﻿ZABURA.
22.
Dauda lɛ̀ɛ. Ma Luda, ma Luda, à kɛ̀ dera n ma tonn? Ma wiki lɛ̀, à kɛ̀ dera ńdi su ma sura baroo? 
Ma Luda, ma lɛ́ zùnyĩ fãnantɛ̃, ama ńdi wemaro, ma wiki lɛ̀mma gwãani dↄ, mádi yĩtɛro. 
Ń kú adona ń vutɛna kpatan, mↄkↄ̃n kũ Isarailanↄ dì n sáabu kpá. 
Mↄkↄ̃mmɛ ó dizinↄ náani kɛ̀, ò n náani kɛ̀, akũ n ń mìi sì. 
Ò lɛ́ zùnyĩ, akũ ò boki lè, ò n náani kɛ̀, akũ wé'i dí ń kũro. 
Kↄ̀kↄ fítinnan ma ũ, bisãsirimɛ ma ũro, òtɛni ma sↄ̃sↄ̃, òtɛni ma gya bo. 
Gbɛ̃ kũ òtɛni ma gwanↄ tɛni ma fobo, òtɛn lɛ́zuki kɛma, òtɛni ń mì kɛ dékũdekũ òtɛn pi: 
Lákũ àtɛn Dikiri náani kɛ nà, à a sura ba, tó a yã kàagumɛ, à a mì sí. 
Mↄkↄ̃mmɛ n ma bo ma da nɛ̀sɛn, n ma gwa aafia ma yↄ̃migↄrↄ. 
Má na n ↄĩ zaa nɛ́'isↄmmɛ, ma Ludamɛ n ũ zaade má kú ma da nɛ̀sɛn. 
Ǹsungↄ̃ kú kũmao zã̀ro, zaakũ wari kɛ̀ kãni kũmao, gbɛ̃ke kun à kpámairo. 
Ò likamai dasidasi lán zùsanↄ bà, ò ma kaguraa kɛ̀ lán Basã bùsu zùsa gbãnanↄ bà. 
Òtɛn lɛ́ atɛ̃ma lán músu ↄ́ↄdↄri kũ òtɛn pↄ́ kɛ yákiyakinↄ bà. 
Ma gbãna tà lán í kↄtɛnaa bà, ma mɛ̀ gupɛkinↄ bòkũn pínki, ma mɛ̀ɛ yↄ̀ lán zↄ́saa bà. 
Ma kòto kori kɛ̀ lán kpɛ̃nɛ kaso bà, ma nɛ́nɛ nà ma lɛ́ musu, ò ma wutɛ lán gɛ̀ɛ bà lukutɛ̃n. 
Lɛwannanↄ gã̀ likanamai, gbɛ̃ vãni pìnↄ nàkarama, ò ma ↄnↄ kũ ma gbánↄ zↄ̃̀zↄ̃. 
Mani fↄ̃ mà a wánↄ naro pínki, ò wɛ́ bìribiri, òtɛni ma gwa. 
Ò ma pↄ́kasanↄ kpàatɛkↄ̃nɛ, ò kàpaa kpà ma uta yã musu. 
Dikiri, ǹsungↄ̃ kú kũmao zã̀ro, mↄkↄ̃mmɛ ma gbãna ũ, ǹ mↄ́ ǹ kpámai likalika. 
Ǹ ma bo ń fɛ̃nɛda lɛ́i, ǹ ma wɛ̃̀ndi sí lɛwanna pìnↄa. 
Ǹ ma bo músu pìnↄ lɛ́i, ǹ ma si zùsɛ̃ntɛ pìnↄ bɛ̃nɛa. 
Mani n tↄ́ bo ma gbɛ̃nↄ tɛ́, mani n sáabu kpá kↄ̃kakaranaa gũn. 
Ákↄ̃nↄ Dikiri vĩnakɛrinↄ, à a sáabu kpá, ákↄ̃nↄ Yakubu burinↄ, à a tↄ́ bo, ákↄ̃nↄ Isarailanↄ, à mì natɛnɛ. 
Zaakũ adi takaside gya boro, adi a wɛ̃ndakɛ foboro, adi mìkpɛrɛ zunɛro, à sã kpà a wikilɛnaai. 
Mani n sáabu kpá pari kↄ̃kakaranaa gũn, mani lɛ́ kũ ma gbɛ̃̀nnɛ papa n vĩnakɛrinↄ wára. 
Takasidenↄ ni pↄ́ ble ò kã, Dikiri ki wɛtɛrinↄ ni a sáabu kpá, onigↄ̃ kú kũ wɛ̃̀ndiio gↄrↄ sĩnda pínki. 
Andunia lɛ́zɛkidenↄ nigↄ̃ Dikiri dↄ̃ ò arɛ dↄa, buri kũ ò kunnↄ ni kútɛnɛ ń pínki, 
zaakũ kíblena bi Dikiri pↄ́mɛ, àdi kí ble buri sĩnda pínkia. 
Andunia aruzɛkɛdenↄ ni donyĩ kɛnɛ ń pínki, kũ gbɛ̃ kũ ò kú ga lɛ́inↄ, gbɛ̃ kũ ò gɛ̀ɛ gɛ́kianↄ ni mì natɛnɛ ń pínki. 
Zia gbɛ̃nↄ ni donyĩ, oni Dikiri yã baba gbɛ̃ kũ oni sunↄnɛ. 
Ò surabana yã o gbɛ̃ kũ òdi ń i kↄ̀ronↄnɛ, zaakũ à gĩnakɛ à kɛ̀. 
