﻿ZABURA.
108.
Dauda lɛ̀ɛ. Ma laakari kpatɛna, Luda, mani lɛ̀ sí mà n táaki lɛ́ kũ nɛ̀sɛdoo. 
Ma mↄrↄ kũ ma gidigboo kú máa? Mani gudↄ pá mìio. 
Dikiri, mani n sáabu kpá burinↄ tɛ́, mani n táaki lɛ́ gbɛ̃nↄnɛ. 
Zaakũ n gbɛ̃kɛ zↄ̃kↄ̃ↄ kà n kĩnaa, n náanikɛnaa ludambɛ luku lè. 
Luda, ò n tↄ́ sɛ́ lei ari n kukia, ǹ tó n gakuri da anduniala pínki. 
Ǹ wewá ǹ ó sura ba kũ n gã̀sã gbãnao, de ókↄ̃nↄ n gbɛ̃ yenyĩdenↄ le ò bo. 
Luda yã ò zaa a kúkia à pì: Mani Sɛkɛmu kpaatɛtɛ kũ kùwikio, mani Suko guvutɛ kpáḿma. 
Giliada bùsu bi ma pↄ́mɛ, Manase burinↄ bùsu bi ma pↄ́mɛ, Ɛflaimu burinↄ bùsu bi ma mↄ̀furaamɛ, Yuda bùsu bi ma gòomɛ. 
Mↄabunↄ bùsu bi ma ↄpipibↄↄmɛ, madì ma kyate kátɛ Ɛdↄmunↄ bùsuua, madì kùwiki dↄ Filisitininↄ bùsuua. 
Dí mɛ́ ani gɛ̃ kũmao wɛ̃tɛ bĩnide gũnn? Dí mɛ́ ani domɛnɛ arɛ ari Ɛdↄmunↄ bùsunn? 
Luda, à de mↄkↄ̃n mɛ́ n ↄ gbàrɛwái, ndì bo kũ ó zĩ̀karinↄ doroo? 
Ǹ ↄ dawá ó ibɛrɛnↄ yãi, zaakũ bisãsiri kpányĩ bi yã pãmɛ. 
Óni zĩ̀ ble kũ Luda gbãnao, àkũ mɛ́ ani gɛ̀sɛ pɛ́tɛpɛtɛ ó ibɛrɛnↄa. 
