﻿ZABURA.
81.
Asafa lɛ̀ɛ. À ayuwii kɛ Luda ó gbãnaa, à pↄnna wiki lɛ́ Yakubu burinↄ Ludaa. 
À lɛ̀ dↄ à bata lɛ́ kũ mↄrↄ'ũ nnao kũ gidigboo. 
À kuru pɛ́ mↄ dufu bonaao, à pɛ́ tó mↄ kɛ̀ papana ó dikpɛgↄrↄ, 
zaakũ à de doka ũ Isarailanↄnɛmɛ, yã kũ Yakubu burinↄ Luda dìtɛn gwe. 
À yã pìi dà Yusufu burinↄnɛ gↄrↄ kũ à vĩ̀ Misila bùsula. Ò kòto kũ ò dↄ̃ro mà à pì: 
Ma aso gò á gã̀aa, ma á ↄ bò ɛ̃bona zĩn. 
A ↄ́ↄ dↄ̀mɛnɛ warikɛgↄrↄa, akũ ma á bó, ma weáwa zaa legũvĩnaa gũn, ma á lɛ́ ma á gwá zaa Mɛriba í kĩnaa. 
À sã kpá ma gbɛ̃nↄ, mani lɛ́ daáwa, ákↄ̃nↄ Isarailanↄ, tó áni ma yã ma dé! 
Àsungↄ̃ buri zĩ̀tↄnↄ tãna vĩ á tɛ́ro, àsun kútɛ dikiri pãndenɛro. 
Makũmɛ Dikiri á Luda ũ, ma á bↄ́tɛ Misila. À á lɛ́ wɛ̃, mani tó à kã. 
Ama Isarailanↄ gì ma yã mai, ma gbɛ̃ pìnↄ dí mì natɛmɛnɛro. 
Akũ ma ń tó kũ ń sãgbãnakɛo, ò tɛ́ ń zĩda pↄyeinaai. 
Tó ò pi Isarailanↄ ni ma yã ma, tó ma gbɛ̃nↄn tɛ́ ma yãi, 
de mani ń ibɛrɛnↄ sↄ̃pɛtɛ gↄ̃̀nↄgↄ̃nↄ, mani ↄ sↄ̃ ń zãngurinↄi. 
Ma zãngurinↄ ni kã natɛ ma arɛ, ń wɛ́tãmmana nigↄ̃ lakana vĩro. 
Gbasa mà á gwa kũ pↄ́blewɛ manao, mà ɛra mà gbɛ̀ zↄ́'i kpááwa à mↄ́awa. 
