﻿ZABURA.
39.
Dauda lɛ̀ɛ. Ma pì, manigↄ̃ ma zĩda kũna dↄ̃, mani tó ma lɛ́ ma da durunnakɛnaa gũnlo. Tó gbɛ̃ vãni kú kũmao, mani ma lɛ́ kũ. 
Ma lɛ́ nakↄ̃ana, ma yĩtɛ kítikiti, mádi yãke oro, bee yã mana se, akũ ma yã'ũmmanaa ɛ̀ra à kàra. 
Ma swɛ̃̀ɛ puusu bò ma gũn, kũ ma laasunn lɛ̀, ma nɛ̀sɛɛ wã̀, akũ ma lɛ́ bò ma pì: 
Dikiri, ǹ tó mà a wɛ̃̀ndigↄrↄ lɛ́ dↄ̃ kũ ma gↄrↄ dasi lɛ́o. Ǹ tó màgↄ̃ dↄ̃ lákũ ma wɛ̃̀ndii ni láka nà araga. 
N ma wɛ̃̀ndi lɛ́ yↄ̃̀ n ↄla lɛ́n, ma kunna de wɛ́ kũ yĩola n kĩnaaro. Gbɛ̃ sĩnda pínki dì gɛ̃tɛ lán ĩa bàmɛ, 
bisãsiri tɛna dìgↄ̃ de lán uraa bàmɛ. Àdi kɛ gàragara à aruzɛkɛ kakara, ama à dↄ̃ ke dín ani gↄ̃nɛro. 
Tó lɛmɛ, bↄ́ tãmaan manigↄ̃ vĩi? Mↄkↄ̃mmɛ ma wɛ́ donyĩ, Dikiri. 
Ǹ ma taarinↄ kɛ̃ma, ǹsun tó yↄ̃nkↄnↄ ma foboro. 
Ma lɛ́ nakↄ̃ana, mádi ma lɛ́ wɛ̃kↄ̃aro, zaakũ mↄkↄ̃n mɛ́ n yã bire kɛ̀. 
Ǹsun ma lɛ́ doro, n okũ tɛni ma ká gaa. 
Ndì gbɛ̃ toto ndì wɛ́ tãa a durunna yãi, ndì a aruzɛkɛ ble lán blɛ́ bà. Gbɛ̃ sĩnda pínki dì gɛ̃tɛ lán ĩa bàmɛ. 
Ǹ ma aduakɛna sí Dikiri, ǹ sã kpá ma wikilɛnaaa. Ǹsun sã tata ma ↄ́ↄdↄnaanɛro, zaakũ n nibↄↄn ma ũ, má de gbɛ̃ zĩ̀tↄ ũ lán ma dizinↄ bà. 
Ǹ wɛ́ goma de ma pↄ le àgↄ̃ nna dↄ, ari màgↄ̃ gɛ́ andunia tó. 
