﻿ZABURA.
83.
Asafa lɛ̀ɛ. Luda, ǹsungↄ̃ yĩtɛnaro, n lɛ́ súngↄ̃ nakↄ̃anaro, ǹsungↄ̃ kun kítikitiro, Luda. 
Ǹ n ibɛrɛnↄ gwa lákũ ò fùtɛ ò zɛ̀ nà, n zãngurinↄ tɛni ń mì zuzu. 
Òtɛn ↄ̃ndↄ̃ kɛ n gbɛ̃nↄnɛ, òtɛn lɛ́ kpákũsũ n gbɛ̃ yenyĩdenↄi. 
Òtɛn pi: À mↄ́ ò ń buri bo, de ń tↄ́ Isaraila súngↄ̃ dↄ gbɛ̃ken doro. 
Ò lɛ́ kpàkũsũ, ń yã kↄ̃ sɛ̀, ò lɛ́dokↄ̃nↄ kɛ̀ kũ kↄ̃o ò futɛnyĩ. 
Ɛdↄmunↄ kũ Sumaila burinↄ kũ Mↄabunↄ kũ Hazara burinↄ 
kũ Gebalidenↄ kũ Amↄninↄ kũ Amalɛkinↄ kũ Filisitininↄ kũ Tayadenↄo. 
Bee se Asirianↄ nàḿma dↄ, de ò ↄ da Lutu burinↄa. 
Ǹ kɛńnɛ lákũ n kɛ̀ Midiãnↄnɛ nà, lákũ n kɛ̀ Sisera kũ Yabĩonɛ nà Kisↄ̃i. 
N ń kɛ́ búgubugu Ɛndↄ, akũ ò gↄ̃̀ katɛna zĩtɛ lán bisaa bà. 
Ǹ kɛ ń wɛ̃nɛnↄnɛ lákũ ò kɛ̀ Orɛbu kũ Zebuonɛ nà. Ǹ kɛ ń kínanɛnↄnɛ lákũ ò kɛ̀ Zɛba kũ Zalamunaonɛ nà. 
Mↄ́kↄ̃nↄ mɛ́ ò pì yã, ò Luda sãdãki sɛ́ ń pↄ́ ũ. 
Ma Luda, ǹ tó ò gↄ̃ lán sɛ̃̀'ĩampuruu bà, lán ése ũkã kũ ĩa tɛn sɛ́ bà. 
Lákũ dàkoo dì tɛ́ kũ nà, kesↄ̃ lákũ tɛ́ dì kpinↄ ble nà, 
ǹ pɛ́tɛńyĩ kũ n zàga'ĩao, ǹ tó n ĩa pãsĩ swɛ̃̀ kɛ̃ńgu. 
Ǹ tó ń gasu gↄ̃ kpá ń wɛ́i, de ò n gbãna dↄ̃ Dikiri. 
Wé'i nigↄ̃ ń kũ gↄrↄ sĩnda pínki kũ bídio, ò boru kpɛ ò mì dɛ. 
Ǹ tó ògↄ̃ dↄ̃ kũ n tↄ́n Dikiri, mↄkↄ̃mmɛ Luda Musude ũ andunia gũn pínki. 
