﻿ZABURA.
102.
Wɛ̃ndade gbãnasaride kũ àtɛni a yã'ũmmananↄ bↄtɛ Dikirinɛɛ aduakɛnaa. Dikiri, ǹ ma aduakɛna ma, ǹ tó ma wiki n ki le. 
Ǹsun wɛ́ utɛmɛnɛ ma warikɛgↄrↄaro, ǹ sã kpámai, tó ma n sisi, ǹ wema likalika. 
Zaakũ ma gↄrↄ tɛn gɛ̃tɛ lán túsukpɛ bà, ma mɛ̀ tɛn puusu bo lán tɛ́yↄ̃ↄ bà. 
Ma nɛ̀sɛɛ yàka, ma gↄ̃ lán sɛ̃̀ kori bà, ma sã pↄ́bleyãn. 
Ma ndana gbãna mɛ́ à tò ma gↄ̃ wàakuu ũ. 
Ma gↄ̃ lán gbáranna tiongo bà, lán bɛzĩ kóro bà. 
I dì gɛ̃ ma wɛ́nlo, ma gↄ̃ lán bã kũ à di kpɛ́ musu ado bà. 
Ma ibɛrɛnↄ dìgↄ̃ ma sↄ̃sↄ̃ gↄrↄ sĩnda pínki, ma foborinↄ dì gbɛ̃ ká kũ ma tↄ́o. 
Túbumɛ ma pↄ́blee ũ, ma wɛ́'i dì ká ma ímibↄn 
n pↄfɛ̃ kũ n pɛ̃tɛ̃o yãi, zaakũ n ma sɛ n ma zukũna. 
Ma gↄrↄ tɛn gɛ̃tɛ lán uraa bà, akũ matɛn kori kɛ lán sɛ̃̀ɛ bà. 
Mↄkↄ̃n sↄ̃ Dikiri, ndìgↄ̃ kú kpatan gↄrↄ sĩnda pínki, n tↄ́ ni garo ari ó buria. 
Ĩni futɛ ǹ Zaiↄ̃ wɛ̃nda gwa, zaakũ gↄrↄ kà, gↄrↄ kũ n dìtɛ kà, kũ ĩni a pↄnna wɛtɛ. 
A gbɛ̀nↄ kɛ̀ n zↄ̀blerinↄnɛ mana, a gborona bùsuu dì kɛńnɛ wɛ̃nda. 
Buri sĩnda pínki ni vĩna kɛnnɛ, Dikiri, andunia kínanↄ ni n kíkɛ dↄ̃ ń pínki. 
Zaakũ Dikiri ni Zaiↄ̃ kɛkɛ à bo dↄ, ani bo à suḿma kũ gakurio. 
Ani takasidenↄ aduakɛna sí, ani ń wɛ́kɛna kpá sãkotoro. 
Ò yã dí kɛ̃ kpɛdenↄ yãi de gbɛ̃ kũ ò kpɛ́nↄ Dikiri táaki lɛ́. 
Dikiri zĩtɛ gwà zaa a kúkia, zaa musu à wɛ́ kpàtɛ zĩtɛ, 
de à gbɛ̃nↄ zↄ̀ble ↄ́ↄ dↄ ma à ń bo ga lɛ́i yãi. 
Oni Dikiri tↄ́ bo Zaiↄ̃, oni a táaki lɛ́ Yurusalɛmu, 
zĩ kũ bùsu sĩnda pínki gbɛ̃nↄ ni kↄ̃ kakara gwe, kũ kpatablerinↄ ò donyĩ kɛnɛ. 
À ma gbãna bùsa zɛ́gbãn, à ma wɛ̃̀ndi kɛ̀ kutu, 
akũ ma pì: Ma Luda, ǹsun ma wɛ̃̀ndi bo gugbãnlo, mↄkↄ̃n kũ ń kun ari ó buria. 
N andunia zĩni pɛ̀tɛ zaa káaku, musu bi n ↄzĩmɛ. 
Ń pínki ni gɛ̃tɛ, ama ĩnigↄ̃ kun, oni zĩ kũ lán pↄ́kasa bà, ĩni ń litɛ lán uta bà ǹ ń zukũna. 
Mↄkↄ̃n sↄ̃ n kunnaa dìgↄ̃ dokↄ̃nↄ, n gↄrↄ lakana vĩro. 
N zↄ̀blerinↄ nɛ́nↄ nigↄ̃ kun aafia, ń burinↄ ni zĩni pɛ́tɛ n kuru. 
