﻿ZABURA.
48.
Kora burinↄ lɛ̀ɛ. Dikiri zↄ̃kↄ̃, à kà ò a sáabu kpá manamana ó Luda wɛ̃tɛ gũn a kpi kũ à kú adonaa musu. 
Zaiↄ̃ gbɛ̀ katɛna mana, à de andunia gbɛ̃ sĩnda pínkinɛ pↄnna ũ. Kína zↄ̃kↄ̃ wɛ̃tɛ pì kú kpi gugbãnduru kpa. 
Luda kú a gudãkpãkinↄ gũn, à tò ò a dↄ̃ aafialeki ũ. 
Kũ kínanↄ lɛ́dokↄ̃nↄ kɛ̀ de ò su ò lɛ́tɛa lɛɛlɛ, 
kũ ò wɛ̃tɛ pìi è lɛ, akũ à bò ń sarɛ, vĩna ń kũ, akũ ò bàa lɛ̀. 
Ò gↄ̃̀ kũ lukanaao lán nↄgbɛ̃ nↄ̀wãwãkɛrii bà. 
N ń kɛ́ dúgudugu lákũ ifãboki ĩa dì lagatarinↄ gó'itɛnↄ kakatɛ nà. 
Yã kũ o màan ó wɛ́ è Dikiri Zĩ̀karide ó Luda wɛ̃tɛ gũn. Luda wɛ̃tɛ pìi kàtɛ àgↄ̃ kun gↄrↄ sĩnda pínki. 
Luda, ó kú n kpɛ́ ↄnn, ótɛn laasun lɛ́ n yenyĩkɛnaaa. 
Luda, lákũ n tↄ́ dàgula ari andunia lɛ́n nà, lɛn n sáabukpanaa dàgula lɛ dↄ. Ndì yã gↄ̃gↄ̃ n gbɛ̃nↄnɛ a zɛ́a. 
Zaiↄ̃ kpidenↄ tɛn pↄnna kɛ, Yudanↄ bùsu wɛ̃tɛdenↄ pↄ kɛ̀ nna, yãkpatɛ kũ n kɛ̀nↄ yãi. 
À dↄdↄkↄ̃a à lika Zaiↄ̃i, à a bĩni dãkpãki lei dasinↄ naro. 
À a bĩninↄ tàasi ká kũ a zɛki gbãnanↄ de à le à baba ziadenↄnɛ. 
Zaakũ Luda dímɛ ó Luda ũ gↄrↄ sĩnda pínki, àdi dowɛrɛ arɛ ari ò gɛ́ gao. 
