ̃̀ baraakuri awɛɛdode gũnn Ɔmiri kɛ̀ Isarailanↄ kína ũ, à kí blè wɛ̃̀ kuri awɛɛpla. À kɛ̀ Tiza wɛ̃̀ suddo, 
akũ à Samaria sĩ̀sĩi lù Sɛmaa kũ andurufuuo kiloo baaakↄ̃ akuri, akũ à wɛ̃tɛ kàtɛa à tↄ́ kpànɛ Samaria kũ Sɛma mɛ́ à sĩ̀sĩi pì vĩ yã yãi. 
Ɔmiri yã kũ Dikiri yeiro kɛ̀ à durunna kɛ̀ de gbɛ̃ kũ ò dònɛ arɛnↄ pↄ́la ń pínki. 
À zɛ̀ kũ Nɛbati nɛ́ Yeroboamu yãkɛnaao pínki. À Dikiri Isarailanↄ Luda pↄ fɛ̃̀nɛ kũ durunna kũ à kɛ̀ tãna pãpãnↄ yã musuo à Isarailanↄ dà a kɛnan dↄ. 
Ɔmiri yã kparanↄ kũ yã kũ à kɛ̀nↄ kũ a nɛ́gↄ̃gbɛ̃kɛyãnↄn kú Isarailanↄ kínanↄ gĩayãkɛna takadan. 
Kũ à gà, ò a vĩ̀ Samaria, akũ a nɛ́ Ahabu vùtɛ a gɛ̃nɛ ũ. 
Yudanↄ kína Asa kíblena wɛ̃̀ bupla plansaride gũnn Ɔmiri nɛ́ Ahabu kɛ̀ Isarailanↄ kína ũ à kí blè Samaria wɛ̃̀ baro awɛɛplamɛ. 
À yã kũ Dikiri yeiro kɛ̀ de gbɛ̃ kũ ò dònɛ arɛnↄ pↄ́la ń pínki. 
A zɛna kũ Nɛbati nɛ́ Yeroboamu durunnakɛnaao dí kɛnɛ yãke ũro, akũ à Sidↄ̃denↄ kína Ɛtabaali nɛ́nↄgbɛ̃ Yɛzɛbɛli sɛ̀ nↄ ũ, akũ à nà Baali tãnagbagbanaaa, àdigↄ̃ kútɛnɛ. 
À kpɛ́ bò Baalinɛ Samaria, akũ à a gbagbaki pɛ̀tɛ kpɛ́ pìi gũn. 
À Asɛra lí pɛ̀tɛn dↄ à ɛ̀ra à Dikiri Isarailanↄ Luda pↄ fɛ̃̀nɛ de Isarailanↄ kína kũ ò dònɛ arɛnↄ pↄ́la ń pínki. 
Ahabu gↄrↄan Bɛtɛli gbɛ̃ Iyɛli Yɛriko kɛ̀kɛ à kàtɛ. Kũ à a bĩni ɛ̃ pɛ̀tɛ, akũ a daudu Abiramu gà. Kũ à a zɛ́ gbànↄ pɛ̀tɛ, akũ a nɛ́ kpɛde Segubu gà lákũ Dikiri ò Nuni nɛ́ Yↄsua gãi nà. 
