﻿ZABURA.
60.
Lɛ̀ kũ Dauda dà gↄrↄ kũ à zĩ̀i kà kũ Siria kũ ò kú Mɛsↄpↄtamia bùsun kũ Zoba bùsuu gũnnↄ, akũ Yoabu sù à Ɛdↄmunↄ dɛ̀dɛ Guvutɛ Wisiden gbɛ̃nↄn dúbu kuri awɛɛpla. Luda, n pↄ fɛ̃̀wái, n ↄ gbàrɛwái n ó zukũna. Ǹ ɛra ǹ arɛ dↄwá sà. 
N tò ó bùsuu yĩ̀gã ari à pàra. Ǹ ɛra ǹ tata a gbɛ̀n, zaakũ à gↄ̃̀ kpámmɛ. 
N tò yã zĩ'ũ sù n gbɛ̃nↄa, n ó káka kũ í gbãnao, akũ ótɛn tàtantatan kɛ. 
Ama n tuta dↄ̀ n vĩnakɛrinↄnɛ, de ò le ò bo gbɛ̃nↄ ságana lɛ́i. 
Ǹ wewá ǹ ó sura ba kũ n gã̀sã gbãnao de ókↄ̃nↄ n gbɛ̃ yenyĩdenↄ le ò bo. 
Luda yã ò zaa a kúkia à pì: Mani Sɛkɛmu kpaatɛ kũ kùwikio, mani gba da kũ Suko guvutɛo. 
Giliada bùsu bi ma pↄ́mɛ, Manase burinↄ bùsu bi ma pↄ́mɛ, Ɛflaimu burinↄ bùsu bi ma mↄ̀furaamɛ, Yudanↄ bùsu bi ma gòomɛ. 
Mↄabunↄ bùsu bi ma ↄpipibↄↄmɛ, madì ma kyate kátɛ Ɛdↄmunↄ bùsun, madì kùwiki dↄ Filisitininↄ bùsuua. 
Dí mɛ́ ani gɛ̃ kũmao wɛ̃tɛ bĩnide gũnn? Dí mɛ́ ani domɛnɛ arɛ ari Ɛdↄmunↄ bùsunn? 
Luda, à de mↄkↄ̃n mɛ́ n ↄ gbàrɛwái, ndì bo kũ ó zĩ̀karinↄ doroo? 
Ǹ ↄ dawá ó ibɛrɛnↄ yãi, zaakũ bisãsiri kpányĩ bi yã pãmɛ. 
Óni zĩ̀ ble kũ Luda gbãnao, àkũ mɛ́ ani gɛ̀sɛ pɛ́tɛpɛtɛ ó ibɛrɛnↄa. 
