﻿ZABURA.
57.
Lɛ̀ kũ Dauda dà gↄrↄ kũ à bàa lɛ̀ Solunɛ à ùtɛ gbɛ̀wɛɛn. Ǹ ma wɛ̃nda gwa Luda, ǹ ma wɛ̃nda gwa, zaakũ mↄkↄ̃mmɛ ma nanyĩ. Ǹ ma sↄtↄ n orun ari ma bo ga lɛ́i. 
Matɛn wiki lɛ́ Luda Musudei, Luda kũ àdi yã kũ à ò papamɛnɛ pìi. 
Ani tó kpányĩ bo zaa musu à ma sura ba, ani wé'i da gbɛ̃ kũ òtɛn pɛ́manↄa, ani a gbɛ̃kɛ kũ a náaniyão kɛmɛnɛ. 
Má kú músunↄ tɛ́, ma gↄ̃ wutɛna nↄ̀bↄ pãsĩnↄ dagura. Gbɛ̃ pìnↄ nɛ́nɛ nna lán fɛ̃nɛda bà, ń saka bi sárimɛ kũ kàao. 
Luda, ǹ n zĩda tↄ́ sɛ́ lei ari musumusu, ǹ tó n gakuri da anduniala pínki. 
Ò tankutɛ kpàkpamɛnɛ ma zɛ́n, akũ ma gↄ̃ wari gũn, ò wɛ̀ɛɛ yↄ̃̀ ma arɛ, akũ ò zù wɛ̀ɛɛ pìn. 
Ma laakari kpatɛna Luda, ma laakari kpatɛna, mani lɛ̀ sí mà n táaki lɛ́. 
Ǹ vu, ma swɛ̃̀! Ma mↄrↄ kũ ma gidigboo kú máa? Mani gudↄ pá mìio. 
Dikiri, mani n sáabu kpá burinↄ tɛ́, mani n táaki lɛ́ gbɛ̃nↄnɛ. 
Zaakũ n gbɛ̃kɛ zↄ̃kↄ̃ↄ kà n kĩnaa, n náani ludambɛ luku lè. 
Luda, ǹ n zĩda tↄ́ sɛ́ lei ari músumusu, ǹ tó n gakuri da anduniala pínki. 
