﻿ZABURA.
46.
Kora burinↄ lɛ̀ɛ. Ludan ó utɛki ũ kũ ó gbãnao, àdigↄ̃ kpáwái gↄrↄ sĩnda pínki ó warikɛnaa gũn. 
A yã mɛ́ à tò bee tó andunia yàka akũsↄ̃ kpinↄ lɛ̀tɛ ò sì ísiran, bee tó í pì kĩni kà à fùtaa bò akũsↄ̃ kpinↄ dège kũ kĩnio, swɛ̃̀ ni kɛ̃óguro. 
Swa ke kun kũ a í dì su kũ pↄnnao Luda wɛ̃tɛ gũn, Luda Musude kúki kũ à kú adonaa pìi. 
Luda kú wɛ̃tɛ pìi gũn, ani gↄ̃ bɛzĩ ũro, Luda ni kpái gudↄo. 
Burinↄ tɛn wiki lɛ́, kpatanↄ tɛn yĩgã, Luda pũ̀tã, akũ andunia yↄ̀. 
Dikiri Zĩ̀karide kú kũoo, Yakubu Ludan ó utɛki ũ. 
À mↄ́ à Dikiri yãkɛnanↄ gwa, lákũ à yã yìa anduniaa nà. 
Àkũ mɛ́ àdi zĩ̀i mì dɛ ari andunia lɛ́n, àdi sánↄ ɛ́'ɛ àdi sárinↄ dúgu zↄ̃, àdi tɛ́ sↄ̃ sɛ̃gbakonↄa. 
À zɛ tɛɛnɛ àgↄ̃ dↄ̃ kũ makũmɛ Luda ũ. Burinↄ ni ma tↄ́ sɛ́ lei, oni ma tↄ́ kpá andunia gũn pínki. 
Dikiri Zĩ̀karide kú kũoo, Yakubu Ludan ó utɛki ũ. 
