﻿ZABURA.
7.
Lɛ̀ kũ Dauda sì Dikirinɛ Biliaminu buri Kusu yã musu. Dikiri ma Luda, ma nanyĩ, ǹ ma mì sí ǹ ma sura ba gbɛ̃ kũ ò pɛ̀tɛmainↄ ↄĩ. 
Tó lɛnlo, oni ma kɛ yákiyaki lán músuu dì kɛńnɛ nàmɛ, oni ma kɛ̃kɛ̃kↄ̃rɛ, gbɛ̃ke ni ma mì síro. 
Dikiri ma Luda, tó ma taari ke kɛ̀, tó ma ↄ kú yã vãnin, 
tó ma a vãni kɛ̀ ma gbɛ̃dakenɛ, ke tó ma gbãna mↄ̀ ma ibɛrɛɛnɛ pã, 
ǹ tó ma ibɛrɛ pì pɛ́tɛmai à ma kũ, à gɛ̀sɛ pɛ́tɛpɛtɛma zĩtɛ, à ma vĩ bùsu'atɛ̃n. 
Ǹ futɛ ǹ zɛ kũ pↄfɛ̃o, Dikiri, ǹ futɛ ma ibɛrɛnↄi ń nɛ̀sɛ kpã̀kpã yãi. Ǹ vu, ma Luda, ǹ yã gↄ̃gↄ̃ a zɛ́a. 
Ǹ tó gbɛ̃nↄ kakaranyĩ, ǹ kí bleḿma zaa musu. 
Dikiri, ndì yãkpatɛ kɛ kũ gbɛ̃nↄ. Dikiri, ǹ tó yã bo kũmao nna ma yãzɛdekɛ lɛ́n. Luda Musude, ǹ yã kɛmɛnɛ ma nɛ̀sɛpura lɛ́n. 
Luda, mↄkↄ̃mmɛ mana, ndì nɛ̀sɛ kũ laasunnwo kpátɛ kɛ. Ǹ gbɛ̃ vãninↄ pãsĩkɛnaa mì dɛ, ǹ gbɛ̃ mananↄ gba zɛki. 
Luda Musudemɛ ma sɛ̃gbako ũ, àdi gbɛ̃ kũ ń nɛ̀sɛ mananↄ sura ba. 
Luda dì yãkpatɛ kɛ a zɛ́a, àdi tó yã gↄ̃ vutɛḿma gↄrↄ sĩnda pínki. 
Tó gbɛ̃ dí a nɛ̀sɛ litɛro, Luda dì a fɛ̃nɛda lɛ́ kɛkɛ àdi a sá kú à kã. 
Àdi a gↄ̃kɛbↄ kũ àdi ga ińnɛnↄ kɛkɛ, àdi a kà tɛ́denↄ kpá sála. 
Ǹ gwa, yã vãni dì nↄ̀ dↄ gbɛ̃n, akũ àdi wari nↄ̀ sí à nɛ́ i ɛ́kɛ ũ. 
Àdi wɛ̀ɛ yↄ̃ gbɛ̃nↄnɛ zã̀zã tankutɛ ũ, akũ àdi zu wɛ̀ɛ kũ à yↄ̃̀ↄ pìi gũn. 
A àlesi pãsĩ dì doi, a wɛ́tãna gbɛ̃nↄa dì wí a mìia. 
Mani Dikiri sáabu kpá a manakɛ yãi, mani Dikiri Musude tↄ́ bo kũ lɛ̀sinaao. 
