﻿ZABURA.
79.
Asafa lɛ̀ɛ. Luda, burinↄ sì n bùsun, ò n kpɛ́ kũ à kú adona yàka, ò Yurusalɛmu wìwi ò dàtɛ. 
Ò n zↄ̀blerinↄ gɛ̀ɛ kpà bãnↄa, ò n yãmarinↄ mɛ̀ɛ tò nↄ̀bↄ pãsĩnↄnɛ pↄ́ble ũ. 
Ò ń aru kↄ̀tɛ lán í bà Yurusalɛmu bĩnikpɛ, gbɛ̃ke kun à ń vĩro. 
O gↄ̃ sↄ̃sↄ̃na pↄ́ ũ ó sarɛdenↄnɛ, o gↄ̃ lalandi pↄ́ ũ gbɛ̃ kũ ò likawáinↄnɛ. 
Dikiri, ĩnigↄ̃ pↄ fɛ̃ kũoo ari bↄrɛmɛɛ? N pɛ̃tɛ̃ tɛ́ nigↄ̃ kũ gↄrↄ sĩnda pínkin yá? 
Ǹ pↄfɛ̃ kipa buri kũ ò n dↄ̃ronↄa, gbɛ̃ kũ òdi n sísironↄ bùsunↄa. 
Zaakũ ò Yakubu burinↄ blè, ò ń bùsuu yàka. 
Ǹsun ó denↄ durunnanↄ wí ó musuro. Ǹ wɛ̃nda dↄ̃wɛrɛ likalika, zaakũ o busa o gↄ̃ búgubugu. 
Ǹ kpáwái, Luda ó surabari, ǹ ó sura ba de ǹ tↄ́ bo, ǹ ó durunnanↄ kɛ̃wá n tↄ́ yãi. 
Bↄ́yãi ĩni tó burinↄ ó lá ò pi: Ó Luda kú mámɛ sɛ́ɛ? Ǹ tó burinↄ gↄ̃ dↄ̃ ó wára kũ ndì n zↄ̀blerinↄ dɛdɛna fĩna boḿma. 
Ǹ tó zĩ̀zↄnↄ ↄ́ↄdↄna gɛ̃ n sãn, ǹ gbɛ̃ kũ ò kú ga lɛ́inↄ bo kũ n gã̀sã gbãnao. 
Ǹ lalandi kũ buri kũ ò likawáinↄ kɛ̀nnɛ fĩna boḿma gɛ̃̀n suppla, Dikiri. 
Ókↄ̃nↄ n gbɛ̃nↄ, n kpàsa sãnↄ, ónigↄ̃ n sáabu kpá gↄrↄ sĩnda pínki, ónigↄ̃ n tↄ́ babańnɛ ari ó buria. 
